ಕಾಂದಿವಲಿ: 2ನೇ ಡ್ರೈವ್‌-ಇನ್‌ ವ್ಯಾಕ್ಸಿನೇಶನ್‌ ಕೇಂದ್ರಕ್ಕೆ ಚಾಲನೆ

Team Udayavani, May 22, 2021, 12:50 PM IST

ಮುಂಬಯಿ: ನಗರದ ಹಿರಿಯ ನಾಗರಿಕರಿಗಾಗಿ ಇನ್ನೂಂದು ಡ್ರೈವ್‌-ಇನ್‌ ವ್ಯಾಕ್ಸಿನೇಶನ್‌ ಕೇಂದ್ರವನ್ನು ಕಾಂದಿವಲಿ ಪೂರ್ವದ ಗ್ರೋವೆಲ್ಸ್‌ ಮಾಲ್‌ನ ಪಾರ್ಕಿಂಗ್‌ ಸೌಲಭ್ಯದಲ್ಲಿ ತೆರೆಯಲಾಗಿದ್ದು, ಮುಂಬಯಿ ಮೇಯರ್‌ ಕಿಶೋರಿ ಪೆಡ್ನೆಕರ್‌ ಉದ್ಘಾಟಿಸಿದರು.

ಈ ಸೌಲಭ್ಯವು ಒಮ್ಮಗೆ 200ರಿಂದ 300 ಕಾರುಗಳಿಗೆ ಅವಕಾಶ ಕಲ್ಪಿಸುತ್ತದೆ. ಡ್ರೈವ್‌ ಇನ್‌ ಸೌಲಭ್ಯವು 60 ವರ್ಷಕ್ಕಿಂತ ಮೇಲ್ಪಟ್ಟ ಅಥವಾ ವಿಶೇಷ ಸಾಮರ್ಥ್ಯ ಹೊಂದಿರುವ ನಾಗರಿಕರಿಗೆ ಮಾತ್ರ ಲಭ್ಯವಿದೆ. ಮೊದಲ ದಿನ 45 ವರ್ಷಕ್ಕಿಂತ ಮೇಲ್ಪಟ್ಟ ಕೆಲವರು ತಮ್ಮ ಲಸಿಕೆಗಳಿಗಾಗಿ ಕೇಂದ್ರಕ್ಕೆ ಬಂದಿದ್ದಾರೆ. ಆದರೆ ಅವರಿಗೆ ಡೋಸೇಜ್‌ ನಿರಾಕರಿಸಲಾಗಿದೆ. ಈ ಕೇಂದ್ರದಲ್ಲಿ ವಾಕ್‌-ಇನ್‌ ಸೌಲಭ್ಯಗಳನ್ನು ಫಲಾನುಭವಿಗಳಿಗೆ ಒದಗಿಸಲಾಗುವುದು. ಮೊದಲ ದಿನ ಒಟ್ಟು 70 ಮಂದಿ ಹಿರಿಯ ನಾಗರಿಕರು ಲಸಿಕೆ ಪಡೆದಿದ್ದಾರೆ ಎಂದು ಸ್ಥಳೀಯ ಬಿಜೆಪಿ ಕಾರ್ಪೋರೇಟರ್‌ ಸುನೀತಾ ಯಾದವ್‌ ಹೇಳಿದರು.

ಲಸಿಕೆ ಪಡೆಯಲು ಫಲಾನುಭವಿಗೆ ಸ್ವಂತ ಕಾರು ಇರುವುದು ಕಡ್ಡಾಯವಲ್ಲ, ಲಸಿಕೆ ಪಡೆಯಲು ನಾಗರಿಕರು ಟ್ಯಾಕ್ಸಿಗಳಲ್ಲಿ ಬರಬಹುದು ಮತ್ತು ಡೋಸ್‌ ಪಡೆದ ಬಳಿಕ ಅವರು ಕಾರನ್ನು ಬಿಟ್ಟು ಹೋಗಬಹುದು. ಏಕೆಂದರೆ ನಾವು ಅವರಿಗೆ ಕೇಂದ್ರದೊಳಗೆ ವಿಶ್ರಾಂತಿಗೆ ವ್ಯವಸ್ಥೆ ಮಾಡಿದ್ದೇವೆ ಎಂದು ಸುನೀತಾ ಯಾದವ್‌ ಹೇಳಿದ್ದಾರೆ.

ಮತ್ತೂಂದು ಲಸಿಕೆ ಕೇಂದ್ರವನ್ನು ಮಲಾಡ್‌ ಪೂರ್ವದ ನಿರಂಕರಿ ಸತ್ಸಂಗ್‌ ಹಾಲ್‌ನಲ್ಲಿ ಪ್ರಾರಂಭಿಸಲಾಗಿದ್ದು,  ಬಿಜೆಪಿ ಸಂಸದ ಮನೋಜ್‌ ಕೊಟಕ್‌ ಉದ್ಘಾಟಿಸಿದರು. ಮೊದಲ ದಿನ ಈ ಕೇಂದ್ರಗಳಲ್ಲಿ ಒಟ್ಟು 73 ಮಂದಿಗೆ ಡೋಸ್‌ ನೀಡಲಾಯಿತು. 45 ವರ್ಷಕ್ಕಿಂತ ಮೇಲ್ಪಟ್ಟ ನಾಗರಿಕರಿಗಾಗಿ ಈ ಕೇಂದ್ರ ತೆರೆದಿರುತ್ತದೆ  ಮತ್ತು ಡೋಸ್‌ ಪಡೆಯುವ ಮೊದಲು  ಪೂರ್ವ ನೋಂದಣಿ ಕಡ್ಡಾಯವಾಗಿದೆ ಎಂದು ಸ್ಥಳೀಯ ಬಿಜೆಪಿ ಕಾರ್ಪೊರೇಟರ್‌ ವಿನೋದ್‌ ಮಿಶ್ರಾ ಹೇಳಿದ್ದಾರೆ.