Fraud: ಐಷಾರಾಮಿ ಹೋಟೆಲ್ ಗೆ 6 ಲಕ್ಷ ಪಂಗನಾಮ ಹಾಕಿದ ಮಹಿಳೆಯ ಖಾತೆಯಲ್ಲಿದ್ದದ್ದು ಬರೇ 41ರೂ.

Team Udayavani, Jan 31, 2024, 10:10 AM IST

ನವದೆಹಲಿ: ನವದೆಹಲಿಯ ಏರೋಸಿಟಿಯಲ್ಲಿರುವ ಐಷಾರಾಮಿ ಹೋಟೆಲ್ ನಲ್ಲಿ ಸುಮಾರು 15 ದಿನಗಳ ಕಾಲ ತಂಗಿ ಐಷಾರಾಮಿ ಜೀವನ ನಡೆಸಿ ಹೋಟೆಲ್ ಗೆ ಸುಮಾರು ಆರು ಲಕ್ಷ ರೂ. ಪಂಗನಾಮ ಹಾಕಿದ ಮಹಿಳೆಯನ್ನು ಪೊಲೀಸರು ವಶಕ್ಕೆ ಪಡೆದುಕೊಂಡ ಘಟನೆ ಬೆಳಕಿಗೆ ಬಂದಿದೆ.

ಆಂಧ್ರಪ್ರದೇಶದ ಝಾನ್ಸಿ ರಾಣಿ ಸ್ಯಾಮ್ಯುಯೆಲ್ ಎಂಬ ಮಹಿಳೆ ದೆಹಲಿಯ ಏರೋಸಿಟಿಯಲ್ಲಿರುವ ಐಷಾರಾಮಿ ಹೋಟೆಲ್‌ ಪುಲ್‌ಮನ್ ನಲ್ಲಿ ನಕಲಿ ದಾಖಲೆ ತೋರಿಸಿ ಡಿಸೆಂಬರ್ 13 ರಂದು 15 ದಿನಗಳ ಕಾಲ ಹೋಟೆಲ್ ಬುಕ್ ಮಾಡಿದ್ದರು. ಮಹಿಳೆ ಹದಿನೈದು ದಿನಗಳ ಅಲ್ಲಿನ ಸೇವೆಗಳನ್ನು ಪಡೆದುಕೊಂಡು ಐಷಾರಾಮಿ ಜೀವನ ನಡೆಸಿದ್ದಾರೆ ಅಲ್ಲದೆ ಕೇವಲ ಹದಿನೈದು ದಿನಕ್ಕೆ ಆಕೆಯ ಹೋಟೆಲ್ ಬಿಲ್ ಆರು ಲಕ್ಷಗಳಾಗಿತ್ತು ಇದರಲ್ಲಿ ಆಕೆಯ ಸ್ಪಾ ಸೇವೆಗಳನ್ನು ಪಡೆದುಕೊಂಡಿದ್ದರು ಅದರ ಮೊತ್ತವೇ ಎರಡು ಲಕ್ಷಕ್ಕೂ ಹೆಚ್ಚು ಆಗಿತ್ತು ಎನ್ನಲಾಗಿದೆ.

ಹೋಟೆಲ್ ಸಿಬ್ಬಂದಿ ಪ್ರಕಾರ, ಸ್ಪಾ ಸೌಲಭ್ಯದಲ್ಲಿ 2.11 ಲಕ್ಷ ರೂಪಾಯಿ ಮೌಲ್ಯದ ಸೇವೆಗಳನ್ನು ಪಡೆಯಲು ಸ್ಯಾಮ್ಯುಯೆಲ್ ಇಶಾ ಡೇವ್ ಒಬ್ಬರ ನಕಲಿ ಗುರುತಿನ ಚೀಟಿಯನ್ನು ತೋರಿಸಿದರು.

ಹೋಟೆಲ್ ಸಿಬಂದಿ ಹೋಟೆಲ್ ಬಿಲ್ ಪಾವತಿಸುವಂತೆ ಕೇಳಿದಾಗ ಸ್ಯಾಮ್ಯುಯೆಲ್ ಅವರು ಐಸಿಐಸಿಐ ಬ್ಯಾಂಕ್ ಯುಪಿಐ ಅಪ್ಲಿಕೇಶನ್‌ನಲ್ಲಿ ವಹಿವಾಟು ನಡೆಸುತ್ತಿರುವುದನ್ನು ಹೋಟೆಲ್ ಸಿಬ್ಬಂದಿಗೆ ತೋರಿಸಿದ್ದಾರೆ. ಆದರೆ ಹೋಟೆಲ್ ಗೆ ಆಕೆಯ ಬಿಲ್ ಮೊತ್ತ ಬಂದಿರಲಿಲ್ಲ ಈ ನಡುವೆ ಸಿಬಂದಿ ಮಹಿಳೆ ಬಳಿ ಬಿಲ್ ಪಾವತಿಯ ಬಗ್ಗೆ ವಿಚಾರಿಸಿದ್ದಾರೆ ಇದರಿಂದ ಸಿಟ್ಟಿಗೆದ್ದ ಮಹಿಳೆ ಹೋಟೆಲ್ ಸಿಬಂದಿ ಬಳಿ ಜಗಳಕ್ಕೆ ನಿಂತಿದ್ದಾಳೆ ಇದರಿಂದ ಮಹಿಳೆಯ ಮೇಲೆ ಸಂಶಯಗೊಂಡ ಸಿಬಂದಿ ಮಹಿಳೆ ವಿರುದ್ಧ ಪೊಲೀಸರಿಗೆ ದೂರು ನೀಡಿದ್ದಾರೆ.

ಇತ್ತ ದೂರು ದಾಖಲಾಗುತ್ತಿದ್ದಂತೆ ಮಹಿಳೆ ಹೊಟೇಲ್ ಗೆ ಪಂಗನಾಮ ಹಾಕಿ ಜಾಗ ಖಾಲಿ ಮಾಡುವ ವೇಳೆ ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದಾರೆ.

ತನಿಖೆಯ ವೇಳೆ ಮಹಿಳೆಯ ಬ್ಯಾಂಕ್ ಖಾತೆಯಲ್ಲಿ ಕೇವಲ 41 ರೂಪಾಯಿ ಇರುವುದು ಪೊಲೀಸರಿಗೆ ಪತ್ತೆಯಾಗಿದೆ. ಸ್ಯಾಮ್ಯುಯೆಲ್ ಪೊಲೀಸರಿಗೆ ತಾನು ವೈದ್ಯೆ ಮತ್ತು ಆಕೆಯ ಪತಿಯೂ ವೈದ್ಯನಾಗಿದ್ದು, ನ್ಯೂಯಾರ್ಕ್‌ನಲ್ಲಿ ನೆಲೆಸಿರುವುದಾಗಿ ಹೇಳಿಕೊಂಡಿದ್ದಾರೆ ಆದರೆ ಇದನ್ನು ಪೊಲೀಸರು ಇನ್ನೂ ಖಚಿತಪಡಿಸಿಲ್ಲ ಎನ್ನಲಾಗಿದೆ.

ಇದನ್ನೂ ಓದಿ: ಎಲ್ಲಾ ಧರ್ಮೀಯರಿಗೆ ಪ್ರವೇಶ ನೀಡಲು ದೇವಾಲಯ ಪಿಕ್ನಿಕ್ ಸ್ಪಾಟ್ ಅಲ್ಲ: ಮದ್ರಾಸ್ ಹೈಕೋರ್ಟ್