ವಡಾಲ ಎನ್‌ಕೆಇಎಸ್‌ ಶಿಕ್ಷಣ ಸಂಸ್ಥೆಯಲ್ಲಿ  ಶ್ರೀ ಶಾರದಾಪೀಠ ಉದ್ಘಾಟನೆ

Team Udayavani, Jan 8, 2019, 7:02 AM IST

ಮುಂಬಯಿ: ಶಾಸ್ತ್ರ ದಲ್ಲಿ ಹೇಳಿದ ನ್ಯಾಯದಂತೆ ಪ್ರತಿ ಯೊಬ್ಬರಿಗೂ ಶಾರದಾ ಮಾತೆಯ ಅನುಗ್ರಹವು ಲಭ್ಯವಾಗುತ್ತದೆ. ಆರಂಭ  ಶೂರತ್ವದ ಬದಲು ಚಿಕ್ಕ ದಾಗಿ ಆರಂಭಿಸಿ ಹಂತ ಹಂತವಾಗಿ ಬೆಳೆದು ಸ್ವತಂತ್ರ ವಿಶ್ವವಿದ್ಯಾಲಯ ಮಟ್ಟಕ್ಕೆ ಬೆಳೆದು ನಿಂತಿರುವ ಈ ವಿದ್ಯಾಸಂಸ್ಥೆಯು ಇನ್ನಷ್ಟು ಎತ್ತರಕ್ಕೆ ಬೆಳೆಯಲಿ ಎಂದು ಶೃಂಗೇರಿಯ ಶ್ರೀ ವಿದು ಶೇಖರ ಭಾರತಿ ಸ್ವಾಮೀಜಿ ಅವರು ನುಡಿದರು.

ಜ. 1ರಂದು ವಡಾಲ ಎನ್‌ಕೆಇಎಸ್‌ ಶಿಕ್ಷಣ ಸಂಸ್ಥೆಯ ಪದವಿ ಮತ್ತು ಮ್ಯಾನೇಜ್‌ಮೆಂಟ್‌ ಕಾಲೇಜಿನ ಕಟ್ಟಡದಲ್ಲಿ ನೂತನವಾಗಿ ನಿರ್ಮಿಸಿರುವ ಶ್ರೀ ಶಾರದಾಪೀಠವನ್ನು ಉದ್ಘಾಟಿಸಿ ಆಶೀರ್ವಚನ ನೀಡಿದ ಶ್ರೀಗಳು, ವಿದ್ಯಾಸಂಸ್ಥೆಗಳಲ್ಲಿ ಸಂಸ್ಕಾರ ಬೋಧನೆ ಬಹಳ ಮುಖ್ಯವಾಗಿದೆ. ಪ್ರತಿಯೋರ್ವನ ಜೀವನಕ್ಕೆ ಉಪ ಯೋಗವಾಗುವಂತಹ ಜ್ಞಾನವನ್ನು ಪಡೆದು ತಮ್ಮ ಹಾಗೂ ಸಮಾಜವನ್ನು ಉದ್ಧಾರ ಮಾಡುವಂತಹ ಶಿಕ್ಷಣವನ್ನು ವಿದ್ಯಾರ್ಥಿಗಳು ಪಡೆದುಕೊಳ್ಳಬೇಕು. ಶಿಕ್ಷಕನಾದವನು ಸತತವಾದ ಅಧ್ಯ ಯನದ ಮುಖಾಂತರ ಅತ್ಯಂತ ಹೆಚ್ಚಿನ ಜ್ಞಾನವನ್ನು ವಿದ್ಯಾರ್ಥಿಗಳಿಗೆ ನೀಡಬೇಕು. ವಿದ್ಯೆಯಲ್ಲಿ ಲೌಖೀಕ ಮತ್ತು ಅಲೌಖೀಕ ವಿದ್ಯೆ ಬಹಳ ಪ್ರಾಮುಖ್ಯತೆಯನ್ನು ಪಡೆದಿವೆ. ವೇದ-ವೇದಾಂತ, ಉಪನಿಷತ್‌, ಪುರಾಣಗಳನ್ನೊಳಗೊಂಡ ಶಾಸ್ತ್ರವಿದ್ಯೆ, ಸಾಂಪ್ರದಾಯಿಕ ವಿದ್ಯೆಯಾಗಿದ್ದು, ಅಂದು ದೊರೆಯುತ್ತಿದ್ದ ರೀತಿಯಲ್ಲಿ ವಿದ್ಯಾರ್ಥಿಗಳಿಗೆ ಇಂದು ಕೂಡ ದೊರೆಯಬೇಕಾಗಿದೆ. ಸಂಸ್ಕೃತಿಯ ಕುರಿತು ಗೌರವ ಬರುವಂತಹ ಶಿಕ್ಷಣವನ್ನು ನೀಡಬೇಕಾಗಿದೆ. ಧರ್ಮಶಾಸ್ತ್ರದಲ್ಲಿ ತಿಳಿಸಿದಂತೆ ಏಕಾದಶಿ ವ್ರತ, ಉಪವಾಸ ಮೊದಲಾದವುಗಳನ್ನು ಬೇರೆಯ ವರಿಂದ ತಿಳಿದುಕೊಳ್ಳುವ ಬದಲು ವಿದ್ಯಾಸಂಸ್ಥೆಗಳು ಸಂಸ್ಕಾರ ಬೋಧನೆ ಮಾಡಿದರೆ ಉತ್ತಮ ನಾಗರಿಕರಾಗಲು ಸಾಧ್ಯವಿದೆ ಎಂದು ನುಡಿದು, ಶೃಂಗೇರಿ ಶಾರದಾ ಪೀಠದ 36ನೇ ಗುರುಗಳಾದ ಶ್ರೀ ಭಾರತಿ ತೀರ್ಥ ಸ್ವಾಮೀಜಿಯವರ ಅನುಗ್ರಹ ತಮ್ಮೆಲ್ಲರಿಗೆ ಸದಾ ಇರಲಿ ಎಂದು ಹಾರೈಸಿದರು.

