ಅಂಬಾಟಿ ರಾಯುಡು ಅಂತಾರಾಷ್ಟ್ರೀಯ ಕ್ರಿಕೆಟ್‌ ಬೌಲಿಂಗ್‌ನಿಂದ ಅಮಾನತು

Team Udayavani, Jan 28, 2019, 10:12 AM IST

ಹೊಸದಿಲ್ಲಿ : ಭಾರತೀಯ ಕ್ರಿಕೆಟ್‌ ತಂಡದ ಆಲ್‌ ರೌಂಡರ್‌ ಅಂಬಾಟಿ ರಾಯುಡು ಅವರನ್ನು ಐಸಿಸಿ, ತತ್‌ಕ್ಷಣದಿಂದ ಜಾರಿಗೆ ಬರುವಂತೆ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಬೌಲಿಂಗ್‌ನಿಂದ ಅಮಾನತುಗೊಳಿಸಿದೆ. ಈ ಅಮಾನತನ್ನು ಐಸಿಸಿ ಇಂದು ಸೋಮವಾರ ದೃಢಪಡಿಸಿದೆ. 

ಶಂಕಿತ ಬೌಲಿಂಗ್‌ ನಮೂನೆ ವರದಿಯಾದ 14 ದಿನಗಳ ವರೆಗೆ ರಾಯುಡುಗೆ  ಕಾನೂನು ಬದ್ಧ ಬೌಲಿಂಗ್‌ ಪರೀಕ್ಷೆಗೆ ಒಳಪಡುವುದಕ್ಕೆ ಅವಕಾಶ ಇರುವುದಿಲ್ಲ. ಹಾಗಾಗಿ ಅವರನ್ನು ತತ್‌ಕ್ಷಣದಿಂದ ಜಾರಿಗೆ ಬರುವಂತೆ ಐಸಿಸಿ ನಿಯಮಾವಳಿ 4.2ರ ಪ್ರಕಾರ ಬೌಲಿಂಗ್‌ನಿಂದ ಅಮಾನತುಗೊಳಿಸಲಾಗಿದೆ ಎಂದು ಐಸಿಸಿ ಹೇಳಿದೆ. 

ರಾಯುಡು ಅವರು ತನ್ನ ಬೌಲಿಂಗ್‌ ನಮೂನೆ ಕಾನೂನು ಬದ್ಧವಾಗಿದೆ ಎಂದು ಸಾಬೀತು ಪಡಿಸುವ ವರೆಗೆ ಈ ಅಮಾನತು ಮುಂದುವರಿಯಲಿದೆ. ಆಸ್ಟ್ರೇಲಿಯದ ವಿರುದ್ಧದ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ  ಕಳೆದ ಜನವರಿ 13ರಂದು ಸಿಡ್ನಿಯಲ್ಲಿ ನಡೆದಿದ್ದ  ಮತ್ತು ಭಾರತ ಏಳು ವಿಕೆಟ್‌ಗಳಿಂದ ಜಯಿಸಿದ್ದ  ಮೊದಲ ಪಂದ್ಯದಲ್ಲಿ  ಅಂಬಾಟಿ ರಾಯುಡು ಅವರ ಬೌಲಿಂಗ್‌ ನಮೂನೆ ಶಂಕಾಸ್ಪದವೆಂದು ವರದಿಯಾಗಿತ್ತು.