ಪಾಕ್‌ ಪರಾಭವ; ಆಫ್ರಿಕಾಕ್ಕೆ ಟಿ20 ಸರಣಿ

Team Udayavani, Feb 5, 2019, 12:30 AM IST

ಜೊಹಾನ್ಸ್‌ಬರ್ಗ್‌: ಮುನ್ನುಗ್ಗಿ ಬಂದ ಪಾಕಿಸ್ಥಾನವನ್ನು ಕೊನೆಯ ಹಂತದಲ್ಲಿ ಹಿಡಿದು ನಿಲ್ಲಿಸಿದ ದಕ್ಷಿಣ ಆಫ್ರಿಕಾ 2ನೇ ಟಿ20 ಪಂದ್ಯವನ್ನು 7 ರನ್ನುಗಳಿಂದ ಗೆದ್ದು ಸರಣಿಯನ್ನು ತನ್ನದಾಗಿಸಿಕೊಂಡಿದೆ.

ರವಿವಾರ ರಾತ್ರಿ ಜೊಹಾನ್ಸ್‌ಬರ್ಗ್‌ನಲ್ಲಿ ನಡೆದ ಬೃಹತ್‌ ಮೊತ್ತದ ಹಣಾಹಣಿಯಲ್ಲಿ ಮೊದಲು ಬ್ಯಾಟಿಂಗ್‌ ನಡೆಸಿದ ದಕ್ಷಿಣ ಆಫ್ರಿಕಾ 3 ವಿಕೆಟಿಗೆ 188 ರನ್‌ ಸೂರೆಗೈದಿತು. ಜವಾಬಿತ್ತ ಪಾಕಿಸ್ಥಾನ 7 ವಿಕೆಟಿಗೆ 181 ರನ್‌ ಗಳಿಸಿ ಶರಣಾಯಿತು. ಮೊದಲ ಪಂದ್ಯವನ್ನು ಆಫ್ರಿಕಾ 6 ರನ್‌ ಅಂತರದಿಂದ ಜಯಿಸಿತ್ತು. 3ನೇ ಹಾಗೂ ಅಂತಿಮ ಮುಖಾಮುಖೀ ಫೆ. 6ರಂದು ಸೆಂಚುರಿಯನ್‌ನಲ್ಲಿ ನಡೆಯಲಿದೆ.

ಬಾಬರ್‌-ತಲತ್‌ ಸವಾರಿ
ಒಂದು ಹಂತದಲ್ಲಿ ಪಾಕಿಸ್ಥಾನ ಬಾಬರ್‌ ಆಜಂ-ಹುಸೇನ್‌ ತಲತ್‌ ಅವರ ಆಕ್ರಮಣಕಾರಿ ಆಟದಿಂದ ಹರಿಣಗಳ ಮೇಲೆ ಸವಾರಿ ಮಾಡುತ್ತ ಬಂದಿತ್ತು. 16 ಓವರ್‌ ಅಂತ್ಯಕ್ಕೆ ಒಂದೇ ವಿಕೆಟಿಗೆ 147 ರನ್‌ ಬಾರಿಸಿದ್ದನ್ನು ಕಂಡಾಗ ಪಾಕ್‌ ಗೆಲ್ಲುತ್ತದೆಂದೇ ಭಾವಿಸಲಾಗಿತ್ತು. ಅನಂತರ ತೀವ್ರ ಕುಸಿತವೊಂದನ್ನು ಕಂಡ ಪಾಕ್‌ ತೀವ್ರ ಒತ್ತಡಕ್ಕೆ ಸಿಲುಕಿತು; ಗೆಲುವನ್ನು ಸ್ವಲ್ಪವೇ ಅಂತರದಿಂದ ಕಳೆದುಕೊಂಡಿತು.ಬಾಬರ್‌ ಆಜಂ 58 ಎಸೆತಗಳಿಂದ 90 ರನ್‌ ಬಾರಿಸಿದರೆ (13 ಬೌಂಡರಿ, 1 ಸಿಕ್ಸರ್‌), ತಲತ್‌ 41 ಎಸೆತ ನಿಭಾಯಿಸಿ 55 ರನ್‌ ಹೊಡೆದರು (7 ಬೌಂಡರಿ, 1 ಸಿಕ್ಸರ್‌). ಈ ಜೋಡಿಯಿಂದ 2ನೇ ವಿಕೆಟಿಗೆ 12.1 ಓವರ್‌ಗಳಲ್ಲಿ 102 ರನ್‌ ಹರಿದು ಬಂತು.

ಆಫ್ರಿಕಾದ ದೊಡ್ಡ ಮೊತ್ತಕ್ಕೆ ಕಾರಣರಾದವರು ಬಿಗ್‌ ಹಿಟ್ಟರ್‌ ಡೇವಿಡ್‌ ಮಿಲ್ಲರ್‌. ಕೇವಲ 29 ಎಸೆತ ಎದುರಿಸಿದ ಮಿಲ್ಲರ್‌ 5 ಸಿಕ್ಸರ್‌, 4 ಬೌಂಡರಿ ಒಳಗೊಂಡ ಅಜೇಯ 65 ರನ್‌ ಬಾರಿಸಿದರು.

ಸಂಕ್ಷಿಪ್ತ ಸ್ಕೋರ್‌: ದಕ್ಷಿಣ ಆಫ್ರಿಕಾ-20 ಓವರ್‌ಗಳಲ್ಲಿ 3 ವಿಕೆಟಿಗೆ 188 (ಮಿಲ್ಲರ್‌ ಔಟಾಗದೆ 65, ಡ್ಯುಸೆನ್‌ 45, ಮಾಲನ್‌ 33, ಹೆಂಡ್ರಿಕ್ಸ್‌ 28, ಇಮಾದ್‌ 9ಕ್ಕೆ 1). ಪಾಕಿಸ್ಥಾನ-20 ಓವರ್‌ಗಳಲ್ಲಿ 7 ವಿಕೆಟಿಗೆ 181 (ಬಾಬರ್‌ 90, ತಲತ್‌ 55, ಫೆಲುಕ್ವಾಯೊ 36ಕ್ಕೆ 3, ಹೆಂಡ್ರಿಕ್ಸ್‌ 30ಕ್ಕೆ 2, ಮಾರಿಸ್‌ 36ಕ್ಕೆ 2). ಪಂದ್ಯಶ್ರೇಷ್ಠ: ಡೇವಿಡ್‌ ಮಿಲ್ಲರ್‌.