55 ವರ್ಷದ ಮಹಿಳೆಯಿಂದ ಲೇ-ಲಡಾಕ್‌ನಿಂದ ಕನ್ಯಾಕುಮಾರಿಗೆ ಬೈಕ್‌ ರೈಡ್‌ 

Team Udayavani, Oct 16, 2017, 12:58 PM IST

ಮಂಗಳೂರು: “ನಾನು ಹೆಣ್ಣು ಎಂಬ ಕೀಳರಿಮೆ ನಮ್ಮಲ್ಲಿದ್ದರೆ ಸಾಧಿಸಲು ಸಾಧ್ಯವಿಲ್ಲ. ಭಯ ಎನ್ನುವುದು ಕಾಲ್ಪನಿಕ. ಸಾಧಿಸಬೇಕು ಎಂಬ ಹಠದೊಂದಿಗೆ ಮುನ್ನಡೆದರೆ ನಮ್ಮನ್ನು  ತಡೆಯಲು ಯಾರಿಂದಲೂ ಸಾಧ್ಯವಿಲ್ಲ.’

ವಿಶ್ವಮಟ್ಟದಲ್ಲಿ ಗುರುತಿಸಿಕೊಂಡ ಲಿಮ್ಕಾ ಬುಕ್‌ ಆಫ್ ರೆಕಾರ್ಡ್‌ ಸಾಧನೆಗೈದ 55 ವರ್ಷದ ಮಹಿಳಾ ಬೈಕ್‌ ರೈಡರ್‌ ಮೋಕ್ಷಾ ಜೇಟ್ಲಿ ಅವರು ತಮ್ಮ ಬೈಕ್‌ ರೈಡ್‌ ಮೂಲಕ ಇದೀಗ ದಕ್ಷಿಣ ಕನ್ನಡ ಜಿಲ್ಲೆಗೆ ಆಗಮಿಸಿದ್ದು, ಈ ವೇಳೆ ಉದಯವಾಣಿಗೆ ನೀಡಿದ ಪ್ರತಿಕ್ರಿಯೆಯಿದು. ಮೂಲತಃ  ಪಂಜಾಬಿನ ಕೋಶಿಯಾಪುರ್‌ ಜಿಲ್ಲೆಯ ಮೋಕ್ಷಾ ಜೇಟ್ಲಿ ಅವರು ಹೆಣ್ಣು ಭ್ರೂಣ ಹತ್ಯೆ ಸೇರಿದಂತೆ ಮಹಿಳೆಯರ ವಿರುದ್ಧ ನಡೆಯುವ ದೌರ್ಜನ್ಯಗಳ ವಿರುದ್ಧ  ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸುವ ನಿಟ್ಟಿನಲ್ಲಿ ಏಕಾಂಗಿಯಾಗಿ ಬೈಕ್‌ ರೈಡ್‌ ಮಾಡುತ್ತಾರೆ. ಈ ಬಾರಿ “ಡಾಟರ್‌ ಆರ್‌ ಪ್ರೀಶಿಯಸ್‌’ ಎನ್ನುವ ಥೀಮ್‌ನೊಂದಿಗೆ ಲೇ-ಲಡಾಕ್‌ನಿಂದ ಏಕಾಂಗಿಯಾಗಿ ಬೈಕ್‌ ರೈಡ್‌ ಮಾಡುವ ಮೂಲಕ ಕನ್ಯಾಕುಮಾರಿಗೆ ಹೊರಟಿದ್ದಾರೆ. ಈ ನಡುವೆ ಮಂಗಳೂರಿನಲ್ಲಿ ಮಾತಿಗೆ ಸಿಕ್ಕ ಮೋಕ್ಷಾ ಅವರು “ಹೆಣ್ಣು ಮಗು ಜನಿಸಿದರೆ ಜರಿಯಬೇಡಿ ಅವಳನ್ನು ಪ್ರೀತಿಯಿಂದ ಬೆಳೆಸಿ .. ಹುಡುಗರು ಮಾಡುವ ಸಾಧನೆಯನ್ನು ಹುಡುಗಿಯೂ ಮಾಡಬಲ್ಲಳು. ಅವಳಿಗೆ ಉತ್ತಮ ಪ್ರೋತ್ಸಾಹ ನೀಡಿ’ ಎನ್ನುತ್ತಾರೆ.

ತನ್ನ ಮಗಳ ಹುಟ್ಟಿದ ದಿನವಾದ ಅ.2ರಂದು ರಾಯಲ್‌ ಎನ್‌ಫೀಲ್ಡ್‌ 350 ಎಲೆಕ್ಟ್ರಾ ಮೂಲಕ ಲಡಾಕ್‌ನಿಂದ ಬೈಕ್‌ ರೈಡ್‌ ಆರಂಭಿಸಿದ ಇವರು ಅ.18ರಂದು ಕನ್ಯಾಕುಮಾರಿಗೆ ತಲುಪುವ ಗುರಿ ಹೊಂದಿದ್ದಾರೆ. ಈಗಾಗಲೇ 5000 ಕಿ.ಮೀ ಕ್ರಮಿಸಿರುವ ಮೋಕ್ಷಾ ಅವರು ಮನಾಲಿಯಲ್ಲಿ ಟೂರ್‌ ಅಪರೇಟರ್‌ ಆಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ.

