ಸಂಶಯಾತ್ಮಕ ಬೌಲಿಂಗ್ ಶೈಲಿ: ರಾಯುಡುಗೆ ಸಂಕಷ್ಟ 

Team Udayavani, Jan 13, 2019, 10:39 AM IST

ಸಿಡ್ನಿ: ಆತಿಥೇಯ ಆಸ್ಟ್ರೇಲಿಯಾ ವಿರುದ್ದದ ಪ್ರಥಮ ಏಕದಿನ ಪಂದ್ಯದಲ್ಲಿ ಮುಗ್ಗರಿಸಿರುವ ಭಾರತ ತಂಡಕ್ಕೆ ಮತ್ತೊಂದು ಸಂಕಷ್ಟ ಎದುರಾಗಿದೆ. ತಂಡದ ಅರೆಕಾಲಿಕ ಸ್ಪಿನ್ನರ್ ಅಂಬಟಿ ರಾಯುಡು ಅವರ ಬೌಲಿಂಗ್ ಶೈಲಿಯ ಮೇಲೆ ಅನುಮಾನ ವ್ಯಕ್ತವಾಗಿದೆ.
 
ಸಿಡ್ನಿಯಲ್ಲಿ ನಡೆದ ಮೊದಲ ಏಕದಿನ ಪಂದ್ಯದ ವೇಳೆ ರಾಯುಡು ಎರಡು ಓವರ್ ಬೌಲಿಂಗ್ ನಡೆಸಿದ್ದರು. ಈ ವೇಳೆ ರಾಯುಡು ಬೌಲಿಂಗ್ ಶೈಲಿ ಮಾಜಿ ಸ್ಪಿನ್ನರ್ ಮುತ್ತಯ್ಯ ಮುರಳೀಧರನ್ ಶೈಲಿಯನ್ನು ಹೋಲುವಂತಿತ್ತು. ಈ ಬೌಲಿಂಗ್ ಶೈಲಿ ‘ಚೆಂಡನ್ನು ಥ್ರೋ’ ಮಾಡುವಂತಿತ್ತು ಎಂದು ಪಂದ್ಯದ ನಂತರ ಸಂಬಂಧಪಟ್ಟ ಅಧಿಕಾರಿಗಳು ರಾಯುಡು ಬೌಲಿಂಗ್ ಬಗ್ಗೆ ಸಂಶಯ ವ್ಯಕ್ತಪಡಿಸಿ ತನಿಖೆಗೆ ಆದೇಶಿಸಿದ್ದಾರೆ. 

ಈ ಪ್ರಕರಣದಿಂದಾಗಿ ಹೈದರಾಬಾದ್ ಮೂಲದ ಆಟಗಾರ 14 ದಿನಗಳ ಒಳಗೆ ಐಸಿಸಿಯ ಬೌಲಿಂಗ್ ಟೆಸ್ಟ್ ಗೆ ಪಾಲ್ಗೊಳ್ಳಬೇಕು. ಆದರೆ ತನಿಖೆ ಮುಗಿಯುವವರೆಗೆ ಅಂತಾರಾಷ್ತ್ರೀಯ ಪಂದ್ಯಗಳಲ್ಲಿ ಬೌಲಿಂಗ್ ಮಾಡಬಹುದು ಎಂದು ಐಸಿಸಿ ಅಭಿಪ್ರಾಯ ಪಟ್ಟಿದೆ.