ರಣಕಣದಲ್ಲೂ ಸ್ತ್ರೀ ಶಕ್ತಿ: ಫಿರಂಗಿ ಪಡೆಗೆ 5 ಮಹಿಳೆಯರ ಮೊದಲ ಬ್ಯಾಚ್‌ ಸೇರ್ಪಡೆ

Team Udayavani, Apr 30, 2023, 8:30 AM IST

ಹೊಸದಿಲ್ಲಿ: ಭಾರತೀಯ ರಕ್ಷಣ ಕ್ಷೇತ್ರದಲ್ಲಿ ಸ್ತ್ರೀ ಪಾಬಲ್ಯ ಹೆಚ್ಚಿಸುವ ಮತ್ತೂಂದು ಮಹತ್ತರ ಹೆಜ್ಜೆಗೆ ದೇಶ ಸಾಕ್ಷಿಯಾಗಿದ್ದು, ಇದೇ ಮೊದಲ ಬಾರಿಗೆ ಸೇನೆಯ ಫಿರಂಗಿ ಪಡೆಗೆ(ಆರ್ಟಿಲರಿ ರೆಜಿಮೆಂಟ್‌)ಐವರು ಮಹಿಳೆಯರ ಮೊದಲ ಬ್ಯಾಚ್‌ ಸೇರ್ಪಡೆಗೊಂಡಿದೆ. ಈ ಮೂಲಕ ದೇಶ ರಕ್ಷಣೆಗಾಗಿ ರಣರಂಗದಲ್ಲೂ ಶತ್ರುಗಳ ವಿರುದ್ಧ ಸೆಣಸಾಡಲು ಮಹಿಳೆಯರು ಕಾಲಿಟ್ಟಂತಾಗಿದೆ.

ಚೆನ್ನೈಯಲ್ಲಿರುವ ಆಫೀಸರ್ಸ್‌ ಟ್ರೈನಿಂಗ್‌ ಅಕಾಡೆಮಿಯಲ್ಲಿ ತರಬೇತಿ ಪೂರ್ಣಗೊಳಿಸಿರುವ ಲೆಫ್ಟಿನೆಂಟ್‌ ಮೆಹಕ್‌ ಸೈನಿ, ಲೆಫ್ಟಿನೆಂಟ್‌ ಸಾಕ್ಷಿ ದುಬೆ, ಲೆಫ್ಟಿನೆಂಟ್‌ ಅದಿತಿ ಯಾದವ್‌, ಲೆಫ್ಟಿನೆಂಟ್‌ ಪಿಯುಸ್‌ ಮುದ್ಗಿಲ್‌, ಲೆಫ್ಟಿನೆಂಟ್‌ ರೇಖಾ ಸಿಂಗ್‌ ಶನಿವಾರ ಸೇನೆಯ ಫಿರಂಗಿ ಪಡೆಗೆ ಸೇರ್ಪಡೆಗೊಂಡಿದ್ದಾರೆ. ಆರ್ಟಿಲ್ಲರಿ ರೆಜಿಮೆಂಟ್‌ಗೆ ಮಹಿಳಾ ಅಧಿಕಾರಿಗಳ ನೇಮಕ ಸೇನಾ ಇತಿಹಾಸದಲ್ಲಿ ಇದೇ ಮೊದಲು.

ವಿಶೇಷವೆಂದರೆ ಈ ಐವರ ಪೈಕಿ ಮೂವರನ್ನು ಭಾರತ-ಚೀನ ಗಡಿಯಲ್ಲಿನ ವಾಸ್ತವಿಕ ಗಡಿ ನಿಯಂತ್ರಣ ರೇಖೆ (ಎಲ್‌ಎಸಿ)ಬಳಿ ಇರುವ ಘಟಕ ಗಳಲ್ಲಿ ನಿಯೋಜಿಸಲಾಗಿದ್ದು, ಇನ್ನಿಬ್ಬರನ್ನು ಭಾರತ- ಪಾಕಿಸ್ಥಾನದ (ಎಲ್‌ಒಸಿ)ಗಡಿಯಲ್ಲಿ ನಿಯೋಜಿ ಸಲಾಗಿದೆ ಎಂದು ಸೇನಾ ಮೂಲಗಳು ತಿಳಿಸಿವೆ.

