ದುರ್ಬಲ ವ್ಯವಸ್ಥೆ ಸರಿಮಾಡಿದ್ದೇವೆ: ಮೋದಿ

Team Udayavani, Aug 30, 2017, 8:05 AM IST

ಉದಯಪುರ್‌: ನಮ್ಮದು ಹಿಂದಿನ ಸರಕಾರಗಳಂತೆ ಅಲ್ಲ. ನಮಗೆ ನಿರ್ಧಾರಗಳನ್ನು ಕೈಗೊಳ್ಳುವ ಧೈರ್ಯವೂ ಇದೆ, ಅವುಗಳನ್ನು ಅನುಷ್ಠಾನ ಮಾಡುವ ಬದ್ಧತೆಯೂ ಇದೆ.

ಹೀಗೆಂದು ಹೇಳಿರುವುದು ಪ್ರಧಾನಿ ನರೇಂದ್ರ ಮೋದಿ. ರಾಜಸ್ಥಾನದಲ್ಲಿ ಹಲವು ಹೆದ್ದಾರಿ ಯೋಜನೆಗಳಿಗೆ ಚಾಲನೆ ನೀಡಿದ ಬಳಿಕ ಖೇಲ್‌ಗಾಂವ್‌ನಲ್ಲಿ ಆಯೋಜಿಸಿದ್ದ ಬೃಹತ್‌ ರ್ಯಾಲಿ ಉದ್ದೇಶಿಸಿ ಅವರು ಈ ಮಾತುಗಳನ್ನಾಡಿದ್ದಾರೆ. 
ಹಿಂದಿನ ಸರಕಾರ ಯೋಜನೆಗಳನ್ನು ಸರಿಯಾಗಿ ಜಾರಿಗೊಳಿಸದೇ ಇಡೀ ವ್ಯವಸ್ಥೆಯನ್ನೇ ದುರ್ಬಲಗೊಳಿಸಿತ್ತು. ಬೇರೆ ಯಾರಾದರೂ ಸರಕಾರ ರಚಿಸಿದ್ದರೆ ರಾಜ್ಯವನ್ನು ಅಭಿವೃದ್ಧಿ ಪಥದಲ್ಲಿ ತಂದು ನಿಲ್ಲಿಸಲು ಸಾಧ್ಯವೇ ಇರುತ್ತಿರಲಿಲ್ಲ. ನಾವು ಇದನ್ನು ಸವಾಲನ್ನಾಗಿ ತೆಗೆದುಕೊಂಡು, ದುರ್ಬಲಗೊಂಡ ವ್ಯವಸ್ಥೆಯನ್ನು ಸರಿ ದಾರಿಗೆ ತಂದಿದ್ದೇವೆ ಎಂದು ಹೇಳಿದ್ದಾರೆ ಮೋದಿ. 

ನಮ್ಮ ಸರಕಾರ ಅಭಿವೃದ್ಧಿ ಮಾಡುತ್ತಿದೆ, ರಾಜಕೀಯ ಮಾಡುತ್ತಿಲ್ಲ ಎಂದಿದ್ದಾರೆ. ರಾಜಸ್ಥಾನದ ಹಿಂದಿನ ಕಾಂಗ್ರೆಸ್‌ ಸರಕಾರವನ್ನು ಟೀಕಿಸಿದ ಅವರು, ಕೋಟಾ ಸೇತುವೆಯನ್ನು ಕಾಂಗ್ರೆಸ್‌ ಸರಕಾರ 11 ವರ್ಷಗಳ ಕಾಲ ನಿರ್ಮಿಸಲಿಲ್ಲ. ಕಡೆಗೆ ನಮ್ಮ ಸರಕಾರ ಅದರ ಕಾಮಗಾರಿಯನ್ನು ಪೂರ್ಣಗೊಳಿಸಿತು ಎಂದೂ ಮೋದಿ ಹೇಳಿದ್ದಾರೆ.