ಸೇನಾ ಸಿಬಂದಿಯನ್ನು ಹಿಂದಕ್ಕೆ ಕರೆಸಿಕೊಳ್ಳಿ: ಭಾರತಕ್ಕೆ ಮಾಲ್ಡೀವ್ಸ್‌

Team Udayavani, Aug 11, 2018, 7:50 AM IST

ಹೊಸದಿಲ್ಲಿ: ಈಗಾಗಲೇ ಹಳಸಿರುವ ಭಾರತ ಮತ್ತು ಮಾಲ್ಡೀವ್ಸ್‌ನ ಸಂಬಂಧಕ್ಕೆ ಇನ್ನೊಂದು ಅಡ್ಡಿ ಎದುರಾಗಿದೆ. ಮಾಲ್ಡೀವ್ಸ್‌ನಲ್ಲಿರುವ ಭಾರತೀಯ ಹೆಲಿಕಾಪ್ಟರುಗಳು ಮತ್ತು ಅದಕ್ಕೆ ನಿಯೋಜಿಸಲಾಗಿರುವ ಸಿಬಂದಿಯನ್ನು ಭಾರತ ವಾಪಸ್‌ ಕರೆಸಿಕೊಳ್ಳಬೇಕು ಎಂದು ಮಾಲ್ಡೀವ್ಸ್‌ ಅಧ್ಯಕ್ಷ ಅಬ್ದುಲ್ಲಾ ಯಮೀನ್‌ ಹೇಳಿದ್ದಾರೆ. ತುರ್ತು ಸೇನಾ ವೈದ್ಯಕೀಯ ನೆರವಿಗಾಗಿ ಎರಡು ಹೆಲಿಕಾಪ್ಟರ್‌ ಮತ್ತು ಅದಕ್ಕೆ ಅಗತ್ಯ ಸಿಬಂದಿಯನ್ನು ಹಲವು ವರ್ಷಗಳಿಂದಲೇ ಮಾಲ್ಡೀವ್ಸ್‌ನಲ್ಲಿ ನಿಯೋಜಿಸಲಾಗಿದ್ದು, ಜೂನ್‌ನಲ್ಲಿ ಒಪ್ಪಂದ ಮುಗಿದಿದೆ. ಆದರೆ ಒಪ್ಪಂದವನ್ನು ಮಾಲ್ಡೀವ್ಸ್‌ ನವೀಕರಿಸಿಲ್ಲ.

ಕಳೆದ ವರ್ಷ ಮಾಲ್ಡೀವ್ಸ್‌ನಲ್ಲಿ ನಡೆದ ರಾಜಕೀಯ ಸ್ಥಿತ್ಯಂತರದ ವೇಳೆ ಯಮೀನ್‌ಗೆ ಭಾರತ ಬೆಂಬಲ ನೀಡಿರ ಲಿಲ್ಲ. ಚೀನ ಬೆಂಬಲಿತ ಯಮೀನ್‌ ದೇಶದಲ್ಲಿ ತುರ್ತುಪರಿಸ್ಥಿತಿ ಹೇರಿ, ತನ್ನ ವಿರೋಧಿಗಳನ್ನು ಜೈಲಿ ಗಟ್ಟಿದ್ದರು. ಮಾಲ್ಡೀವ್ಸ್‌ಗೆ ಕೋಟ್ಯಂತರ ರೂ. ಸಾಲ ನೀಡಿರುವ ಚೀನ ರಸ್ತೆ, ಸೇತುವೆ, ವಿಮಾನ ನಿಲ್ದಾಣ ಸೇರಿದಂತೆ ಹಲವು ಮೂಲಸೌಕರ್ಯ ಅಭಿವೃದ್ಧಿಯಲ್ಲಿ ತೊಡ ಗಿಸಿಕೊಂಡಿದ್ದು, ಭಾರತದ ಪ್ರಭಾವ ಇಲ್ಲಿ ಕುಗ್ಗಿದೆ.