Test Cricket: 3ನೇ ಟೆಸ್ಟ್‌ನಲ್ಲಿ ಹರ್ಷಿತ್‌ ಆಡಲ್ಲ, ಬುಮ್ರಾ ಕಣಕ್ಕೆ: ನಾಯರ್‌ ಸುಳಿವು

Team Udayavani, Oct 30, 2024, 8:06 PM IST

ಮುಂಬೈ: ಇಲ್ಲಿ ನ.1ರಿಂದ ಆರಂಭಗೊಳ್ಳಲಿರುವ ನ್ಯೂಜಿಲೆಂಡ್‌-ಭಾರತ ನಡುವಿನ 3ನೇ ಮತ್ತು ಅಂತಿಮ ಟೆಸ್ಟ್‌ನಲ್ಲಿ ಬೌಲಿಂಗ್‌ ಆಲ್‌ ರೌಂಡರ್‌ ಹರ್ಷಿತ್‌ ರಾಣಾ ಪಾದಾರ್ಪಣೆ ಮಾಡುವ ಸಾಧ್ಯತೆ ಇಲ್ಲ. ಜೊತೆಗೆ, ಈ ಪಂದ್ಯದಲ್ಲೂ ಪ್ರಮುಖ ವೇಗಿ ಜಸ್‌ಪ್ರೀತ್‌ ಬುಮ್ರಾ ಕಣಕ್ಕಿಳಿಯಲಿದ್ದಾರೆ ಎಂದು ಭಾರತದ ಸಹಾಯಕ ಕೋಚ್‌ ಅಭಿಷೇಕ್‌ ನಾಯರ್‌ ಸುಳಿವು ನೀಡಿದ್ದಾರೆ.

ಮುಂಬೈಯಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅಭಿಷೇಕ್‌ ನಾಯರ್‌, ತಂಡಕ್ಕೆ ಹೊಸ ಸೇರ್ಪಡೆ ಇಲ್ಲ. ನಮ್ಮ ಪಾಲಿಗೆ ಪ್ರತೀ ವಾರವೂ, ಪ್ರತೀ ದಿನವೂ ನಿರ್ಣಾಯಕವಾಗಿದೆ ಎಂದಿದ್ದಾರೆ. 3 ಪಂದ್ಯಗಳ ಟೆಸ್ಟ್‌ ಸರಣಿಯನ್ನು ಈಗಾಗಲೇ 2-0ಯಿಂದ ಕಳೆದುಕೊಂಡಿರುವ ಭಾರತ, ಮುಂಬೈ ಪಂದ್ಯ ಗೆದ್ದು ವೈಟ್‌ ವಾಷ್‌ ಮುಖಭಂಗದಿಂದ ಪಾರಾಗುವ ನೆಲೆಯಲ್ಲಿ ಯೋಚಿಸುತ್ತಿದೆ.

22 ವರ್ಷದ ವೇಗಿ ಹರ್ಷಿತ್‌ ರಾಣಾ, ರಣಜಿಯಲ್ಲಿ ದೆಹಲಿಯನ್ನು ಪ್ರತಿನಿಧಿಸಿ ಅಸ್ಸಾಂ ವಿರುದ್ಧ 5 ವಿಕೆಟ್‌ ಸಹಿತ ಅರ್ಧ ಶತಕ ಸಿಡಿಸಿದ್ದರು. ಇದರ ಬೆನ್ನಲ್ಲೇ ಅವರಿಗೆ ಮೀಸಲು ಆಟಗಾರರಾಗಿ ಭಾರತೀಯ ತಂಡಕ್ಕೆ ಕರೆ ಬಂದಿತ್ತು. ಅಲ್ಲದೆ, ಮುಂಬೈಯಲ್ಲಿ ರಾಣಾ ಭಾರತ ಪರ ಆಡಲಿದ್ದಾರೆ ಎಂದೂ ಹೇಳಲಾಗುತ್ತಿತ್ತು. ಆದರೆ ಈ ಸಾಧ್ಯತೆನ್ನು ನಾಯರ್‌ ಅಲ್ಲಗೆಳೆದಿದ್ದಾರೆ.