ಅರುಣೋದಯ ಕಲಾನಿಕೇತನ: 59ನೇ ವಾರ್ಷಿಕೋತ್ಸವ

Team Udayavani, Dec 3, 2017, 4:52 PM IST

ಮುಂಬಯಿ: ಭರತನಾಟ್ಯದ ಮೂಲಕ ಮಕ್ಕಳಿಗೆ ಸಂಸ್ಕೃತಿ, ಸಂಸ್ಕಾರಗಳ ಅರಿವನ್ನು ಮೂಡಿಸುವಲ್ಲಿ ಗುರು ಮೀನಾಕ್ಷೀ ರಾಜು ಶ್ರೀಯಾನ್‌ ಅವರ ನೇತೃತ್ವದ ಅರುಣೋದಯ ಕಲಾನಿಕೇತನದ ಕೊಡುಗೆ ಅಪಾರವಾಗಿದೆ. ಅವರು ಪರಂಪಾರಿಕ ಕಲೆಯಾಗಿರುವ ಭರತನಾಟ್ಯವನ್ನು ಇಂದಿನ ಮಕ್ಕಳಿಗೆ ದಾರೆ ಎರೆಯುತ್ತಿರುವುದಲ್ಲದೆ ತಂದೆ ಗುರು ಎಂ. ಎನ್‌. ಸುವರ್ಣ ಅವರ ಕನಸನ್ನು ನನಸಾಗಿಸುವಲ್ಲಿ ಹಗಲಿರುಳು ಶ್ರಮಿಸುತ್ತಿದ್ದಾರೆ. ಮಕ್ಕಳಿಗೆ ಶ್ರದ್ಧೆ, ಏಕಾಗ್ರತೆ, ಸಮಯ ಪಾಲನೆಯನ್ನು ಭರತನಾಟ್ಯವು ಕಲಿಸಿಕೊಡುತ್ತದೆ. ಮನುಷ್ಯನಾಗಿ ಹುಟ್ಟಿದ ಪ್ರತಿಯೊಬ್ಬರಿಗೂ ಒಂದೊಂದು ಪ್ರತಿಭೆ ಇದ್ದೆ ಇರುತ್ತದೆ. ಮಕ್ಕಳ ಅಂತಹ ಪ್ರತಿಭೆಯನ್ನು ಗುರುತಿಸಿ ಅವರ ಅಭಿರುಚಿಗೆ ಪೂರಕವಾಗಿ ಅವರನ್ನು ಬೆಳೆಸಿದಾಗ ಆದರ್ಶ ಪ್ರಜೆಗಳಾಗಿ ಬಾಳಲು ಸಾಧ್ಯ. ಮೀನಾಕ್ಷೀ ರಾಜು ಶ್ರೀಯಾನ್‌ ಅವರ ಗರಡಿಯಲ್ಲಿ ಸಾವಿರಾರು ವಿದ್ಯಾರ್ಥಿಗಳು ಪಳಗಿ ಇಂದು ಸುಸಂಸ್ಕೃತ ಬದುಕನ್ನು ಕಟ್ಟಿಕೊಂಡಿರುವುದು ಅಭಿಮಾನದ ಸಂಗತಿಯಾಗಿದೆ ಎಂದು ಬಿಲ್ಲವ ಛೇಂಬರ್‌ ಆಫ್‌ ಕಾಮರ್ಸ್‌ ಇದರ ಕಾರ್ಯಾಧ್ಯಕ್ಷ ಎನ್‌. ಟಿ. ಪೂಜಾರಿ ಇವರು ನುಡಿದರು.