ಭೂತಾನ್‌ನ ಐವರು ಪುರುಷ ಕೆಡೆಟ್‌ಗಳು, 24 ಮಹಿಳಾ ಕೆಡೆಟ್‌ಗಳು ಕೂಡ ಚೆನ್ನೈಯ ಅಕಾಡೆಮಿಯಲ್ಲಿ ತರಬೇತಿ ಪೂರ್ಣಗೊಳಿಸಿ ದ್ದಾರೆ. ಶನಿವಾರ ಚೆನ್ನೈಯಲ್ಲಿ ನಡೆದ ಪಾಸಿಂಗ್‌ ಔಟ್‌ ಪರೇಡ್‌ನ‌ಲ್ಲಿ ಒಟ್ಟಾರೆ 186 ಕೆಡೆಟ್‌ಗಳು ತರಬೇತಿ ಪೂರ್ಣಗೊಳಿಸಿ ಸೇನೆಗೆ ಸೇರ್ಪಡೆ ಗೊಂಡರು. ಬಾಂಗ್ಲಾದೇಶದ ಸೇನಾ ಮುಖ್ಯಸ್ಥ ಎಸ್‌.ಎಂ.ಶಫೀಯುದ್ದೀನ್‌ ಅಹ್ಮದ್‌ ಅವರೂ ಈ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು.

ರಕ್ಷಣೆಗೆ ವಿಶೇಷ ತರಬೇತಿ
ಭಾರತೀಯ ಸೇನೆಯ ಯುದ್ಧನಿಪುಣ ವಿಭಾಗವಾ ಗಿರುವ ಆರ್ಟಿಲರಿ ರೆಜಿಮೆಂಟ್‌ನಲ್ಲಿ ಮಹಿಳಾ ಸಿಬಂದಿಗೆ ಯಾವುದೇ ಕಠಿನ ಪರಿಸ್ಥಿತಿಯನ್ನೂ ಯಶಸ್ವಿ ಯಾಗಿ ನಿಭಾಯಿಸಲು ವಿಶೇಷ ರಕ್ಷಣ ತರಬೇತಿ ನೀಡಲಾಗಿದೆ. ಈ ಪೈಕಿ ರಾಕೆಟ್‌ ನಿರ್ವಹಣೆಯೂ ಸೇರಿರಲಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಪತಿ ನೆತ್ತರಿತ್ತ ಭೂಮಿಗೆ ಈಗ ಪತ್ನಿಯಿಂದ ರಕ್ಷಣೆ!
2020ರಲ್ಲಿ ಪೂರ್ವ ಲಡಾಖ್‌ನಲ್ಲಿ ಭಾರತೀಯ ಸೇನೆ ಮತ್ತು ಚೀನ ಸೇನೆ ನಡುವೆ ನಡೆದ ಗಾಲ್ವಾನ್‌ ಸಂಘರ್ಷದಲ್ಲಿ ಹುತಾತ್ಮರಾದ ಯೋಧ ಲ್ಯಾನ್ಸ್‌ ನಾಯಕ್‌ ದೀಪಕ್‌ ಸಿಂಗ್‌ ಅವರ ಪತ್ನಿ ರೇಖಾ ಸಿಂಗ್‌ ಶನಿವಾರ ಲೆಫ್ಟಿನೆಂಟ್‌ ಆಗಿ ಭಾರತೀಯ ಸೇನೆಗೆ ಸೇರ್ಪ ಡೆಗೊಂಡಿದ್ದಾರೆ. ಯುದ್ಧ ಘಟಕವಾದ ಆರ್ಟಿಲರಿ ರೆಜಿಮೆಂಟ್‌ಗೆ ಸೇರ್ಪಡೆ ಗೊಂಡ ದೇಶದ ಮೊದಲ ಐವರು ಮಹಿಳಾ ಸಿಬಂದಿಯ ಪೈಕಿ ರೇಖಾ ಕೂಡ ಒಬ್ಬರು. ವಿಶೇಷವೆಂದರೆ ಯಾವ ನೆಲದ ಉಳಿವಿಗಾಗಿ ರೇಖಾರ ಪತಿ ಉಸಿರು ಚೆಲ್ಲಿದರೋ, ಅದೇ ಗಾಲ್ವಾನ್‌ ನೆಲದ ರಕ್ಷಣೆಗಾಗಿ ಪೂರ್ವ ಲಡಾನ್‌ನ ವಾಸ್ತವಿಕ ಗಡಿ ನಿಯಂತ್ರಣ ರೇಖೆ (ಎಲ್‌ಎಸಿ)ಯಲ್ಲಿ ರೇಖಾ ಅವರನ್ನು ನಿಯೋಜಿಸಲಾಗಿದೆ.