ಪುಣೆ ದೇವಾಡಿಗ ಸಂಘ: ಆಟಿಡೊಂಜಿ ಕೂಟ ಆಚರಣೆ

Team Udayavani, Aug 11, 2017, 3:16 PM IST

ಪುಣೆ: ಪುಣೆ ದೇವಾಡಿಗ ಸಂಘದ ಮಹಿಳಾ ವಿಭಾಗದ ವತಿಯಿಂದ ಆಟಿಡೊಂಜಿ ಕೂಟ ಆಚರಣೆಯು ಆ. 6ರಂದು ನಗರದ ಸ್ವಾರ್‌ಗೆàಟ್‌ನಲ್ಲಿರುವ  ಜಯಶ್ರೀ ಹಾಲ್‌ನಲ್ಲಿ ನಡೆಯಿತು.

ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ಉಪಸ್ಥಿತರಿದ್ದ ತುಳುನಾಡಿನ ಹಿರಿಯ ಕೃಷಿಕ ಪಾಂಗಾಳ ಬೊಗ್ಗು ದೇವಾಡಿಗ ಮಾತನಾಡಿ, ಹಿಂದಿನ ದಿನಗಳಲ್ಲಿ ಆಟಿ ತಿಂಗಳೆಂದರೆ ನಿರಂತರವಾಗಿ ಸುರಿಯುತ್ತಿರುವ ಜಡಿಮಳೆ, ಮನೆಯಿಂದ ಹೊರಬರಲಾರದಂತಹ ಪರಿಸ್ಥಿತಿ, ತಿನ್ನಲು ಆಹಾರಕ್ಕೆ  ತತ್ವಾರದಂತಹ ಸ್ಥಿತಿಯನ್ನು ಇಂದಿನ ಜನತೆಗೆ ವಿವರಿಸಲೂ ಸಾಧ್ಯವಾಗುತ್ತಿಲ್ಲ. ಆದರೆ ಆ ದಿನಗಳಲ್ಲಿ ಪ್ರಕೃತಿದತ್ತವಾದ ಆಹಾರ ಪದಾರ್ಥಗಳ ಸೇವನೆ, ವಿವಿಧ ಆಚರಣೆಗಳು ಆರೋಗ್ಯಪೂರ್ಣ ಬದುಕಿಗೆ ಪೂರಕವಾಗಿತ್ತು. ಇಂದಿನ ದಿನಗಳಲ್ಲಿ ಬದಲಾದ ವಿದ್ಯಮಾನಗಳಲ್ಲಿಯೂ ವಿವಿಧ ಸಂಘಟನೆಗಳು ನಮ್ಮ ಹಿರಿಯರಿಂದ ನಡೆದುಕೊಂಡು ಬಂದ ನಮ್ಮ ಆಚರಣೆಗಳನ್ನು ಆಚರಿಸುವ ಮೂಲಕ ನಮ್ಮ ತುಳುನಾಡಿನ ಆಹಾರ ಪದ್ಧತಿಗಳನ್ನು ಪರಿಚಯಿಸಿ ಜತೆಗೂಡಿ ಸವಿಯುವಂತಹ ಕಾರ್ಯವನ್ನು ಮಾಡುತ್ತಿರುವುದು ಶ್ಲಾಘನೀಯವಾಗಿದೆ ಎಂದರು.

ಸಂಘದ ಗೌರವಾಧ್ಯಕ್ಷ ಎ. ಬಿ. ಶೇರಿಗಾರ್‌ ದಂಪತಿಗಳು ತೆಂಗಿನ ಹಿಂಗಾರವನ್ನು ಅರಳಿಸುವ ಮೂಲಕ ಕಾರ್ಯಕ್ರಮಕ್ಕೆ ಚಾಲನೆಯಿತ್ತರು. ಸಂಘದ ಅಧ್ಯಕ್ಷ ಸಚಿನ್‌  ದೇವಾಡಿಗ, ಸ್ಥಾಪಕಾಧ್ಯಕ್ಷ ಪ್ರಭಾಕರ ಜಿ. ದೇವಾಡಿಗ, ಉಪಾಧ್ಯಕ್ಷ ಕೃಷ್ಣ ಕಲ್ಯಾಣು³ರ್‌, ಕೋಶಾಧಿಕಾರಿ ಸುರೇಶ್‌ ಶ್ರೀಯಾನ್‌ ಉಪಸ್ಥಿತರಿದ್ದು ತಮ್ಮ ಅನಿಸಿಕೆಗಳನ್ನು ವ್ಯಕ್ತಪಡಿಸಿದರು. ಕು| ಕವನಾ ನಾರಾಯಣ ದೇವಾಡಿಗ, ಸುನೀತಾ ವಿಠಲ್‌ ದೇವಾಡಿಗ, ವಿಠಲ… ದೇವಾಡಿಗ ಅವರ ಹಾಡು, ಒಗಟು, ಗಾದೆ ಮಾತುಗಳು ಸೇರಿದ್ದ ಸಮಾಜ ಬಾಂಧವರನ್ನು ರಂಜಿಸಿತು.

ಮಹಿಳೆಯರು ಮನೆಯಲ್ಲಿ ತಯಾರಿಸಿ ತಂದ  ಪತ್ರೊಡೆ, ತೊಜಂಕ್‌, ಮಂಜಲ್ದ ಇರೆತ ಗಟ್ಟಿ, ಅಪ್ಪ, ನೇಯಪ್ಪ, ನೀರ್‌ದೋಸೆ, ತಿಮರೆ ಚಟ್ನಿ, ಉಪ್ಪಡಚ್ಚಿರ್‌, ತೇವುದ ಗಸಿ, ಕುಕ್ಕುದ ಚಟ್ನಿ ಇತ್ಯಾದಿ ಸುಮಾರು 50ಕ್ಕೂ ಅಧಿಕ ಖಾದ್ಯಗಳನ್ನು ಪ್ರದರ್ಶಿಸಿದರು. ಕಾರ್ಯಕ್ರಮದಲ್ಲಿ ನವೀನ್‌ ದೇವಾಡಿಗ, ಸುಧಾಕರ ದೇವಾಡಿಗ, ಯಶವಂತ್‌  ದೇವಾಡಿಗ, ನಾರಾಯಣ ದೇವಾಡಿಗ, ಜನಾದ‌ìನ ದೇವಾಡಿಗ, ಸಂತೋಷ್‌ ದೇವಾಡಿಗ, ವಿಠಲ ದೇವಾಡಿಗ, ವಾಮನ ದೇವಾಡಿಗ, ಸತೀಶ್‌ ದೇವಾಡಿಗ, ಶಶಿಕಾಂತಿ  ದೇವಾಡಿಗ  ಹಾಗೂ  ವಸಂತಿ ದೇವಾಡಿಗ ಉಪಸ್ಥಿತರಿದ್ದರು. ಸುಧಾಕರ ದೇವಾಡಿಗ ಆಹಾರ ವ್ಯಂಜನಗಳನ್ನು ತಯಾರಿಸಿ ತಂದ ಮಹಿಳೆಯರನ್ನು ಅಭಿನಂದಿಸಿ ವಂದಿಸಿದರು. ಪ್ರಿಯಾ ಎಚ್‌. ದೇವಾಡಿಗ ಕಾರ್ಯಕ್ರಮ ನಿರೂಪಿಸಿ ವಂದಿಸಿದರು.