ಯುದ್ಧ ಭಯಾನಕ, ಹಾಗೆಂದು ಸುಮ್ಮನಿರಲಾಗದು: ಅಮೆರಿಕ

Team Udayavani, Aug 18, 2017, 8:15 AM IST

ವಾಷಿಂಗ್ಟನ್‌: “ಉತ್ತರ ಕೊರಿಯಾದ ಕ್ಷಿಪಣಿ ದಾಳಿ ಬೆದರಿಕೆಗೆ ಪ್ರತಿಯಾಗಿ ಸೇನಾ ಕಾರ್ಯಾಚರಣೆ ನಡೆಸುವ ನಿರ್ಧಾರ “ಭಯಾನಕ’. ಆದರೆ ಹಾಗಂದುಕೊಂಡು ಉತ್ತರ ಕೊರಿಯಾ ಅಮೆರಿಕದ ಮೇಲೆ ಅಣ್ವಸ್ತ್ರ ದಾಳಿ ನಡೆಸುವ ಸಾಮರ್ಥ್ಯ ವೃದ್ಧಿಸಿಕೊಳ್ಳಲು ಬಿಟ್ಟರೆ ಅದರಿಂದಾಗುವ ಪರಿಣಾಮವನ್ನು ಕಲ್ಪಿಸಿಕೊಳ್ಳಲು ಕೂಡ ಸಾಧ್ಯವಿಲ್ಲ’ ಎಂದು ಅಮೆರಿಕ ಸೇನೆಯ ಉನ್ನತ ಅಧಿಕಾರಿ ಹೇಳಿದ್ದಾರೆ.

“ಪಾಂಗ್ಯಾಂಗ್‌ನ ದಾಳಿ ಬೆದರಿಕೆಗೆ ಸಂಬಂಧಿಸಿದಂತೆ ಅಗತ್ಯವಿರುವ ಸೇನಾ ಆಯ್ಕೆಗಳನ್ನು ಸಿದ್ಧವಾಗಿರಿಸಿಕೊಳ್ಳುವಂತೆ ಅಧ್ಯಕ್ಷ ಟ್ರಂಪ್‌ ನಮಗೆ ನೇರ ಸೂಚನೆ ನೀಡಿದ್ದಾರೆ. ಅವರ ಸೂಚನೆಯನ್ನು ನಾವು ಪಾಲಿಸುತ್ತಿದ್ದೇವೆ’ ಎಂದು ಅಮೆರಿಕ ನೌಕಾಪಡೆಯ ಉನ್ನತ ಅಧಿಕಾರಿ ಜನರಲ್‌ ಜೋಸೆಫ್ ಡುನ್‌ಫೋರ್ಡ್‌ ಗುರುವಾರ ಬೀಜಿಂಗ್‌ನಲ್ಲಿ ಹೇಳಿದ್ದಾರೆ.

ಇದೇ ವೇಳೆ ಕೊರಿಯಾದ ಪರ್ಯಾಯ ದ್ವೀಪದಲ್ಲಿ ಯಾವುದೇ ಯುದ್ಧ ನಡೆಯುವುದಿಲ್ಲ ಎಂದು ದಕ್ಷಿಣ ಕೊರಿಯಾ ಅಧ್ಯಕ್ಷ ಮೂನ್‌ ಜೆ-ಇನ್‌ ಸ್ಪಷ್ಟಪಡಿಸಿದ್ದಾರೆ. “ಯಾವುದೇ ಕಾರಣಕ್ಕೂ ಯುದ್ಧ ನಡೆಯಲು ನಾನು ಅವಕಾಶ ನೀಡುವುದಿಲ್ಲ. ಹೀಗಾಗಿ ಯುದ್ಧ ಸಂಭವಿಸುವುದಿಲ್ಲ ಎಂಬ ಬಗ್ಗೆ ದಕ್ಷಿಣ ಕೊರಿಯಾ ಪ್ರಜೆಗಳು ವಿಶ್ವಾಸವಿರಿಸಬೇಕು’ ಎಂದು ಅವರು ಕೋರಿದ್ದಾರೆ.