ಪಂಡಿತ್‌ ಶೇಷಗಿರಿದಾಸರ ದಾಸವಾಣಿ

Team Udayavani, May 4, 2017, 4:30 PM IST

ಸಮಸ್ತ ಮನುಕುಲವನ್ನು ಸನ್ಮಾರ್ಗಕ್ಕೆ ಒಯ್ಯುವುದರೊಂದಿಗೆ ಜೀವನದ ಸಾರ್ಥಕತೆಯನ್ನು ಸಾರಿ ಹೇಳುವ ಕಾರ್ಯವನ್ನು ನಮ್ಮ ಸಂತರು, ದಾಸರು ಮಾಡಿದ್ದಾರೆ. ದಾಸರು ರಚಿಸಿದ ಸಾಹಿತ್ಯಕ್ಕೆ ಸಂಗೀತ ಸಂಯೋಜನೆಗೈದು ತಮ್ಮ ಅದ್ಭುತ ಹಾಡುಗಾರಿಕೆಯ ಮುಖಾಂತರ ಜನ ಸಾಮಾನ್ಯರಿಗೆ ಪರಿಚಯಿಸುವ ಕಾರ್ಯವನ್ನು ಅನೇಕ ಮಂದಿ ಮಾಡುತ್ತಿದ್ದು, ಅಂತವರಲ್ಲಿ ಪಂಡಿತ್‌ ಶೇಷಗಿರಿ ದಾಸರು ಒಬ್ಬರಾಗಿದ್ದಾರೆ. ಈ ಅಪ್ರತಿಮ ಗಾಯಕರ ಗಾಯನ ಮಾಧುರ್ಯವನ್ನು ಸವಿಯುವ ಅವಕಾಶವು ಇತ್ತೀಚೆಗೆ ಡೊಂಬಿವಲಿಯ ಸಂಗೀತಾಭಿಮಾನಿಗಳಿಗೆ ಸ್ಥಳೀಯ ಮಹಾನಗರ ಕನ್ನಡ ಸಂಸ್ಥೆಯು ಒದಗಿಸಿಕೊಟ್ಟಿತು.

ಡೊಂಬಿವಲಿ ಪಶ್ಚಿಮದ ಜನಗಣಮನ ಶಾಲೆಯ ಆವರಣದಲ್ಲಿ ನಡೆದ ವೈವಿಧ್ಯಮಯ ಸ್ವರ ಸಂಧ್ಯಾ ಕಾರ್ಯಕ್ರಮವು ಗಣೇಶ ಆರಾಧನೆಯೊಂದಿಗೆ ಪ್ರಾರಂಭಗೊಂಡಿತು. ಆನಂತರ ಜಗನ್ನಾಥ ದಾಸರ “ರಾಮ ಬಾರೋ ತಂದೆ ತಾಯಿ ಬಾರೋ’ ಎಂದು ಗುರು ರಾಘವೇಂದ್ರರನ್ನು ತಮ್ಮ ಸುಮಧುರ ಕಂಠ ಮಾಧುರ್ಯದಿಂದ ಆಹ್ವಾನಿಸಿ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು. “ಪಂಢಾರಾಪುರದಲ್ಲಿ ವಿಠೊಬನೆಂಬ ಓರ್ವ ಸಾವುಕಾರ’ ಎಂಬ ಜನಪ್ರಿಯ ದಾಸರ ಪದವನ್ನು ಪ್ರಸ್ತುತಪಡಿಸಿದ ಪಂಡಿತ್‌ ಶೇಷಗಿರಿದಾಸರು, ಪುರಂದರದಾಸರ ಭಾಗ್ಯದ ಲಕ್ಷ್ಮೀ ಭಾರಮ್ಮಾ, ಹೇಳವನಕಟ್ಟೆ ಗಿರಿಯಮ್ಮ ರಚಿಸಿದ “ಹನುಮಂತ ಹನುಮಂತ’ ರಚನೆಯು ಕೇಳುಗರನ್ನು ಮಂತ್ರಮುಗ್ಧಗೊಳಿಸಿತು.

