ತ್ರಿಕೋನ ಸರಣಿ: ಆಸ್ಟ್ರೇಲಿಯ “ಎ’ ಬದಲು ಅಫ್ಘಾನಿಸ್ಥಾನ “ಎ’ ತಂಡ

Team Udayavani, Jul 18, 2017, 8:59 AM IST

ಜೊಹಾನ್ಸ್‌ಬರ್ಗ್‌: ಇದೇ ತಿಂಗಳು ದಕ್ಷಿಣ ಆಫ್ರಿಕಾದಲ್ಲಿ ಆರಂಭವಾಗಲಿರುವ “ಎ’ ತಂಡಗಳ ತ್ರಿಕೋನ ಸರಣಿಯಲ್ಲಿ ಒಂದು ಮಹತ್ತರ ಬದಲಾವಣೆ ಸಂಭವಿಸಿದೆ. ಆಸ್ಟ್ರೇಲಿಯ “ಎ’ ತಂಡದ ಬದಲು ಅಫ್ಘಾನಿಸ್ಥಾನ “ಎ’ ತಂಡ ಅವಕಾಶ ಪಡೆದಿದೆ.

ವೇತನ ವಿವಾದದ ಕಾರಣ ಆಸ್ಟ್ರೇಲಿಯ ಆಟಗಾರರು ಈ ಸರಣಿಯನ್ನು ಬಹಿಷ್ಕರಿಸಿದ್ದರು. ಹೀಗಾಗಿ “ಕ್ರಿಕೆಟ್‌ ಸೌತ್‌ ಆಫ್ರಿಕಾ’ (ಸಿಎಸ್‌ಎ) ಬದಲಿ ತಂಡವಾಗಿ ಅಫ್ಘಾನಿಸ್ಥಾನವನ್ನು ಆಹ್ವಾನಿಸಿತು. ಸರಣಿಯಲ್ಲಿ ಪಾಲ್ಗೊಳ್ಳಲಿರುವ ಉಳಿದೆರಡು ತಂಡಗಳೆಂದರೆ ದಕ್ಷಿಣ ಆಫ್ರಿಕಾ “ಎ’ ಹಾಗೂ ಭಾರತ “ಎ’. “ಅಫ್ಘಾನಿಸ್ಥಾನ ನಮ್ಮ ಆಹ್ವಾನವನ್ನು ಸ್ವೀಕರಿಸಿದೆ. ಅಫ್ಘಾನ್‌ ತಂಡ ಮೊದಲ ಬಾರಿಗೆ ದಕ್ಷಿಣ ಆಫ್ರಿಕಾಕ್ಕೆ ಆಗಮಿಸುವುದನ್ನು ನಾವು ಎದುರು ನೋಡುತ್ತಿದ್ದೇವೆ. ಅವರಿಗೆ ಸ್ವಾಗತ…’ ಎಂಬುದಾಗಿ ಸಿಎಸ್‌ಎ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಹರೂನ್‌ ಲಾರ್ಗಟ್‌ ಹೇಳಿದ್ದಾರೆ.

ಮನೀಷ್‌ ಪಾಂಡೆ ಭಾರತ “ಎ’ ತಂಡವನ್ನು ಮುನ್ನಡೆಸಲಿದ್ದಾರೆ. ಈ ಸರಣಿ ಮುಗಿದೊಡನೆ ದಕ್ಷಿಣ ಆಫ್ರಿಕಾ ಪ್ರವಾಸವನ್ನು ಮುಂದುವರಿಸಲಿರುವ ಭಾರತ “ಎ’, ಆತಿಥೇಯರ ವಿರುದ್ಧ 2 ಚತುರ್ದಿನ ಪಂದ್ಯಗಳನ್ನಾಡಲಿದೆ.