ಗುರುಗಳ ಆದರ್ಶ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು: ಧನಂಜಯ ಶಾಂತಿ

Team Udayavani, Aug 26, 2021, 1:59 PM IST

ದಹಿಸರ್‌: ಬಿಲ್ಲವರ ಅಸೋಸಿಯೇಶನ್‌ ಮುಂಬಯಿ ಇದರ ದಹಿಸರ್‌-ಬೊರಿವಿಲಿ ಸ್ಥಳೀಯ ಕಚೇರಿ ವತಿಯಿಂದ ಬ್ರಹ್ಮಶ್ರೀ ನಾರಾಯಣಗುರುಗಳ 167ನೇ ಜಯಂತ್ಯುತ್ಸವವು ಬೊರಿವಿಲಿ ಪಶ್ಚಿಮದ ಪ್ಲಾಟ್‌ ನಂಬರ್‌ 134, ಗುರು ಸನ್ನಿಧಿ, ಗೊರೈ ಶಿಂಪೋಲಿ ರೋಡ್‌, ಗೊರೈ ಒಂದರಲ್ಲಿರುವ ಸ್ಥಳೀಯ ಕಚೇರಿಯಲ್ಲಿ ಆ. 23ರಂದು ವಿವಿಧ ಧಾರ್ಮಿಕ ಕಾರ್ಯಕ್ರಮಗಳೊಂದಿಗೆ ಜರಗಿತು.

ಗುರುಮೂರ್ತಿಗೆ ವಿವಿಧ ಪೂಜೆಗಳು, ಅಭಿಷೇಕ ವನ್ನು ನೆರವೇರಿಸಿದ ಶೇಖರ್‌ ಶಾಂತಿ ಉಳ್ಳೂರು ನೇತೃತ್ವದಲ್ಲಿ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳು ನೆರವೇರಿದವು. ಸ್ಥಳೀಯ ಕಚೇರಿಯ ಸದಸ್ಯರಾದ ರಮೇಶ್‌ ಡಿ. ಕೋಟ್ಯಾನ್‌, ಉಷಾ ರಮೇಶ್‌ ಕೋಟ್ಯಾನ್‌ ದಂಪತಿ ಪೂಜಾ ವಿಧಿ-ವಿಧಾನದ ಯಜಮಾನತ್ವ ವಹಿಸಿದ್ದರು. ಧಾರ್ಮಿಕ ಕಾರ್ಯ ಕ್ರಮದ ಕೊನೆಯಲ್ಲಿ ಮಂಗಳಾರತಿ ಹಾಗೂ ಸಮಿತಿಯ ಸದಸ್ಯರಿಂದ ಭಜನ ಕಾರ್ಯಕ್ರಮ, ಪ್ರಸಾದ ವಿತರಣೆಯನ್ನು ಆಯೋಜಿಸಲಾಗಿತ್ತು.

ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದ ಕೇಂದ್ರ ಕಚೇರಿಯ ಗೌರವ ಕಾರ್ಯದರ್ಶಿ ಧನಂಜಯ ಶಾಂತಿ ಮಾತನಾಡಿ, ನಾರಾಯಣಗುರುಗಳ ಆದರ್ಶ ಚಿಂತನೆಗಳನ್ನು ಜೀವನದಲ್ಲಿ ಅಳವಡಿಸಿ ಕೊಳ್ಳಬೇಕು. ಇಂದಿನ ಪರಿವರ್ತನೆಯ ಕಾಲಘಟ್ಟ ದಲ್ಲೂ ಸಮಾಜದಲ್ಲಿ ಅಸಮಾನತೆಯ ಧ್ವನಿ ಕೇಳಿ ಬರುತ್ತಿದೆ. ನಾರಾಯಣಗುರುಗಳ ಬೋಧನೆ ಯನ್ನು ನಡವಳಿಕೆ ಮುಖಾಂತರ ನಾವು ಸಮಾಜಕ್ಕೆ ಮಾದರಿಯಾಗಬೇಕು. ದೇಶದಲ್ಲಿ ತನ್ನದೇ ಆದ ಚಳವಳಿಯ ಮೂಲಕ ಜನಪರ ನಿರ್ವಹಣೆ, ಸಾಮಾಜಿಕ ನ್ಯಾಯ, ಅಸ್ಪೃಶ್ಯತೆ ನಿವಾರಣೆಯ ಮೂಲಕ ಕೆಳವರ್ಗದವರನ್ನು ಎತ್ತಿಹಿಡಿದು ಮುಖ್ಯವಾಹಿನಿಗೆ ತಂದವರು ನಾರಾಯಣಗುರುಗಳು. ಮೂರ್ತಿಯಲ್ಲೂ ಭಕ್ತಿಯನ್ನು ಕಾಣಬಹುದು ಎಂಬ ಉದ್ದೇಶದಿಂದ ನಾರಾಯಣಗುರುಗಳ ಮೂರ್ತಿಯನ್ನುಸ್ಥಾಪಿಸುವ ಮೂಲಕ ಸ್ಥಳೀಯ ಕಚೇರಿಯ ವಿಶೇಷ ಕೊಡುಗೈ ದಾನಿ ಜಿ. ಎಂ. ಕೋಟ್ಯಾನ್‌ ಮತ್ತು ಅವರ ಪರಿವಾರಕ್ಕೆ ಹಾಗೂ ಸರ್ವ ಸದ್ಭಕ್ತರಿಗೆ ನಾರಾಯಣಗುರುಗಳು ಸದಾ ಸುಖ-ಸಮೃದ್ಧಿ ಕರುಣಿಸಲೆಂದು ಹಾರೈಸಿದರು.