ಇತ್ತೀಚೆಗಿನ ದಾಸರುಗಳಲ್ಲಿ ಜನಪ್ರಿಯರಾದ ಮುರುಗೋಡ ಕೃಷ್ಣ ದಾಸರು ರಚಿಸಿ, ರಾಗ ಸಂಯೋಜಿಸಿದ “ಗೋಪಿಕೆ ನಿನ್ನ ಮಗಜಾರ’ ಎಂಬ ಗೀತೆಯನ್ನು ಪ್ರಸ್ತುತಪಡಿಸಿ ಇತ್ತೀಚೆಗೆ ಅಗಲಿದ ಮುರುಗೋಡ ಕೃಷ್ಣದಾಸರಿಗೆ ಶ್ರದ್ಧಾಂಜಲಿ ಅರ್ಪಿಸಿದರು. “ಪಾಂಡುರಂಗಾ ಮಾಯಾಬಾಪಾ, ಪತಂಗ ತುಝಾ ಹಾಚಿಧಾಗಾ’ ಎಂಬ ಮರಾಠಿ ದಾಸರ ಪದವನ್ನು ಪಂಡಿತ್‌ ಶೇಷಗಿರಿದಾಸರು ಸುಶ್ರಾವ್ಯವಾಗಿ ಹಾಡಿದರೆ, ಅಲ್ಲಿ ಸೇರಿದ ಮರಾಠಿ ಕನ್ನಡ ಮನಸ್ಸುಗಳು ಪುಳಕಿತಗೊಂಡಿರುವುದು ವಿಶೇಷತೆಯಾಗಿತ್ತು. ಎರಡು ಗಂಟೆಗಳಿಗಿಂತಲೂ 
ಅಧಿಕ ಕಾಲ ತಮ್ಮ ಗಾನಸುಧೆಯನ್ನು ಹರಿಸಿದ ಪಂಡಿತ್‌ ಶೇಷಗಿರಿದಾಸರು ಕಾರ್ಯಕ್ರಮದ ಕೊನೆಯಲ್ಲಿ ಪುರಂದರದಾಸರ “ತೋಳ ತೋಳ ರಂಗಾ’ ಎಂಬ ಹಾಡನ್ನು ಹಾಡಿ ಕಾರ್ಯಕ್ರಮಕ್ಕೆ ಮಂಗಳ ಹಾಡಿದಾಗ ಇಡೀ ಸಭಾಗೃಹವೇ ಎದ್ದು ನಿಂತು ಕರತಾಡನದ ಮೂಲಕ ಗೌರವ ಸೂಚಿಸಿತು. ಈ ಅವಿಸ್ಮರಣೀಯ ಸ್ವರ ಸಂಧ್ಯಾ ಕಾರ್ಯಕ್ರಮಕ್ಕೆ ಹಾರ್ಮೋನಿಯಂದಲ್ಲಿ ಶ್ರೀಪಾದದಾಸ, ತಬಲಾದಲ್ಲಿ ಗೋಪಾಲ ಗುಡಬಡ್ಡಿ, ತಾಳದಲ್ಲಿ ಸ್ಥಳೀಯ ಕಲಾವಿದ ವಿಜಯ ಕುಲಕರ್ಣಿ ಅವರು ಸಹಕರಿಸಿದರು. ದಿನವಿಡೀ ಬಿಸಿಲಿನ ಬೇಗೆಯಲ್ಲಿ ಬೆಂದ ಮುಂಬಯಿಯ ಸಂಗೀತಾಭಿಮಾನಿಗಳ ಮನಸ್ಸಿಗೆ ಪಂಡಿತ್‌ ಶೇಷಗಿರಿದಾಸರ ಅದ್ಭುತ ಗಾಯನ ಮುದನೀಡಿತು.

 ಗುರುರಾಜ ಪೋತನೀಸ