ರಾಜ್ಯದಲ್ಲಿ 6 ಸಾವಿರ ಮಕ್ಕಳಿಗೆ ಸೋಂಕು

Team Udayavani, Jul 4, 2020, 5:27 PM IST

ಸಾಂದರ್ಭಿಕ ಚಿತ್ರ

ಮುಂಬಯಿ, ಜು. 3: ಒಟ್ಟು ಕೋವಿಡ್‌ -19 ಪ್ರಕರಣಗಳಲ್ಲಿ ಅಪ್ರಾಪ್ತ ವಯಸ್ಕರು ಶೇ. 1 ಕ್ಕಿಂತ ಕಡಿಮೆ ಇದ್ದರೂ ಮಾರ್ಚ್ ನಿಂದ ಮಹಾರಾಷ್ಟ್ರಾದ್ಯಂತ 6,000 ಮತ್ತು ಮುಂಬಯಿಯಲ್ಲಿ 1,311 ಮಕ್ಕಳು ಸೋಂಕಿಗೆ ಒಳಗಾಗಿದ್ದಾರೆ ಎಂದು ಮುಂಬಯಿ ಮಹಾನಗರ ಪಾಲಿಕೆಯ ಮೂಲಗಳು ತಿಳಿಸಿವೆ.

ಏಳು ಮಕ್ಕಳು ಸೋಂಕಿಗೆ ಬಲಿ :  ಬಿಎಂಸಿ ಒದಗಿಸಿದ ದತ್ತಾಂಶವು ಈ ಪ್ರಕರಣಗಳಲ್ಲಿ ಶೇ. 54ರಷ್ಟು ಬಾಲಕರಿದ್ದರೆ ಮತ್ತು ಶೇ. 46ರಷ್ಟು 10 ವರ್ಷದೊಳಗಿನ ಬಾಲಕಿಯರಿದ್ದಾರೆ ಎಂದು ತೋರಿಸುತ್ತದೆ. ಇಲ್ಲಿಯವರೆಗೆ ಏಳು ಅಪ್ರಾಪ್ತರು ಸೋಂಕಿನಿಂದ ಸಾವನ್ನಪ್ಪಿದ್ದಾರೆ. ಕಡಿಮೆ ರೋಗನಿರೋಧಕ ಶಕ್ತಿ ಮತ್ತು ಕೊಮೊರ್ಬಿಡಿಟಿ ಹೊಂದಿರುವ ಮಕ್ಕಳು ವಿಶೇಷವಾಗಿ ಸೋಂಕಿಗೆ ಗುರಿಯಾಗಬಹುದು ಎಂದು ವೈದ್ಯರು ಹೇಳಿದ್ದಾರೆ.

ಸೂರ್ಯ ಹೆರಿಗೆ ಆಸ್ಪತ್ರೆಯ ಟ್ರಸ್ಟಿ ಡಾ| ಭೂಪೇಂದ್ರ ಅವಸ್ಥಿ ಅವರು ಮಾತನಾಡು, ಮಕ್ಕಳಲ್ಲಿ ಸೋಂಕು ಕಂಡುಹಿಡಿಯುವುದು ಸವಾಲಿನ ಕೆಲಸವಾಗಿದೆ. ಏಕೆಂದರೆ ವರದಿಯಾದ ಶೇ. 85ರಷ್ಟು ಪ್ರಕರಣಗಳು ಲಕ್ಷಣರಹಿತವಾಗಿವೆ. ಕೇವಲ ಶೇ. 10ರಷ್ಟು ಮಕ್ಕಳು ಮಾತ್ರ ಕೆಮ್ಮು ಮತ್ತು ಜ್ವರದಂತಹ ಲಕ್ಷಣಗಳನ್ನು ಹೊಂದಿದ್ದಾರೆ. ಮಕ್ಕಳಲ್ಲಿ ನಿಖರವಾದ ರೋಗಲಕ್ಷಣಗಳು ನಮಗೆ ಇನ್ನೂ ತಿಳಿದಿಲ್ಲ ಎಂದು ಹೇಳಿದ್ದಾರೆ.

ರಾಜ್ಯ ಆರೋಗ್ಯ ಇಲಾಖೆ ಮೇ ಮಧ್ಯದಲ್ಲಿ ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿಗೆ (ಐಸಿಎಂಆರ್‌) ಅಪ್ರಾಪ್ತ ವಯಸ್ಕರಲ್ಲಿ ಕೋವಿಡ್‌ -19 ಕುರಿತ ವರದಿ ಪ್ರಕಾರ, ನವಜಾತ ಶಿಶುಗಳಿಗೆ ಸೋಂಕು ತಮ್ಮ ಪಾಸಿಟಿವ್‌ ತಾಯಂದಿರಿಂದ ಅಥವಾ ಆಸ್ಪತ್ರೆಯಲ್ಲಿ ಪ್ರಸರಣವಾಗುತ್ತದೆ ಎಂಬ ಊಹಾಪೋಹಗಳಿವೆ ಎಂದಿದೆ.