ಡಿ. 1 ರಂದು ದಾದರ್‌ ಪಶ್ಚಿಮದ ವೀರ ಸಾವರ್ಕರ್‌ ಸ್ಮಾರಕ ಸಭಾಗೃಹದಲ್ಲಿ ಜರಗಿದ ಅರುಣೋದಯ ಕಲಾನಿಕೇತನ ಮುಂಬಯಿ ಇದರ 59 ನೇ ವಾರ್ಷಿಕೋತ್ಸವ ಸಂಭ್ರಮದಲ್ಲಿ ಮುಖ್ಯ ಅತಿಥಿಯಾಗಿ ಉಪಸ್ಥಿತರಿದ್ದು ಮಾತನಾಡಿದ ಅವರು, ಇಲ್ಲಿ ಕಲಿತ ಮಕ್ಕಳು ಅಂತಾರಾಷ್ಟ್ರೀಯ ಮಟ್ಟನಲ್ಲಿ ಪ್ರದರ್ಶನವನ್ನು ನೀಡುತ್ತಿರುವುದು ಅಭಿನಂದನೀಯವಾಗಿದೆ. ಗುರು ಡಾ| ಮೀನಾಕ್ಷೀ ರಾಜು ಶ್ರೀಯಾನ್‌ ಅವರು ದೇಶ-ವಿದೇಶಗಳ ಪ್ರತಿಷ್ಠಿತ ವೇದಿಕೆಗಳನ್ನು ಒದಗಿಸಿಕೊಟ್ಟು ಪ್ರತಿಭಾನ್ವೇಷಣೆಗೆ ಸಹಕರಿಸುತ್ತಿದ್ದಾರೆ. ಇಂತಹ ಉಧಾತ್ತ ಭಾವನೆಯನ್ನು ಹೊಂದಿರುವ ಅರುಣೋದಯ ಕಲಾನಿಕೇತನ ಸಂಸ್ಥೆಯು ಭರತನಾಟ್ಯ ರಂಗದಲ್ಲಿ ಇನ್ನಷ್ಟು ಬೆಳೆದು ಸಾಧನೆಯನ್ನು ಮಾಡುವಂತಾಗಲಿ. ಸಂಸ್ಥೆಯ ಕಲಾಸೇವೆಗೆ ನಮ್ಮ ನಿಮ್ಮೆಲ್ಲರ ಪ್ರೋತ್ಸಾಹ, ಸಹಕಾರ ಸದಾಯಿರಲಿ ಎಂದರು.

ಅತಿಥಿಯಾಗಿ ಪಾಲ್ಗೊಂಡ ಉದ್ಯಮಿ ನಾಗರಾಜ ಪಡುಕೋಣೆ ಅವರು ಮಾತನಾಡಿ, ಗುರು ಡಾ| ಮೀನಾಕ್ಷೀ ರಾಜು ಶ್ರೀಯಾನ್‌ ಅವರು ಅವರ ತಂದೆಯವರಿಂದ ಸ್ಥಾಪಿಸಲ್ಪಟ್ಟ ಕಲಾಕೇಂದ್ರದ ಮುಖಾಂತರ ಕಳೆದ 59 ವರ್ಷಗಳಿಂದ ಕಲಾ ಸೇವೆಯನ್ನು ನಿರಂತರವಾಗಿ ಮಾಡುತ್ತಿದ್ದಾರೆ. ನೂರಾರು ಪ್ರತಿಭೆಗಳನ್ನು ದೇಶಕ್ಕೆ ಸಮರ್ಪಿಸಿದ ಹೆಗ್ಗಳಿಕೆ ಈ ಸಂಸ್ಥೆಗೆ ಸಲ್ಲುತ್ತದೆ. ಇಂದಿನ ಕಾರ್ಯಕ್ರಮವನ್ನು ಕಂಡಾಗ ಮನಸ್ಸಿಗೆ ಬಹಳಷ್ಟು ಆನಂದವಾಯಿತು. ಇಂತಹ ಕಾರ್ಯಕ್ರಮಗಳು ಸಂಸ್ಥೆಯಿಂದ ನಿರಂತರವಾಗಿ ನಡೆಯುತ್ತಿರಲಿ ಎಂದು ನುಡಿದು ಶುಭಹಾರೈಸಿದರು.

