ಆಲ್‌ ಇಂಗ್ಲೆಂಡ್‌ ಬ್ಯಾಡ್ಮಿಂಟನ್‌ : ಸಿಂಧು ಓಟ ಸೆಮಿಯಲ್ಲಿ ಅಂತ್ಯ

Team Udayavani, Mar 21, 2021, 6:40 AM IST

ಬರ್ಮಿಂಗ್‌ಹ್ಯಾಮ್‌: ಆಲ್‌ ಇಂಗ್ಲೆಂಡ್‌ ಬ್ಯಾಡ್ಮಿಂಟನ್‌ ಕೂಟದಲ್ಲಿ ಪಿ.ವಿ. ಸಿಂಧು ಅವರ ಓಟ ಸೆಮಿಫೈನಲ್‌ನಲ್ಲಿ ಅಂತ್ಯಗೊಂಡಿದೆ. ಶನಿವಾರದ ಮುಖಾಮುಖೀಯಲ್ಲಿ ಥಾಯ್ಲೆಂಡ್‌ನ‌ ಪೊರ್ಣಪವೀ ಚೊಚುವಾಂಗ್‌ ವಿರುದ್ಧ ನಿರಾಶಾದಾಯಕ ಆಟವಾಡಿದ ಸಿಂಧು 17-21, 9-21 ನೇರ ಗೇಮ್‌ಗಳಿಂದ ಮುಗ್ಗರಿಸಿದರು. ಇದರಿಂದ ಈ ಪಂದ್ಯಾವಳಿಯಲ್ಲಿ ಮೊದಲ ಸಲ ಫೈನಲ್‌ ಪ್ರವೇಶಿಸುವ ಸಿಂಧು ಕನಸು ಭಗ್ನಗೊಂಡಿತು.

ಶುಕ್ರವಾರ ತಡರಾತ್ರಿ ನಡೆದ ಕ್ವಾರ್ಟರ್‌ ಫೈನಲ್‌ನಲ್ಲಿ ಸಿಂಧು ವಿಶ್ವದ 5ನೇ ಶ್ರೇಯಾಂಕಿತೆ, ಜಪಾನಿನ ಬಲಿಷ್ಠ ಆಟಗಾರ್ತಿ ಅಕಾನೆ ಯಮಾಗುಚಿ ಅವರನ್ನು 16-21, 21-16, 21-19 ಅಂತರದಿಂದ ಮಣಿಸಿ ಭಾರೀ ಭರವಸೆ ಮೂಡಿಸಿದ್ದರು. ಯಮಾಗುಚಿ ವಿರುದ್ಧ ಆಡಿದ ಕಳೆದ 4 ಪಂದ್ಯಗಳಲ್ಲಿ ಸಿಂಧು ಮೊದಲ ಗೆಲುವು ಕಂಡಿದ್ದರು.

ವಿಶ್ವದ 11ನೇ ರ್‍ಯಾಂಕಿಂಗ್‌ ಆಟಗಾರ್ತಿಯಾಗಿರುವ ಪೊರ್ಣಪವೀ ಚೊಚುವಾಂಗ್‌ ವಿರುದ್ಧ 4-1 ಮೇಲುಗೈ ದಾಖಲೆ ಹೊಂದಿರುವ ಕಾರಣ ಸಿಂಧು ಮೇಲೆ ಭಾರೀ ನಿರೀಕ್ಷೆ ಇರಿಸಲಾಗಿತ್ತು. ಆದರೆ ಇದು ಕೇವಲ 45 ನಿಮಿಷಗಳಲ್ಲಿ ಹುಸಿಗೊಂಡಿತು.