ರಾಹುಲ್‌ “ಚೈನೀಸ್‌ ಗಾಂಧಿ’!

Team Udayavani, Sep 1, 2018, 6:00 AM IST

ನವದೆಹಲಿ: “”ರಾಹುಲ್‌ ಗಾಂಧಿ ಚೀನಾದ ಪ್ರತಿನಿಧಿ ಎಂಬಂತೆ ನಟಿಸುತ್ತಿದ್ದಾರೆ. ಅವರಿಗೆ ಭಾರತಕ್ಕಿಂತಲೂ ಚೀನಾ ಮೇಲೆ ಹೆಚ್ಚು. ಹಾಗಾಗಿ ಪ್ರತಿಯೊಂದು ಭಾಷಣದಲ್ಲಿಯೂ ಚೀನಾ ಬಗ್ಗೆ ಪ್ರಸ್ತಾಪಿಸುತ್ತಾರೆ. ಅವರು ಮಾನಸಸರೋವರ ಯಾತ್ರೆಯ ನೆಪ ಹೇಳಿ, ನೇಪಾಳ ಮೂಲಕ ಚೀನಾಕ್ಕೆ ಹೋಗಲು ಮುಂದಾಗಿದ್ದಾರೆ” ಎಂದು ಬಿಜೆಪಿ ವಕ್ತಾರ ಸಂಬಿತ್‌ ಪಾತ್ರಾ ಆರೋಪಿಸಿದ್ದಾರೆ. ಅವರೀಗ “”ಚೈನೀಸ್‌ ಗಾಂಧಿ” ಎಂದೂ ಲೇವಡಿ ಮಾಡಿದ್ದಾರೆ.

ಶುಕ್ರವಾರ ಮಾತನಾಡಿದ ಪಾತ್ರಾ, “”ಪ್ರಜಾಪ್ರಭುತ್ವದ ಬಗ್ಗೆ ಭಾರತವು ಚೀನಾವನ್ನು ನೋಡಿ ಕಲಿತುಕೊಳ್ಳಬೇಕೆಂದು ರಾಹುಲ್‌ ಹೇಳುತ್ತಾರೆ. ಅದ್ಯಾಕೆ ಅವರಿಗೆ ಚೀನಾ ಮೇಲೆ ಅಪಾರ ಪ್ರೀತಿ? ರಾಹುಲ್‌ ನೇಪಾಳ ಮಾರ್ಗವಾಗಿ ಚೀನಾಕ್ಕೆ ತೆರಳುತ್ತಿದ್ದಾರೆ. ಬೀಜಿಂಗ್‌ನಲ್ಲಿ ಅವರು ಯಾರನ್ನು ಭೇಟಿ ಮಾಡಲು ತೆರಳುತ್ತಿದ್ದಾರೆ” ಎಂದು ಪ್ರಶ್ನಿಸಿದ್ದಾರೆ.  

“”ನೇಪಾಳ ತಲುಪಿದ “ಶಿವಭಕ್ತ’: ರಾಹುಲ್‌ ಶುಕ್ರವಾರ ಯಾತ್ರೆ ಆರಂಭಿಸಿದ್ದು, ನೇಪಾಳ ತಲುಪಿದ್ದಾರೆ. 12 ದಿನಗಳ ಯಾತ್ರೆಯಲ್ಲಿ ರಾಹುಲ್‌ ಪಾಲ್ಗೊಳ್ಳಲಿದ್ದಾರೆ. 

ಪೈಲಟ್‌ನದ್ದೇ ತಪ್ಪು
ಕರ್ನಾಟಕದ ಚುನಾವಣೆ ಸಂದರ್ಭದಲ್ಲಿ ಏ.26ರಂದು ಹುಬ್ಬಳ್ಳಿಯಲ್ಲಿ ರಾಹುಲ್‌ ಅವರಿದ್ದ ವಿಮಾನದಲ್ಲಿ ದೋಷ ಕಾಣಿಸಿಕೊಂಡ ಪ್ರಕರಣ ಸಂಬಂಧ ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (ಡಿಜಿಸಿಎ) ಸಲ್ಲಿಸಿರುವ ತನಿಖಾ ವರದಿಯ ಮಾಹಿತಿ ಹೊರಬಿದ್ದಿದೆ. “ವಿಮಾನ ಆಟೋಪೈಲಟ್‌ ಮೋಡ್‌ನ‌ಲ್ಲಿದ್ದಾಗ ಉಂಟಾದ ದೋಷವೇ ಅಂದಿನ ಘಟನೆಗೆ ಕಾರಣ. ಆದರೆ, ದೋಷ ಕಂಡುಬಂದ ಕೂಡಲೇ ಪೈಲಟ್‌ ಅದನ್ನು ಸರಿಪಡಿಸಲಿಲ್ಲ. ಎಚ್ಚರಿಕೆ ಸಂದೇಶ ಬಂದ 15 ಸೆಕೆಂಡುಗಳ ಬಳಿಕ ಪೈಲಟ್‌ ಕ್ರಮ ಕೈಗೊಂಡಿದ್ದು, ಅವರು ಮಾಡಿದ ವಿಳಂಬವೇ ಘಟನೆಗೆ ಕಾರಣ. ನಂತರ ವಿಮಾನವನ್ನು ನಿಯಂತ್ರಣಕ್ಕೆ ತರಲು ಪೈಲಟ್‌ಗೆ 24 ಸೆಕೆಂಡುಗಳೇ ಬೇಕಾಯಿತು ಆದರೆ, ಇದರಲ್ಲಿ ಯಾವುದೇ ಸಂಚು ಇಲ್ಲ’ ಎಂದು ವರದಿ ತಿಳಿಸಿದೆ. ಜತೆಗೆ, ಅದಕ್ಕೂ ಮೊದಲು ವಿಮಾನದಲ್ಲಿ ಯಾವುದೇ ಲೋಪವಾಗಲೀ, ತಾಂತ್ರಿಕ ದೋಷವಾಗಲೀ ಇರಲಿಲ್ಲ ಎಂದಿದೆ.