ಇನ್ನೋರ್ವ ಅತಿಥಿ ಸಾಫಲ್ಯ ಸೇವಾ ಸಂಘ ಮುಂಬಯಿ ಅಧ್ಯಕ್ಷ ಶ್ರೀನಿವಾಸ ಸಾಫಲ್ಯ ಅವರು ಮಾತನಾಡಿ, ದೇಶದ ಶ್ರೀಮಂತ ಕಲೆಯಾಗಿರುವ ಭರತನಾಟ್ಯವು ಇಂದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಬಹಳಷ್ಟು ಹೆಸರುವಾಸಿಯಾಗಿದೆ. ಅರುಣೋದಯ ಕಲಾ ನಿಕೇತನವು ಎಳೆಯ ಮಕ್ಕಳಿಗೆ ಭರತನಾಟ್ಯವನ್ನು ಕಲಿಸಿ ಅವರೊಳಗಿನ ಪ್ರತಿಭೆಯನ್ನು ಬೆಳಕಿಗೆ ತರುವ ಕಾರ್ಯವನ್ನು ಮಾಡುತ್ತಿದೆ. ಇಂತಹ ಕಾರ್ಯಗಳಿಂದ ಮಾತ್ರ ನಮ್ಮ ಸಂಸ್ಕೃತಿ, ಕಲೆ, ಸಂಸ್ಕಾರಗಳು ಉಳಿಯಲು ಸಾಧ್ಯವಿದೆ. ಸಂಸ್ಥೆಯ ಈ ಮಹಾನ್‌ ಕಾರ್ಯಕ್ಕೆ ನನ್ನ ಸಂಪೂರ್ಣ ಸಹಕಾರವಿದೆ ಎಂದು ನುಡಿದರು.

ಇನ್ನೋರ್ವ ಅತಿಥಿ ಹೈಕೋರ್ಟ್‌ನ ನ್ಯಾಯವಾದಿ ಅಡ್ವೊಕೇಟ್‌ ಸೆಲ್ವ ಕುಮಾರ್‌ ಅವರು ಮಾತನಾಡಿ, ವೈವಿಧ್ಯತೆಯಲ್ಲಿ ಏಕತೆಯನ್ನು ಬಿಂಬಿಸುವ ಇಂದಿನ ಕಾರ್ಯಕ್ರಮವು ನನ್ನ ಹೃದಯವನ್ನು ತಟ್ಟುತ್ತದೆ. ಡಾ| ಮೀನಾàಕ್ಷೀ ರಾಜು ಶ್ರೀಯಾನ್‌ ಅವರ ಕಠಿಣ ಪರಿಶ್ರಮವು ಮಕ್ಕಳ ರೂಪದಲ್ಲಿ ಕಂಡು ಬರುತ್ತಿದೆ. ಎಳೆಯ ಮಕ್ಕಳು ಭರತನಾಟ್ಯವನ್ನು ಕಲಿತಾಗ ಅವರಲ್ಲಿ ಏಕಾಗ್ರತೆ ಮೂಡುತ್ತಿದೆ. ಮಕ್ಕಳು ತಮ್ಮ ಪ್ರತಿಭೆಯನ್ನು ಇಂತಹ ವೇದಿಕೆಗಳ ಮೂಲಕ ಪ್ರಚುರಪಡಿಸಿದಾಗ ಅವರಿಗೆ ಉಜ್ವಲ ಭವಿಷ್ಯ ಲಭಿಸುತ್ತದೆ. ಕಲೆ, ಕಲಾವಿದರನ್ನು ಪ್ರೋತ್ಸಾಹಿಸುವ ಇಂತಹ ಕಾರ್ಯಕ್ರಮಗಳು ನಿರಂತರವಾಗಿ ನಡೆಯುತ್ತಿರಲಿ.