ಇದನ್ನೂ ಓದಿ:ಬಂಡೀಪುರ ಹೆದ್ದಾರಿ ಅಗಲೀಕರಣಕ್ಕೆ ಅವಕಾಶ ಕೊಡುವುದಿಲ್ಲ: ಅರಣ್ಯ ಸಚಿವ ಉಮೇಶ್ ಕತ್ತಿ

ಧಾರ್ಮಿಕ ಕಾರ್ಯಕ್ರಮದಲ್ಲಿ ಕೇಂದ್ರ ಕಚೇರಿಯ ಜತೆ ಕಾರ್ಯದರ್ಶಿ ಕೇಶವ ಕೋಟ್ಯಾನ್‌, ಮಾಜಿ ಗೌರವ ಕಾರ್ಯದರ್ಶಿ ಧರ್ಮಪಾಲ್‌ ಅಂಚನ್‌, ಅಕ್ಷಯ ಮಾಸಿಕದ ಸಹಾಯಕ ಸಂಪಾದಕ ಹರೀಶ್‌ ಜಿ. ಪೂಜಾರಿ, ಉಪಕಾರ್ಯಾಧ್ಯಕ್ಷ ರಜಿತ್‌ ಎಲ್‌. ಸುವರ್ಣ, ಜತೆ ಕಾರ್ಯದರ್ಶಿ ವತ್ಸಲಾ ಕೆ. ಪೂಜಾರಿ, ಕೋಶಾಧಿಕಾರಿ ಅಶೋಕ್‌ ಸಾಲ್ಯಾನ್‌, ಜತೆ ಕೋಶಾಧಿಕಾರಿ ಉಮೇಶ್‌ ಜಿ. ಕೋಟ್ಯಾನ್‌, ಭಾರತ್‌ ಬ್ಯಾಂಕ್‌ನ ನಿರ್ದೇಶಕ ಪ್ರೇಮನಾಥ ಕೋಟ್ಯಾನ್‌, ಭಾರತ್‌ ಬ್ಯಾಂಕ್‌ ಬೊರಿವಿಲಿ ಪಶ್ಚಿಮದ ಪ್ರಬಂಧಕಿ ಕುಸುಮಾ, ಉಪ ಪ್ರಬಂಧಕಿ ಇಂದಿರಾ ಪೂಜಾರಿ, ನವೀನ್‌ ಪೂಜಾರಿ, ನ್ಯಾಯವಾದಿ ಸುಧಾಕರ ಪೂಜಾರಿ, ದಯಾನಂದ ಸುವರ್ಣ, ಸದಸ್ಯರಾದ ರಾಘು ಜಿ. ಪೂಜಾರಿ, ಜಯರಾಮ್‌ ಪೂಜಾರಿ, ಯು. ಆರ್‌. ಡಿ. ಕೋಟ್ಯಾನ್‌, ಕೇಶರಂಜನ್‌ ಮೂಲ್ಕಿ, ಸುಂದರಿ ಪೂಜಾರಿ ಸತೀಶ್‌ ಅಮೀನ್‌ ಕಟಪಾಡಿ, ರವಿ ಪೂಜಾರಿ, ಸುಜಾತಾ ಪೂಜಾರಿ, ಕರುಣಾಕರ್‌ ಪೂಜಾರಿ, ವೇದಾ ಸುವರ್ಣ, ಸುಮತಿ ಅಮೀನ್‌, ವಾರಿಜಾ ಕೆ. ಸನಿಲ್‌, ಡಾ| ಶೃತಿ ಕೆ. ಪೂಜಾರಿ ಹಾಗೂ ಇತರ ಸದಸ್ಯರು ಸಹಕರಿಸಿದರು.

ಕಾರ್ಯಕ್ರಮದಲ್ಲಿ ಪೂಜೆಯ ಯಜಮಾನತ್ವ ವಹಿಸಿದ ರಮೇಶ್‌ ಕೋಟ್ಯಾನ್‌ ದಂಪತಿಯ ಸೇವಾರ್ಥಕವಾಗಿ ಗುರು ಪ್ರಸಾದ ಅನ್ನಸಂತರ್ಪಣೆ ನಡೆಯಿತು.

ಚಿತ್ರ-ವರದಿ: ರಮೇಶ್‌ ಉದ್ಯಾವರ್‌