ಸಂಸ್ಥೆಯ ಪದಾಧಿಕಾರಿ ಶಶಿಕಾಂತ್‌ ಜೋಶಿ ಅವರು ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿ ಸಂಸ್ಥೆಯ ಸಾಧನೆಗಳನ್ನು ವಿವರಿಸಿ ಕಾರ್ಯಕ್ರಮ ನಿರ್ವಹಿಸಿ ವಂದಿಸಿದರು. 

ಸಂಗೀತ ಶಿಕ್ಷಕ ಸಚಿನ್‌ ಮೋರೆ ಪ್ರಾರ್ಥನೆಗೈದರು. ಸಂಸ್ಥೆಯ ಪದಾಧಿ ಕಾರಿಗಳು, ಕಾರ್ಯಕಾರಿ ಸಮಿತಿಯ ಸದಸ್ಯರು ಹಾಗೂ ಇನ್ನಿತರ ಸಂಘಟನೆಗಳ ಪದಾಧಿಕಾರಿಗಳು ಉಪಸ್ಥಿತರಿದ್ದು ಶ್ರೀಗಳಿಂದ ಆಶೀರ್ವಚನ ಪಡೆದರು.

ಎನ್‌ಕೆಇಎಸ್‌ ಶಿಕ್ಷಣ ಸಂಸ್ಥೆಯ ಅಧ್ಯಕ್ಷ ಪಾರ್ಥಸಾರಥಿ ನಾಯಕ್‌, ಕಾರ್ಯಕಾರಿ ಸಮಿತಿಯ ಸದಸ್ಯರುಗಳಾದ ಅನಂತ ಬನವಾಸಿ, ಪದ್ಮಜಾ ಬನವಾಸಿ, ಶಂಕರ ಲಿಂಗ, ವಸಂತ, ಸುಪ್ರೀಂ ಕೋರ್ಟ್‌ನ ನಿವೃತ್ತ ನ್ಯಾಯಾಧೀಶ ಜಸ್ಟೀಸ್‌ ಬಿ. ಎನ್‌. ಶ್ರೀಕೃಷ್ಣ, ಪೂರ್ಣಿಮಾ ಶ್ರೀಕೃಷ್ಣ, ಶಾಲಾ ಮುಖ್ಯ ಶಿಕ್ಷಕಿ ಸರೋಜಾ ರಾವ್‌, ಭವಾನಿ ಭಾರ್ಗವ, ಮೈಸೂರು ಅಸೋಸಿಯೇಶನ್‌ ಮುಂಬಯಿ ಅಧ್ಯಕ್ಷೆ ಕೆ. ಕಮಲಾ ಮೊದಲಾದವರು ಉಪಸ್ಥಿತರಿದ್ದರು. 

ಶ್ರೀಗಳು ಭಕ್ತರನ್ನು ಮಂತ್ರಾಕ್ಷತೆ ಯನ್ನಿತ್ತು ಹರಸಿದರು.