ಠಾಣೆಗಳಲ್ಲಿ ಸಿಸಿ ಕೆಮರಾ ಅಳವಡಿಕೆ ವಿಳಂಬ

Team Udayavani, Apr 15, 2022, 3:37 PM IST

ಮುಂಬಯಿ: ಪೊಲೀಸ್‌ ಠಾಣೆಗಳಲ್ಲಿ 2022ರ ಮಾರ್ಚ್‌ ಒಳಗೆ ಸಿಸಿ ಕೆಮರಾ ಅಳವಡಿಸಬೇಕು ಎಂದು ಮುಂಬಯಿ ಹೈಕೋರ್ಟ್‌ ಆದೇಶ ನೀಡಿತ್ತು. ಆದರೆ ನಗರದ ಒಟ್ಟು ಪೊಲೀಸ್‌ ಠಾಣೆಗಳಲ್ಲಿ ಕೆಲವು ಪೊಲೀಸ್‌ ಠಾಣೆಗಳಿಗೆ ಮಾತ್ರ ಸಿಸಿ ಕೆಮರಾವನ್ನು ಅಳವಡಿಸಲಾಗಿದೆ. ಎಲ್ಲ ಠಾಣೆಗಳಲ್ಲಿ ನಿಗದಿತ ಸಮಯದೊಳಗೆ ಸಿಸಿ ಕೆಮರಾ ಅಳವಡಿಸದೇ ಇದ್ದುದರಿಂದ ಕೋರ್ಟ್‌ ಗುತ್ತಿಗೆದಾರರನ್ನು ತರಾಟೆಗೆ ತೆಗೆದುಕೊಂಡಿದೆ.

ಸುಪ್ರೀಂ ಕೋರ್ಟ್‌ ಪ್ರಕಾರ ಪೊಲೀಸ್‌ ಠಾಣೆಗಳಲ್ಲಿ ಅದರಲ್ಲೂ ವಿಶೇಷವಾಗಿ ಡಿಟೆಕ್ಷನ್‌ ರೂಮ್‌ಗಳಲ್ಲಿ, ಲಾಕ್‌ಅಪ್‌ಗಳಲ್ಲಿ ಸಿಸಿ ಕೆಮರಾಗಳನ್ನು ಅಳವಡಿಸಬೇಕು. ಏಕೆಂದರೆ ಜನರು ಕಳ್ಳತನ ದೌರ್ಜನ್ಯದ ಕುರಿತು ದೂರು ನೀಡಲು ಬಂದಾಗ ಕೆಲವೊಮ್ಮೆ ಪೊಲೀಸರೊಂದಿಗೆ ವಾದ ಮಾಡುವ ಸಾಧ್ಯತೆಯಿರುತ್ತದೆ ಮತ್ತು ಯಾರು ದೂರು ನೀಡಲು ಬಂದಿದ್ದಾರೆ ಇವೇ ಮೊದಲಾದವುಗಳನ್ನು ವೀಕ್ಷಿಸಲು, ನಿಗಾ ಇರಿಸಲು ಪೊಲೀಸ್‌ ಠಾಣೆಯಲ್ಲಿ ಸಿಸಿ ಕೆಮರಾ ಆವಶ್ಯಕವಾಗಿದೆ. ಪೊಲೀಸ್‌ ಠಾಣೆಯ ಒಳಗೆ ಮತ್ತು ಹೊರಗೆ, ಲಾಕಪ್‌ ಮತ್ತು ಎಲ್ಲ ಕೋಣೆಯ ಒಳಗೆ ಸಿಸಿ ಕೆಮರಾಗಳನ್ನು ಅಳವಡಿಸಬೇಕು. ಸಿಸಿ ಟಿವಿ ಕಾರ್ಯನಿರ್ವಹಣೆಗೆ ನೊಡೆಲ್‌ ಅಧಿಕಾರಿಗಳನ್ನು ನೇಮಿಸಬೇಕು.

ಕೆಮರಾ ಅಳವಡಿಸುವ ಕಾರ್ಯದಲ್ಲಿ 30 ಕೆಮರಾ ಅಳವಡಿಕೆ ಪೂರ್ತಿಯಾಗಿದೆ. ಮುಂಬಯಿಯಲ್ಲಿ 94 ಪೊಲೀಸ್‌ ಠಾಣೆ ಗಳಿದ್ದು, ಸಿಸಿ ಕೆಮರಾ ಅಳವಡಿಸಲಾಗಿದೆ. ಪ್ರತೀ ಪ್ರದೇಶದಲ್ಲಿ 5ರಿಂದ 6 ಪೊಲೀಸ್‌ ಠಾಣೆಗಳಲ್ಲಿ ಮೊದಲ ಹಂತದಲ್ಲಿ ಕೆಮರಾ ಅಳವಡಿಕೆಗೆ ಆಯ್ಕೆ ಮಾಡಲಾಗಿದೆ. ಸಿಸಿ ಕೆಮರಾಗಳು ಕ್ರಿಯಾತ್ಮಕವಾಗಿದ್ದು, ಎಪ್ರಿಲ್‌ ಕೊನೆಯೊಳಗೆ ಸಿಸಿ ಕೆಮರಾ ಅಳವಡಿಕೆ ಕಾರ್ಯ ಪೂರ್ಣಗೊಳ್ಳಲಿದೆ ಎಂದು ಹಿರಿಯ ಪೊಲೀಸ್‌ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.