ದೆಹಲಿ ಕರ್ನಾಟಕ ಸಂಘ: ರಾಗಮಾಲಿಕಾ, ಹಾಸ್ಯ ಸಂಜೆ

Team Udayavani, Oct 31, 2017, 4:48 PM IST

ಮುಂಬಯಿ: ದೆಹಲಿಯ ಗಂಧರ್ವ ಕಲಾವಿದರು  ರಾಗಮಾಲಿಕಾ ಹಾಗೂ ಹಾಸ್ಯ ಸಂಜೆ ಕಾರ್ಯಕ್ರಮವನ್ನು ದೆಹಲಿ ಕರ್ನಾಟಕ ಸಂಘದ ಸಭಾಂಗಣದಲ್ಲಿ ಅ.29ರಂದು ಪ್ರಸ್ತುತಪಡಿಸಿದರು.

ಗಂಧರ್ವ ದೆಹಲಿ ಕರ್ನಾಟಕ ಸಂಘದಿಂದ ಚಿಗುರಿದ ಮೊಳಕೆ, ದೆಹಲಿ ಕರ್ನಾಟಕ ಸಂಘವು ಸುಮಾರು 5-6 ವರ್ಷಗಳಿಂದ ತಾಯಿ ಸ್ಥಾನದಲ್ಲಿ ನಿಂತು ಕಲಾವಿದರನ್ನು ಪೋಷಿಸಿ ಬೆಳೆಸುತ್ತಿದೆ. ಎಷ್ಟೋ ಜನರು ಈ ವೇದಿಕೆಯಿಂದ ಕಲಾವಿದರಾಗಿದ್ದಾರೆ, ಇದಕ್ಕೆ ಮೂಲ ಕಾರಣ ದೆಹಲಿ ಕರ್ನಾಟಕ ಸಂಘ. ನೃತ್ಯತರಬೇತಿ, ಸಂಗೀತ ತರಬೇತಿ, ನಾಟಕ ತರಬೇತಿಯನ್ನು ಕರ್ನಾಟಕ ಸಂಘದಿಂದ ಪಡೆದು ಒಂದೇ ವೇದಿಕೆ ಮೇಲೆ 150ಕ್ಕೂ ಹೆಚ್ಚು ಕಲಾವಿದರು ಹಾಡಿ ಕುಣಿದಿದ್ದಾರೆ. ಖ್ಯಾತ ಕಲಾವಿದರಾದ ಹಂಸಲೇಖ, ಟಿ. ಎಸ್‌. ನಾಗಾಭರಣ, ಬಿ. ಕೆ. ಸುಮಿತ್ರಾ ಇವರೆಲ್ಲರ ತರಬೇತಿ ಪಡೆದು ಈ ಗಂಧರ್ವ ತಂಡ, ಗಾನ ಗಂಧರ್ವ ತಂಡವಾಗಿದೆ. ಇದೇ ರೀತಿಯಲ್ಲಿ ಇನ್ನೂ ಅನೇಕ ತಂಡಗಳು ಈ ವೇದಿಕೆ ಮೂಲಕ ಪ್ರಖ್ಯಾತಿ ಪಡೆಯುತ್ತಿವೆ, ಬೆಳೆಯುತ್ತಿವೆ. ಇದಕ್ಕೆಲ್ಲಾ ಮೂಲ ಕಾರಣ ದೆಹಲಿ ಕರ್ನಾಟಕ ಸಂಘದ ಅಧ್ಯಕ್ಷರಾದ ವಸಂತ ಶೆಟ್ಟಿ ಬೆಳ್ಳಾರೆ ಮತ್ತು ಪ್ರಧಾನ ಕಾರ್ಯದರ್ಶಿ ಸಿ.ಎಂ. ನಾಗರಾಜ ಅವರು ಮತ್ತು ಪದಾಧಿಕಾರಿಗಳು.