ಸಮಾರಂಭದಲ್ಲಿ ಅನಿವಾಸಿ ಭಾರತೀಯ, ಸಮಾಜ ಸೇವಕ ಬೆಹರೇನ್‌ ಸಾಧಕ ಲೀಲಾಧರ ಬೈಕಂಪಾಡಿ ಅವರನ್ನು ಗಣ್ಯರ ಸಮ್ಮುಖದಲ್ಲಿ ಶಾಲು ಹೊದೆಸಿ, ಫಲಪುಷ್ಪ, ಸ್ಮರಣಿಕೆಯೊಂದಿಗೆ ಸಮ್ಮಾನಿಸಿ ಗೌರವಿಸಲಾಯಿತು. ಸಮಾರಂಭದಲ್ಲಿ ಸಂಸ್ಥೆಯ ಬೆಸ್ಟ್‌ ಸ್ಟೂಡೆಂಟ್‌ ಅವಾರ್ಡ್‌ನ್ನು ಕು| ಚೈತ್ರಾ ಪಿ. ಶೆಟ್ಟಿ ಅವರಿಗೆ ಗಣ್ಯರು ಪ್ರದಾನಿಸಿ ಶುಭಹಾರೈಸಿದರು. ವೇದಿಕೆಯಲ್ಲಿ ಅತಿಥಿಗಳಾಗಿ ಸಮಾಜ ಸೇವಕಿ ಯಶೋದಾ ಎನ್‌. ಪೂಜಾರಿ, ಅರುಣೋದಯ ಕಲಾನಿಕೇತನದ ಟ್ರಸ್ಟಿಗಳಾದ ಸುರೇಶ್‌ ಕಾಂಚನ್‌, ಸಂಜೀವ ಸಾಲ್ಯಾನ್‌, ಗುರು ಡಾ| ಮೀನಾಕ್ಷೀ ರಾಜು ಶ್ರೀಯಾನ್‌ ಮೊದಲಾದವರು ಉಪಸ್ಥಿತರಿದ್ದರು. ಸಂಸ್ಥೆಯ ನಿರ್ದೇಶಕಿ ಗುರು ಡಾ| ಮೀನಾಕ್ಷೀ ರಾಜು ಶ್ರೀಯಾನ್‌ ಅವರು ಸಂಸ್ಥೆಯ ಸಿದ್ಧಿ-ಸಾಧನೆಗಳನ್ನು ವಿವರಿಸಿ ಕಾರ್ಯಕ್ರಮ ನಿರ್ವಹಿಸಿದರು.

ಕಾರ್ಯಕ್ರಮದ ಸಂಯೋಜಕ ರಾಜು ಶ್ರೀಯಾನ್‌ ಅವರು ಸಹಕರಿಸಿದರು. ಅತಿಥಿ-ಗಣ್ಯರುಗಳನ್ನು ಶಾಲು ಹೊದೆಸಿ, ಪುಷ್ಪಗುಚ್ಚ, ಸ್ಮರಣಿಕೆಯನ್ನಿತ್ತು ಗೌರವಿಸಲಾಯಿತು. ಅರುಣೋದಯ ಕಲಾನಿಕೇತನ ಸಂಸ್ಥೆಯ ವಿವಿಧ ಶಾಖೆಗಳ ವಿದ್ಯಾರ್ಥಿಗಳಿಂದ ವೈವಿಧ್ಯಮಯ ನೃತ್ಯಗಳು ಪ್ರದರ್ಶನಗೊಂಡಿತು.  ಹಿಮ್ಮೇಳದಲ್ಲಿ ನಟುವಗಂನಲ್ಲಿ ಡಾ| ಗುರು ಮೀನಾಕ್ಷೀ ರಾಜು ಶ್ರೀಯಾನ್‌, ಹಾಡುಗಾರಿಕೆಯಲ್ಲಿ ಶಿವ ಪ್ರಸಾದ್‌, ಮೃದಂಗದಲ್ಲಿ ಕವಿರಾಜ ಸುವರ್ಣ, ವಾಯೊಲೀನ್‌ನಲ್ಲಿ  ಸತೀಶ್‌ ಶೇಷಾದ್ರಿ ಅವರು ಸಹಕರಿಸಿದರು.

