ಗುಜರಾತ್‌ ಬಿಲ್ಲವರ ಸಂಘದ ಕಾರ್ಯಕಾರಿ ಸಮಿತಿ ಸಭೆ

Team Udayavani, Jul 26, 2018, 12:08 PM IST

ಮುಂಬಯಿ: ಗುಜರಾತ್‌ ಬಿಲ್ಲವರ ಸಂಘದ ಕಾರ್ಯಕಾರಿ ಸಮಿತಿಯ ತ್ತೈಮಾಸಿಕ ಸಭೆಯು ಬರೋಡಾದ ಕೇಂದ್ರ ಶಾಖೆಯ ಬೈದಶ್ರೀ ಸಭಾಗೃಹದಲ್ಲಿ ಜು. 22 ರಂದು ಜರಗಿತು.

ಸಂಘದ ವಿಭಿನ್ನ ಶಾಖೆಗಳ ಸುಮಾರು 36 ಸದಸ್ಯರು ಸಭೆಯಲ್ಲಿ ಭಾಗವಹಿಸಿದ್ದರು. ಸಂಘದ ಅಧ್ಯಕ್ಷ ಮನೋಜ್‌ ಸಿ. ಪೂಜಾರಿ ಅವರು ಅಧ್ಯಕ್ಷತೆ ವಹಿಸಿ ಮಾತನಾಡಿ, ಸಂಸ್ಥೆಯ ದೈನಂದಿನ ಕಾರ್ಯಚಟುವಟಿಕೆಗಳ ಬಗ್ಗೆ ಆಯಾಯ ವಿಭಾಗದ ವರದಿಗಳನ್ನು ಪಡೆದು ಅದರ ಬಗ್ಗೆ ಚರ್ಚಿಸಿ ಸಲಹೆ, ಸೂಚನೆಗಳನ್ನು ನೀಡಿದರು.

ಅಲ್ಲದೆ ಬ್ರಹ್ಮಶ್ರೀ ನಾರಾಯಣ ಗುರುಗಳ ಜನ್ಮದಿನೋತ್ಸವವನ್ನು ಸೆ. 9 ರಂದು ವೈವಿಧ್ಯಮಯ ಕಾರ್ಯಕ್ರಮಗಳೊಂದಿಗೆ ನಡೆಸಲು ಸಭೆಯಲ್ಲಿ ನಿರ್ಧರಿಸಲಾಯಿತು. ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಮುಂಬಯಿಯ ಉದ್ಯಮಿ ಡಾ| ರಾಜಶೇಖರ್‌ ಕೋಟ್ಯಾನ್‌ ಅವರನ್ನು ಆಹ್ವಾನಿಸಲಾಗುವುದು ಹಾಗೂ ಎಲ್ಲಾ ತುಳು-ಕನ್ನಡಿಗ ಬಂಧುಗಳನ್ನು ಆಮಂತ್ರಿಸಿ ಜಾತಿ, ಮತ, ಧರ್ಮಗಳ ಭೇದವಿಲ್ಲದೆ ಒಂದೇ ವೇದಿಕೆಯಡಿಯಲ್ಲಿ ಪಾಲ್ಗೊಳ್ಳುವಂತೆ ಮಾಡಲಾಗುವುದು. ಶ್ರೀ ಗುರುಗಳ ಆಶಯದಂತೆ ಅವರ ಜನ್ಮ ದಿನವನ್ನು ಮಾದರಿಯನ್ನಾಗಿಸಲು ಸರ್ವ ರೀತಿಯಲ್ಲಿ ಎಲ್ಲರ ಸಹಕಾರ ಅಗತ್ಯವಾಗಿದೆ ಎಂದು ಇದೇ ಸಂದರ್ಭದಲ್ಲಿ ಅಧ್ಯಕ್ಷ ಮನೋಜ್‌ ಸಿ. ಪೂಜಾರಿ ತಿಳಿಸಿದರು.

ವೇದಿಕೆಯಲ್ಲಿ ದಯಾನಂದ ಬೋಂಟ್ರಾ, ಮನೋಜ್‌ ಪೂಜಾರಿ, ವಿ. ಡಿ. ಅಮೀನ್‌, ಲೋಕಯ್ಯ ಪೂಜಾರಿ, ಸುಂದರ್‌, ವಿಶ್ವನಾಥ್‌ ಪೂಜಾರಿ, ಪ್ರಭಾಕರ ಪೂಜಾರಿ, ವಿ. ವಿ. ಸುವರ್ಣ, ವಾಸು ಪೂಜಾರಿ ಮೊದಲಾದವರು ಉಪಸ್ಥಿತರಿದ್ದರು. ಪ್ರಧಾನ ಕಾರ್ಯದರ್ಶಿ ವಿ. ವಿ. ಸುವರ್ಣ ಕಾರ್ಯಕ್ರಮ ನಿರ್ವಹಿಸಿ ವಂದಿಸಿದರು.