ಸ್ಥಳೀಯ ಕಲಾವಿದರಿಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡುವ ಮೂಲಕ ಈ ದಿನ ನಾವು ಈ ವೇದಿಕೆ ಮೇಲೆ  ಈ ಕಾರ್ಯಕ್ರಮವನ್ನು ಹಮ್ಮಿಕೊಂಡಿದ್ದೇವೆ ಎಂದು ಗಂಧರ್ವ ತಂಡದ ಸಂಚಾಲಕ ರಾಜ್‌ಕುಮಾರ್‌ ಅವರು ತಮ್ಮ ಸ್ವಾಗತ ಭಾಷಣದಲ್ಲಿ ಹೇಳಿದರು.

ಈ ಕಾರ್ಯಕ್ರಮದಲ್ಲಿ ಕನ್ನಡ ಚಲನಚಿತ್ರ ರಂಗದ ಖ್ಯಾತ ಹಾಸ್ಯ ಕಲಾವಿದರಾದ ಬ್ಯಾಂಕ್‌ ಜನಾರ್ದನ,  ರೇಖಾದಾಸ್‌ ಮತ್ತು  ಎಂ.ಎನ್‌. ಸುರೇಶ್‌ ಅವರು ಹಾಸ್ಯ ಕಾರ್ಯಕ್ರಮ ನೀಡಿ ದೆಹಲಿ ಕನ್ನಡಿಗರನ್ನು ರಂಜಿಸಿದರು. ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ನವ ದೆಹಲಿಯ ಜಿಲ್ಲಾ ನ್ಯಾಯಾಧೀಶರಾದ  ಎ. ಎಸ್‌. ಜಯಚಂದ್ರ ಅವರು ವಹಿಸಿದ್ದರು.

ಭಾರತ ಸರ್ಕಾರದ ಬುಡಕಟ್ಟು ಸಚಿವಾಲಯದಲ್ಲಿ ವ್ಯವಸ್ಥಾಪಕ ನಿರ್ದೇಶಕ ರಾಗಿರುವ ರಮೇಶ್‌ ಕುಮಾರ್‌ ಗಂತ ಅವರು ದೀಪ ಬೆಳಗಿಸಿ ಉದ್ಘಾಟಿಸಿ ಮಾತನಾಡಿ, ರಾಜಧಾನಿಯಲ್ಲಿ ಕನ್ನಡದ ಕಂಪು ಹರಡಲು ಈ ಬಗೆಯ ಕಾರ್ಯಕ್ರಮಗಳು ನಿರಂತರ ಜರಗುತ್ತಿರಲಿ ಎಂದು ಈ ಸಂದರ್ಭದಲ್ಲಿ ಶುಭ ಹಾರೈಸಿದರು.

ಮುಖ್ಯ ಅತಿಥಿಗಳಾಗಿ ದೆಹಲಿ ವಿಶ್ವ ವಿದ್ಯಾಲಯದ ಪ್ರಾಧ್ಯಾಪಕರಾದ ಡಾ| ರಂಗನಾಥ ಸಿಂಗಾರಿ, ದೆಹಲಿ ಕರ್ನಾಟಕ ಸಂಘದ ಅಧ್ಯಕ್ಷ ವಸಂತ ಶೆಟ್ಟಿ ಬೆಳ್ಳಾರೆ, ದೆಹಲಿ ಕನ್ನಡ ಶಿಕ್ಷಣ ಸಂಸ್ಥೆಯ ಅಧ್ಯಕ್ಷ  ಸರವು ಕೃಷ್ಣ ಭಟ್‌, ದೆಹಲಿ ಕರ್ನಾಟಕ ಸಂಘದ ಪ್ರಧಾನ ಕಾರ್ಯದರ್ಶಿ ಸಿ. ಎಂ. ನಾಗರಾಜ, ಕರ್ನಾಟಕ ಸಂಗೀತ ವಿದ್ವಾಂಸರಾದ ಪಂಡಿತ್‌ ಲೋಕನಾಥ ಶರ್ಮಾ ಅವರು ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು. ಪೃಥ್ವೀ ಕಾರಿಂಜೆ ಕಾರ್ಯಕ್ರಮ ನಿರೂಪಿಸಿದರು. ಗಂಧರ್ವ ತಂಡದ ಸಂಚಾಲಕರಾದ  ರಾಜ್‌ಕುಮಾರ್‌ ಸ್ವಾಗತಿಸಿದರು. ಚಿದಂಬರ ಕೋಟೆ ವಂದಿಸಿದರು.