ಭಾವುಕ ನಾಯಕ: ಪ್ರಣವ್‌ಗೆ ಪ್ರಧಾನಿ ಬರೆದ ಪತ್ರ ವೈರಲ್‌

Team Udayavani, Aug 4, 2017, 8:50 AM IST

ಹೊಸದಿಲ್ಲಿ: ‘ನೀವು ನನ್ನ ತಂದೆಯಂತೆ. ಸದಾ ಮಾರ್ಗದರ್ಶಕರಾಗಿ ಮುನ್ನಡೆಸಿದ್ದೀರಿ’ ಹೀಗಂತ ಭಾವನಾತ್ಮಕವಾಗಿ ಹೇಳಿರುವುದು ಪ್ರಧಾನಿ ನರೇಂದ್ರ ಮೋದಿ. ಮಾಜಿ ರಾಷ್ಟ್ರಪತಿ ಪ್ರಣವ್‌ ಮುಖರ್ಜಿಯವರ ಅಧಿಕಾರಾವಧಿಯ ಕೊನೆಯ ದಿನ ಪ್ರಧಾನಿ ಮೋದಿ ಅವರು ಪತ್ರ ಬರೆದಿದ್ದು, ಪ್ರಣವ್‌ ಅವರೊಂದಿಗೆ ಒಡನಾಟಗಳನ್ನು ಹಂಚಿ ಕೊಂಡಿದ್ದಾರೆ. ಈ ಪತ್ರವನ್ನೀಗ ಪ್ರಣವ್‌ ಅವರು ತಮ್ಮ ಟ್ವೀಟರ್‌ ಖಾತೆಯಲ್ಲಿ ಹಂಚಿಕೊಂಡಿದ್ದು ನನ್ನ ಹೃದಯ ತಟ್ಟಿದೆ ಎಂದು ಹೇಳಿಕೊಂಡಿದ್ದಾರೆ. ಈ ಪತ್ರ ಈಗ ವೈರಲ್‌ ಆಗಿದೆ.

‘ಪ್ರಣವ್‌ ದಾ’ ಎಂದು ಮೋದಿ ಅವರು ಸಂಬೋಧಿಸಿದ್ದು, ‘ನಿಮ್ಮೊಂದಿಗೆ ಕೆಲಸ ಮಾಡುವುದೇ ಖುಷಿಯ ವಿಚಾರ. ಮೂರು ವರ್ಷ ಹಿಂದೆ ಪ್ರಧಾನಿಯಾಗಿ ದಿಲ್ಲಿಗೆ ಬಂದಾಗ ಹೊರಗಿನವನಾಗಿದ್ದೆ. ನನ್ನೆದುರಿದ್ದ ಕೆಲಸ ಮತ್ತು ಸವಾಲುಗಳು ಅಗಾಧವಾಗಿದ್ದವು. ಈ ವೇಳೆ ನೀವು ತಂದೆಯಂತೆ, ಮಾರ್ಗದರ್ಶಕರಂತೆ ಕೈ ಹಿಡಿದು ನಡೆಸಿದ್ದೀರಿ. ನಿಮ್ಮ ಮಾರ್ಗದರ್ಶನ, ವೈಯಕ್ತಿಕ ಬೆಂಬಲ, ನನಗೆ ಹೆಚ್ಚಿನ ವಿಶ್ವಾಸ ಮತ್ತು ಬಲ ತಂದುಕೊಟ್ಟವು’ ಎಂದಿದ್ದಾರೆ.

‘ನಮ್ಮ ಪಕ್ಷ ಸಿದ್ಧಾಂತ, ರಾಜಕೀಯ ಪ್ರಯಾಣಗಳು ಬೇರೆ ಬೇರೆಯಾಗಿದ್ದವು. ನನಗೆ ರಾಜ್ಯವೊಂದರ ಆಡಳಿತದಲ್ಲಿ ಅನುಭವವಿದ್ದರೆ, ನಿಮಗೆ ದೇಶದ ಆಡಳಿತ, ರಾಜಕೀಯದಲ್ಲಿ ದಶಕಗಳ ಅನುಭವವಿತ್ತು. ನಿಮ್ಮ ಅಪಾರ ಅನುಭವ, ಚಿಂತನೆಗಳನ್ನು ಹಂಚಿಕೊಳ್ಳುವ ಮೂಲಕ ಒಟ್ಟಾಗಿ ಕೆಲಸ ಮಾಡುವಂತೆ ಮಾಡಿದ್ದೀರಿ. ರಾಜಕೀಯ ಹೊರತಾಗಿ ಈ ದೇಶಕ್ಕೆ, ಸಮಾಜಕ್ಕೆ ನಿಸ್ವಾರ್ಥವಾಗಿ ಸೇವೆ ಸಲ್ಲಿಸಿದ ನೀವು ದೇಶದ ಉನ್ನತ ನಾಯಕರ ಸಾಲಿನಲ್ಲಿ ನಿಲ್ಲುತ್ತೀರಿ. ನಿಮ್ಮೊಂದಿಗೆ, ನಿಮ್ಮ ಪ್ರಧಾನಿಯಾಗಿ ಕೆಲಸ ಮಾಡಿರುವುದು ನನಗೆ ಸಿಕ್ಕಿದ ಗೌರವ’ ಎಂದು ಪ್ರಧಾನಿ ಹೇಳಿದ್ದಾರೆ.