Loksabha 2024; ಎಐಎಡಿಎಂಕೆ ನೇತೃತ್ವದಲ್ಲಿ ಹೊಸ ಮೈತ್ರಿಕೂಟ; ಪಕ್ಷದಿಂದ ಸ್ಪಷ್ಟನೆ

Team Udayavani, Sep 28, 2023, 12:34 PM IST

ಚೆನ್ನೈ: ಭಾರತೀಯ ಜನತಾ ಪಕ್ಷ (ಬಿಜೆಪಿ) ದೊಂದಿಗೆ ಸ್ನೇಹ ಕಳೆದುಕೊಂಡಿರುವ ಪಳನಿಸ್ವಾಮಿಯವರ ಎಐಎಡಿಎಂಕೆ ಪಕ್ಷವು ಮುಂದಿನ ಲೋಕಸಭಾ ಚುನಾವಣೆಗೆ ಹೊಸ ಮೈತ್ರಿಕೂಟ ರಚನೆ ಮಾಡಲಿದೆ.

ಬಿಜೆಪಿ ಜತೆಗಿನ ನಾಲ್ಕು ವರ್ಷಗಳ ಮೈತ್ರಿ ಮುರಿದು ಎನ್ ಡಿಎ ನಿಂದ ಹೊರ ಬಂದು ಮೂರು ದಿನಗಳ ಬಳಿಕ ಈ ಬೆಳವಣಿಗೆ ನಡೆದಿದೆ. 2024ರ ಲೋಕಸಭಾ ಚುನಾವಣೆಗೆ ಪ್ರತ್ಯೇಕ ಮೈತ್ರಿಕೂಟವನ್ನು ಮುನ್ನಡೆಸಲಿದೆ ಎಂದು ಎಐಎಡಿಎಂಕೆ ಹೇಳಿಕೊಂಡಿದೆ.

ಕೃಷ್ಣಗಿರಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಎಐಎಡಿಎಂಕೆ ಹಿರಿಯ ನಾಯಕ ಕೆಪಿ ಮುನುಸಾಮಿ, ಬಿಜೆಪಿ ರಾಜ್ಯಾಧ್ಯಕ್ಷ ಕೆ.ಅಣ್ಣಾಮಲೈ ಅವರನ್ನು ಪದಚ್ಯುತಗೊಳಿಸುವಂತೆ ಪಕ್ಷ ಕೇಳಿಲ್ಲ ಎಂದು ಸ್ಪಷ್ಟಪಡಿಸಿದರು.

“ಎಐಎಡಿಎಂಕೆಯಂತಹ ದೊಡ್ಡ ಪಕ್ಷವು ಮತ್ತೊಂದು ಪಕ್ಷದ ರಾಜ್ಯಾಧ್ಯಕ್ಷರನ್ನು ಪದಚ್ಯುತಗೊಳಿಸಲು ಪ್ರಯತ್ನಿಸುತ್ತದೆಯೇ ಎಂದು ಕೇಳುವುದು ಸಹ ಬಾಲಿಶವಾಗಿದೆ. ನಾವು ಎಂದಿಗೂ ಅಂತಹ ತಪ್ಪನ್ನು ಮಾಡುವುದಿಲ್ಲ” ಎಂದು ಮುನುಸಾಮಿ ಹೇಳಿದರು.

ಇನ್ನೊಂದು ಪಕ್ಷ ಹೇಗೆ ಕೆಲಸ ಮಾಡಬೇಕು ಎಂದು ಹೇಳಲು ನಾವು ಅಸಂಸ್ಕೃತ ನಾಯಕರಲ್ಲ. ಎಐಎಡಿಎಂಕೆ ಅಂತಹ ಪಕ್ಷವಲ್ಲ ಎಂದು ಮುನುಸಾಮಿ ಸೇರಿಸಿದರು.

ಇದನ್ನೂ ಓದಿ:Odi World Cup; ಆಸೀಸ್ ಗೆ ಸಂಕಷ್ಟ; ತಂಡದಿಂದ ಇಬ್ಬರು ಆಲ್ ರೌಂಡರ್ ಗಳು ಬಹುತೇಕ ಔಟ್

ನಂತರ ಎನ್‌ಡಿಎ ಸೇರುವ ಕುರಿತ ಪ್ರಶ್ನೆಗಳಿಗೆ ಪ್ರತಿಕ್ರಿಯಿಸಿದ ಮುನುಸಾಮಿ, “ಸ್ಟಾಲಿನ್ ಮತ್ತು ಅವರ ಪುತ್ರ ಉದಯನಿಧಿ ಇದೊಂದು ನಾಟಕ ಎಂದು ಹೇಳುತ್ತಿದ್ದಾರೆ, ನಾವು ಬಿಜೆಪಿಯೊಂದಿಗೆ ಸಂಬಂಧವನ್ನು ಮುರಿದ ನಂತರ ಅವರು ಎದುರಿಸುತ್ತಿರುವ ಭಯದಿಂದ ಅವರು ಈ ರೀತಿ ಮಾತನಾಡುತ್ತಿದ್ದಾರೆ” ಎಂದು ಹೇಳಿದರು.

ಯಾವುದೇ ಹಂತದಲ್ಲೂ ನಾವು ಎನ್‌ಡಿಎ ಸೇರುವುದಿಲ್ಲ ಆದರೆ ಎಡಪಾಡಿ ಕೆ ಪಳನಿಸಾಮಿ ನೇತೃತ್ವದ ಹೊಸ ಮೈತ್ರಿಕೂಟವನ್ನು ರಚಿಸುತ್ತೇವೆ ಎಂದು ಮುನುಸಾಮಿ ಸ್ಪಷ್ಟಪಡಿಸಿದ್ದಾರೆ.