ಆಗೇಕೆ ಸುಮ್ಮನಿದ್ದಿರಿ?: ರಾಹುಲ್‌ಗೆ ಪ್ರಶ್ನೆ

Team Udayavani, Jul 16, 2018, 9:20 AM IST

ಹೊಸದಿಲ್ಲಿ: ಅಪ್ಪ ರಾಜೀವ್‌ ಗಾಂಧಿ ವಿರುದ್ಧ ಅವಹೇಳನಕಾರಿ ಪದಬಳಕೆ ಮಾಡಿದ್ದರೂ ನೆಟ್‌ಫ್ಲಿಕ್ಸ್‌ನ ಸೇಕ್ರೆಡ್‌ ಗೇಮ್ಸ್‌ ವೆಬ್‌ ಸೀರಿಸ್‌ ಅನ್ನು ವಿರೋಧಿಸುವುದಿಲ್ಲ ಎಂದು ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಹೇಳಿಕೆ ನೀಡಿದ ಬೆನ್ನಲ್ಲೇ ಅವರಿಗೆ ಬಾಲಿವುಡ್‌ ನಿರ್ಮಾಪಕ ಮಧುರ್‌ ಭಂಡಾರ್ಕರ್‌ ಪ್ರಶ್ನೆಯೊಂದನ್ನು ಹಾಕಿದ್ದಾರೆ. ಕಳೆದ ವರ್ಷ ನನ್ನ ಇಂದೂ ಸರಕಾರ್‌ ಸಿನಿಮಾ ಬಂದಾಗ ಕಾಂಗ್ರೆಸ್‌ ಕಾರ್ಯಕರ್ತರು ನನಗೆ ಬೆದರಿಕೆ ಹಾಕಿ, ಪ್ರತಿಭಟನೆ ನಡೆಸಿದ್ದರು. ಆಗ ನಾನು ನಿಮ್ಮ ನೆರವು ಕೋರಿದ್ದೆ. ಆದರೂ ನೀವು ಯಾವ ಪ್ರತಿಕ್ರಿಯೆಯನ್ನೂ ನೀಡಿರಲಿಲ್ಲ ಎಂದು ಭಂಡಾರ್ಕರ್‌ ಟ್ವೀಟ್‌ ಮಾಡಿದ್ದಾರೆ. ಇದೇ ವೇಳೆ, ರಾಹುಲ್‌ ನಿಲುವಿಗೆ ಸೇಕ್ರೆಡ್‌ ಗೇಮ್ಸ್‌ ಸಹ ನಿರ್ದೇಶಕ ಅನುರಾಗ್‌ ಕಶ್ಯಪ್‌ ಮತ್ತು ನಟಿ ಸ್ವರ ಭಾಸ್ಕರ್‌ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.ಏತನ್ಮಧ್ಯೆ, ರಾಹುಲ್‌ ಹೇಳಿಕೆಯಿಂದ ಸ್ಫೂರ್ತಿ ಪಡೆದ ಪಶ್ಚಿಮ ಬಂಗಾಲದ ಕಾಂಗ್ರೆಸ್‌ ಕಾರ್ಯಕರ್ತ ರಾಜೀವ್‌ ಕುಮಾರ್‌ ಸಿನ್ಹಾ, ಸೇಕ್ರೆಡ್‌ ಗೇಮ್ಸ್‌ ವಿರುದ್ಧ ಸಲ್ಲಿಸಿದ್ದ ದೂರನ್ನು ವಾಪಸ್‌ ಪಡೆಯಲು ನಿರ್ಧರಿಸಿರುವುದಾಗಿ ತಿಳಿಸಿದ್ದಾರೆ.