ಎಟಿಪಿ ಟೆನಿಸ್‌ ಟೂರ್ನಿ ಆರಂಭ: ಗೆಲುವಿನ ಆರಂಭ ಪಡೆದ ಆ್ಯಂಡಿ ಮರ್ರೆ

Team Udayavani, Aug 24, 2020, 8:20 AM IST

ನ್ಯೂಯಾರ್ಕ್‌: ಕೋವಿಡ್‌-19 ಕಾರಣದಿಂದ ಸ್ಥಗಿತಗೊಂಡಿದ್ದ ಎಟಿಪಿ ಟೆನಿಸ್‌ 5 ತಿಂಗಳ ಬಳಿಕ ಆರಂಭಗೊಂಡಿದೆ.

ಶನಿವಾರ ರಾತ್ರಿ ನ್ಯೂಯಾರ್ಕ್‌ನಲ್ಲಿ ‘ವೆಸ್ಟರ್ನ್ ಆ್ಯಂಡ್‌ ಸದರ್ನ್ ಓಪನ್‌ ಟೂರ್ನಿ’ ಮೊದಲ್ಗೊಂಡಿದ್ದು, ಬ್ರಿಟನಿನ ಆ್ಯಂಡಿ ಮರ್ರೆ ಗೆಲುವಿನ ಆರಂಭ ಪಡೆದರು.

ಮೊದಲ ಸುತ್ತಿನ ಪಂದ್ಯದಲ್ಲಿ ಆ್ಯಂಡಿ ಮರ್ರೆ ಅಮೆರಿಕದ ಫ್ರಾನ್ಸೆಸ್‌ ಟಿಯಾಫೂ ವಿರುದ್ಧ 7-6 (6), 6-3, 6-1 ಅಂತರದ ಗೆಲುವು ಸಾಧಿಸಿದರು. ಇದು 9 ತಿಂಗಳ ಬಳಿಕ ಮರ್ರೆ ಆಡಿದ ಮೊದಲ ಪಂದ್ಯವೆಂಬುದು ವಿಶೇಷ.

ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದ ಅವರು ವಿಶ್ರಾಂತಿಯಲ್ಲಿದ್ದರು. ಮರ್ರೆ ಅವರ ಮುಂದಿನ ಎದುರಾಳಿ ಜರ್ಮನಿಯ ಅಲೆಕ್ಸಾಂಡರ್‌ ಜ್ವೆರೇವ್‌.

ಕೊಕೊ ಗಾಫ್‌ ಪರಾಭವ
ವನಿತಾ ಸಿಂಗಲ್ಸ್‌ನಲ್ಲಿ ಅಮೆರಿಕದ 16ರ ಹರೆಯದ ಆಟಗಾರ್ತಿ ಕೊಕೊ ಗಾಫ್‌ ಮೊದಲ ಸುತ್ತಿನ ಆಘಾತಕ್ಕೆ ಸಿಲುಕಿದರು.

ಅವರನ್ನು ಗ್ರೀಕ್‌ನ ಮರಿಯಾ ಸಕ್ಕರಿ 6-1, 6-3 ಅಂತರದಿಂದ ಮಣಿಸಿದರು. ಎಕಟೆರಿನಾ ಅಲೆಕ್ಸಾಂಡ್ರೋವಾ, ವಿಕ್ಟೋರಿಯಾ ಅಜರೆಂಕಾ ಗೆಲುವಿನ ಆರಂಭ ಪಡೆದಿದ್ದಾರೆ.