ಪ್ರತಿಷ್ಠಿತ ಅರುಣೋದಯ ಕಲಾನಿಕೇತನದ ಸಮ್ಮಾನವನ್ನು ಸ್ವೀಕರಿಸಲು ಹೆಮ್ಮೆಯಾಗುತ್ತಿದೆ. ಸಾವಿರಾರು ಮಕ್ಕಳಿಗೆ ಭರತನಾಟ್ಯ ಹಾಗೂ ಇನ್ನಿತರ ನೃತ್ಯಪ್ರಕಾರಗಳನ್ನು ಧಾರೆ ಎರೆದು ಕಲಾಸೇವೆಯಲ್ಲಿ ತೊಡಗಿರುವ ಅರುಣೋದಯ ಕಲಾನಿಕೇತನವು ವಿಶ್ವಕಲಾನಿಕೇತನವಾಗಿ ಬೆಳಗಲಿ. ಗುರು ಮೀನಾಕ್ಷೀ ರಾಜು ಶ್ರೀಯಾನ್‌ ಅವರೋರ್ವೆ ಅಪ್ರತಿಮ ಕಲಾವಿದೆಯಾಗಿದ್ದು, ಇಂದು ದೇಶ-ವಿದೇಶಗಳಲ್ಲಿ ತಮ್ಮದೇ ಆದ ಅಭಿಮಾನಿ ಬಳಗವನ್ನು ಹೊಂದಿದ್ದಾರೆ. ಅವರ ಹಲವು ಮಂದಿ ಶಿಷ್ಯೆಯಂದಿರು ವಿದೇಶಗಳಲ್ಲಿ ಭರತನಾಟ್ಯವನ್ನು ಅಲ್ಲಿನ ಮಕ್ಕಳಿಗೆ ಧಾರೆ ಎರೆಯುವ ಮಹತ್ತರ ಕಾರ್ಯವನ್ನು ಮಾಡುತ್ತಿದ್ದಾರೆ. ಇದು ಅರುಣೋದಯ ಕಲಾನಿಕೇತನದ ಹೆಗ್ಗಳಿಕೆಯಾಗಿದೆ. ಗುರು ಎಂ. ಎನ್‌. ಸುವರ್ಣ ಅವರು ಬಿತ್ತಿದ ಬೀಜವಿಂದು ಬೃಹತ್‌ ಮರವಾಗಿ ಬೆಳೆದು ಸಾವಿರಾರು ಮಕ್ಕಳಿಗೆ ನೆರಳು ನೀಡುತ್ತಿರುವುದು ಅಭಿಮಾನ ಸಂಗತಿ. ನಿಮ್ಮ ಕಲಾಸೇವೆಗೆ ನನ್ನ ಸಂಪೂರ್ಣ ಸಹಕಾರವಿದೆ 
– ಲೀಲಾಧರ ಬೈಕಂಪಾಡಿ (ಸಮ್ಮಾನಿತರು).

ಸಂಸ್ಥೆಯ ವಿವಿಧ ಶಾಖೆಗಳ ಮಕ್ಕಳಿಂದ ಪುಷ್ಪಾಂಜಲಿ, ಗಣೇಶ ಕೌತುಕಂ, ಸುಬ್ರಹ್ಮಣ್ಯ ಕೌತುಕಂ, ಅಲರಿಪು, ಜತಿಸ್ವರಂ, ಡಮರು, ದಶಾವತಾರ್‌, ಕೃತಿ, ನಟನಮದಿನಾರ್‌, ವರ್ಣ ಇನ್ನಿತರ ಭರತನಾಟ್ಯ ಪ್ರಕಾರಗಳ ನೃತ್ಯಗಳು, ವಿವಿಧ ರಾಜ್ಯಗಳ ಸಂಸ್ಕೃತಿ-ಸಂಸ್ಕಾರಗಳನ್ನು ಬಿಂಬಿಸುವ ನೃತ್ಯಗಳು ಪ್ರದರ್ಶನಗೊಂಡು, ಸಭಾಗೃಹದಲ್ಲಿ ತುಂಬಿದ್ದ ನೂರಾರು ಕಲಾಭಿಮಾನಿಗಳನ್ನು ರಂಜಿಸುವಲ್ಲಿ ಯಶಸ್ವಿಯಾಯಿತು. ಪ್ರತಿಭಾವಂತ ಮಕ್ಕಳನ್ನು ಇದೇ ಸಂದರ್ಭದಲ್ಲಿ ಸಂಸ್ಥೆಯ ವತಿಯಿಂದ ಗೌರವಿಸಲಾಯಿತು.