ಮಕ್ಕಳಲ್ಲಿ ಶೇ. 1ರಷ್ಟು ಪ್ರಕರಣಗಳು :  ಮಕ್ಕಳಲ್ಲಿ ಕೋವಿಡ್‌ -19 ಪ್ರಕರಣಗಳು ಒಟ್ಟು ಪ್ರಕರಣಗಳ ಶೇ. 1ರಷ್ಟಿದೆ. ಅವರ ಸಹಜ ರೋಗನಿರೋಧಕ ಶಕ್ತಿ ಮತ್ತು ಆರೋಗ್ಯಕರ ಶ್ವಾಸಕೋಶದಿಂದಾಗಿ ವಯಸ್ಕರಿಗಿಂತ ಚೇತರಿಕೆ ಪ್ರಮಾಣ ಹೆಚ್ಚಾಗಿದೆ ಎಂದು ರಾಜ್ಯ ಕೋವಿಡ್‌ -19 ಕಣ್ಗಾವಲು ಅಧಿಕಾರಿ ಡಾ| ಪ್ರದೀಪ್‌ ಅವಟೆ ಹೇಳಿದರು.

ವರದಿಯಾದ ಕೆಲವು ಪ್ರಕರಣಗಳಲ್ಲಿ ಮಕ್ಕಳಲ್ಲಿ ಕೋವಿಡ್ ಇದೇಯೇ ಎಂಬ ಪ್ರಶ್ನೆಗಳು ಮೂಡುತ್ತಿವೆ. ಸುಮಾರು ಶೇ. 5ರಷ್ಟು ಮಕ್ಕಳಿಗೆ ಮಾತ್ರ ತೀವ್ರ ನಿಗಾ ಘಟಕಗಳಲ್ಲಿ (ಐಸಿಯು) ಚಿಕಿತ್ಸೆಯ ಅಗತ್ಯವಿರುತ್ತದೆ. ಮಕ್ಕಳು ಇತರ ವಯಸ್ಕರಂತೆ ರೋಗಲಕ್ಷಣಗಳನ್ನು ತೋರಿಸುವುದರಿಂದ ಯಾವುದೇ ಚಿಕಿತ್ಸೆ ಇಲ್ಲ ಎಂದು ಸೂರ್ಯ ಹೆರಿಗೆ ಆಸ್ಪತ್ರೆಯ ಟ್ರಸ್ಟಿ ಡಾ| ಭೂಪೇಂದ್ರ ಅವಸ್ಥಿ ಅವರು ಹೇಳಿದ್ದಾರೆ.

ಕವಾಸಕಿ ಕಾಯಿಲೆಯ ರೋಗಲಕ್ಷಣ ಇತ್ತೀಚೆಗೆ ನಗರದ ಕೆಲವು ಕೋವಿಡ್‌ ಪಾಸಿಟಿವ್‌ ಮಕ್ಕಳು ಕವಾಸಕಿ ಕಾಯಿಲೆಯಂತೆಯೇ ರೋಗಲಕ್ಷಣಗಳನ್ನು ಪ್ರದರ್ಶಿಸುತ್ತಿದ್ದಾರೆ. ಇದು ಕೆಲವು ರಕ್ತನಾಳಗಳಲ್ಲಿ ಉರಿಯೂತವನ್ನು ಉಂಟುಮಾಡುತ್ತದೆ ಮತ್ತು ಪರಿಧಮನಿಯ ಅಪಧಮನಿಗಳಿಗೆ ಶಾಶ್ವತ ಹಾನಿಯನ್ನುಂಟುಮಾಡುತ್ತದೆ. ಕವಾಸಕಿ ಕಾಯಿಲೆ ಸಾಮಾನ್ಯವಾಗಿ ಐದು ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಲ್ಲಿ ಕಂಡುಬರುತ್ತದೆ ಮತ್ತು ಆರಂಭಿಕ ಲಕ್ಷಣಗಳಾಗಿ ದದ್ದು ಮತ್ತು ಜ್ವರ ಕಂಡುಬರುತ್ತದೆ. ಆದರೆ ಇದುವರೆಗೂ ಯಾವುದೇ ದೃಢಪಡಿಸಿದ ಪ್ರಕರಣವನ್ನು ಗುರುತಿಸಲಾಗಿಲ್ಲ ಎಂದು ಡಾ| ಅವಸ್ಥಿ ಅವರು ಹೇಳಿದ್ದಾರೆ.