ಅಂಟಾಲ್ಯ ಓಪನ್‌ ಟೆನಿಸ್‌: ಗುಣೇಶ್ವರನ್‌ ದ್ವಿತೀಯ ಸುತ್ತಿಗೆ

Team Udayavani, Jun 26, 2019, 5:20 AM IST

ಹೊಸದಿಲ್ಲಿ: ಭಾರತದ ಭರವಸೆಯ ಟೆನಿಸ್‌ ತಾರೆ ಪ್ರಜ್ಞೆಶ್‌ ಗುಣೇಶ್ವರನ್‌ ಅವರು ಟರ್ಕಿಯ ಅಂಟಾಲ್ಯದಲ್ಲಿ ಸಾಗುತ್ತಿರುವ ಅಂಟಾಲ್ಯ ಓಪನ್‌ ಎಟಿಪಿ 250 ಟೆನಿಸ್‌ ಕೂಟದಲ್ಲಿ ಮೊದಲ ಸುತ್ತಿನಲ್ಲಿ ಜಯಭೇರಿ ಬಾರಿಸಿದ್ದಾರೆ.
94ನೇ ರ್‍ಯಾಂಕಿನ ಗುಣೇಶ್ವರನ್‌ ಸದ್ಯ 286ನೇ ರ್‍ಯಾಂಕಿನಲ್ಲಿರುವ ಸರ್ಬಿಯಾದ ಜಾಂಕೊ ತಿಪ್ಸರೆವಿಕ್‌ ಅವರನ್ನು ನೇರ ಸೆಟ್‌ಗಳಿಂದ ಸೋಲಿಸಿ ಅಚ್ಚರಿಯ ಫ‌ಲಿತಾಂಶಕ್ಕೆ ಕಾರಣರಾದರು.
ಟೆನಿಸ್‌ ಬಾಳ್ವೆಯ ವೇಳೆ ಒಮ್ಮೆ ವಿಶ್ವದ ಎಂಟನೇ ರ್‍ಯಾಂಕ್‌ ಪಡೆದಿದ್ದ ತಿಪ್ಸರೆವಿಕ್‌ ಅನುಭವಿ ಮತ್ತು ಪ್ರಬಲ ಆಟಗಾರರಾಗಿದ್ದಾರೆ. ಅವರನ್ನು 6-0, 7-6 ಸೆಟ್‌ಗಳಿಂದ ಕೆಡಹಿದ ಗುಣೇಶ್ವರನ್‌ ಎಲ್ಲರ ಗಮನವನ್ನು ತನ್ನತ್ತ ಸೆಳೆದರು.
ಮೈನೆನಿಗೆ ಸೋಲು
ಲಂಡನ್‌ನಲ್ಲಿ ಸಾಗುತ್ತಿರುವ ವಿಂಬಲ್ಡನ್‌ ಅರ್ಹತಾ ಕೂಟದ ಮೊದಲ ಸುತ್ತಿನಲ್ಲಿ ಭಾರತದ ಸಾಕೇತ್‌ ಮೈನೆನಿ ಸೋತಿದ್ದಾರೆ. ಎರಡು ತಾಸು ಮತ್ತು 22 ನಿಮಿಷಗಳ ಸುದೀರ್ಘ‌ ಹೋರಾಟದಲ್ಲಿ ಅವರು ಸ್ಪೇನ್‌ನ ಗೈಲೆರ್ಮೊ ಗಾರ್ಸಿಯ ಲೊಪೆಜ್‌ ಅವರಿಗೆ 4-6, 6-4, 5-7 ಸೆಟ್‌ಗಳಿಂದ ಶರಣಾದರು.