ಮಸೂದೆ ಪಾಸಾದ ಮರುದಿನವೇ ಉ.ಪ್ರ. ಮಹಿಳೆಗೆ ತ್ರಿವಳಿ ತಲಾಕ್‌

Team Udayavani, Dec 29, 2017, 11:16 AM IST

ಹೊಸದಿಲ್ಲಿ : 2017ರ ಮುಸ್ಲಿಂ ಮಹಿಳೆಯರ ವೈವಾಹಿಕ ಹಕ್ಕುಗಳ ರಕ್ಷಣೆ ಮಸೂದೆಯನ್ನು ಲೋಕಸಭೆ ನಿನ್ನೆ ಗುರುವಾರ ಪಾಸು ಮಾಡಿದ ಮರುದಿನವೇ ಉತ್ತರ ಪ್ರದೇಶದ ಮೊರಾದಾಬಾದ್‌ ನಿವಾಸಿಯಾಗಿರುವ ಮಹಿಳೆಯೋರ್ವರು ವರದಕ್ಷಿಣೆ ಬೇಡಿಕೆಗಾಗಿ ತನಗೆ ತನ್ನ ಪತಿ ತ್ರಿವಳಿ ತಲಾಕ್‌ ನೀಡಿದ್ದಾರೆ ಎಂದು ರೋದಿಸಿದ್ದಾರೆ. 

ತ್ರಿವಳಿ ತಲಾಕ್‌ ಸಂತ್ರಸ್ತೆಯಾಗಿರುವ ಮಹಿಳೆಯರನ್ನು ವಿರಾಶಾ ಎಂದು ಗುರುತಿಸಲಾಗಿದೆ. ಆಕೆಯ ಪತಿ ಆಕೆಗೆ ಹೆಚ್ಚಿನ ವರದಕ್ಷಿಣೆಯಾಗಿ 10 ಲಕ್ಷ ರೂ. ಆಗ್ರಹಿಸಿ ತ್ರಿವಳಿ ತಲಾಕ್‌ ನೀಡಿದ್ದಾನೆ ಎಂದು ವರದಿಯಾಗಿದೆ.

ಲೋಕಸಭೆಯಲ್ಲಿ ನಿನ್ನೆ ಗುರುವಾರ ಪಾಸಾದ ಮುಸ್ಲಿಂ ಮಹಿಳೆಯರ ವೈವಾಹಿಕ ಹಕ್ಕುಗಳ ರಕ್ಷಣಾ ಮಸೂದೆಯು ಯಾವುದೇ ರೂಪದಲ್ಲಿ ಮುಸ್ಲಿಂ ಮಹಿಳೆಗೆ ಆಕೆಯ ಪತಿ ತ್ರಿವಳಿ ತಲಾಕ್‌ ನೀಡುವುದನ್ನು ಅಪರಾಧೀಕರಿಸುತ್ತದೆ ಮತ್ತು ಹಾಗೆ ತ್ರಿವಳಿ ತಲಾಕ್‌ ನೀಡಿದಾತನಿಗೆ ಮೂರು ವರ್ಷಗಳ ಜೈಲು ಶಿಕ್ಷೆಯನ್ನು ವಿಧಿಸುತ್ತದೆ.

ಈ ಮಸೂದೆಗೆ ಲೋಕಸಭೆಯಲ್ಲಿ ನಿನ್ನೆ ಕಾಂಗ್ರೆಸ್‌ ಕೂಡ ಬೆಂಬಲ ನೀಡಿತ್ತು. ಸರಕಾರ ಈ ಮಸೂದೆಯನ್ನು ಐತಿಹಾಸಿಕ ಎಂದು ವರ್ಣಿಸಿರುವ ನಡುವೆಯೇ ಮುಸ್ಲಿಮರಲ್ಲಿನ ಒಂದು ವರ್ಗ ಇದನ್ನು ವಿರೋಧಿಸಿದೆ.