 ಮೈ ಡಾಟರ್‌ ಇಸ್‌ ಮೈ ಫೀನಾಸ್ಸಿಯರ್‌
ಚಿಕ್ಕ ವಯಸ್ಸಿನಲ್ಲೇ ಮದುವೆಯಾದ ಮೋಕ್ಷಾ ಅವರಿಗೆ ಜನಿಸಿದ್ದು ಹೆಣ್ಣು ಮಗು.  ಹೆಣ್ಣು ಮಗು ಜನಿಸಿದೆ ಎನ್ನುವ ಕಾರಣಕ್ಕೆ ಪತಿ ಹಾಗೂ ಸಂಬಂಧಿಕರಿಂದ  ನೋವು ಅನುಭವಿಸಿದ ಮೋಕ್ಷಾ ಎಲ್ಲರಿಂದಲೂ ದೂರವಾಗಿ ಮಗಳೊಂದಿಗೆ ಬದುಕಲು ಆರಂಭಿಸಿದರು. ಪ್ರಸ್ತುತ ಖಾಸಗಿ ಕಂಪೆನಿಯಲ್ಲಿ ಉದ್ಯೋಗಿಯಾಗಿರುವ ಮಗಳು ಪ್ರಾಚಿ ತಾಯಿಯ ಬೈಕ್‌ ರೈಡ್‌ಗೆ ಪೂರ್ಣ ಸಹಕಾರ ನೀಡುತ್ತಿದ್ದಾರೆ. ಅಲ್ಲದೆ ತಾಯಿಯ ಬೈಕ್‌ ರೈಡ್‌ ಗೆ ಅವರೇ ಹಣಕಾಸಿನ ವ್ಯವಸ್ಥೆಯನ್ನು ಮಾಡುತ್ತಾರೆ. ಇದಕ್ಕೆ ನನಗೆ ಹೆಮ್ಮೆ ಇದೆ ಎನ್ನುತ್ತಾರೆ ಮೋಕ್ಷಾ.

 ಲಿಮ್ಕಾ ದಾಖಲೆ
ಮಗಳು ಅವಳ ಕಾಲ ಮೇಲೆ ನಿಲ್ಲಬಲ್ಲಳು ಎನ್ನುವುದು ಖಾತರಿಯಾದ ಬಳಿ ಮೋಕ್ಷಾ ಅವರು ಹೆಣ್ಣುಮಕ್ಕಳ ವಿರುದ್ಧ ನಡೆಯುವ ದೌರ್ಜನ್ಯಗಳ ಬಗ್ಗೆ ಜಾಗೃತಿ ಮೂಡಿಸುವ ಸಲುವಾಗಿ ಬೈಕ್‌ ಸವಾರಿ ಮಾಡಲು ನಿರ್ಧರಿಸಿದರು. ಲೇ ನಿಂದ ಮನಾಲಿ ವರೆಗೆ 20 ಗಂಟೆ 20 ನಿಮಿಷದಲ್ಲಿ ಕ್ರಮಿಸಿ ಲಿಮ್ಕಾ ಬುಕ್‌ ಆಫ್‌ ರೇಕಾರ್ಡ್‌ನಲ್ಲಿ ತನ್ನ ಹೆಸರು ದಾಖಲಿಸಿಕೊಂಡರು.

 ಕರಾವಳಿ ಸುಂದರ ನಗರ
ಕರಾವಳಿ ಮೂಲಕ ನಾನು ಹಾದುಹೋಗಬೇಕಾ ಗಿರುವುದರಿಂದ ಒಂದು ದಿನ ಇಲ್ಲಿಯೇ ವಾಸ್ತವ್ಯ ಹೂಡಿ ದ್ದೇನೆ. ಇಲ್ಲಿನ ಜನರು ಹಾಗೂ ವಿವಿಧ ಕ್ಷೇತ್ರಗಳಲ್ಲಿ ಮಾಡಿ ರುವ ಸಾಧನೆ ಬಗ್ಗೆ ಮೊದಲೇ ತಿಳಿದುಕೊಂಡಿದ್ದೆ. ಎಲ್ಲಕ್ಕೂ ಮಿಗಿಲಾಗಿ ಕರಾವಳಿ ಪ್ರಶಾಂತವಾಗಿ ಸುಂದರವಾಗಿದೆ.

ಪ್ರಜ್ಞಾ ಶೆಟ್ಟಿ