ವಿಶ್ವಕಪ್‌ ಜಿಮ್ನಾಸ್ಟಿಕ್‌: ಅರುಣಾಗೆ ದಾಖಲೆಯ ಕಂಚು

Team Udayavani, Feb 25, 2018, 6:15 AM IST

ನವದೆಹಲಿ: ಒಲಿಂಪಿಕ್ಸ್‌ ಜಿಮ್ನಾಸ್ಟಿಕ್‌ನಲ್ಲಿ ದೀಪಾ ಕರ್ಮಾಕರ್‌ ಪ್ರಚಂಡ ಸಾಧನೆ ಮಾಡಿ ವಿಶ್ವದಾದ್ಯಂತ ಮಿಂಚಿದ ಬೆನ್ನಲ್ಲೇ ಭಾರತಕ್ಕೆ ಮತ್ತೂಂದು ಹೊಸ ತಾರೆಯ ಉದಯವಾಗಿದೆ.

ಮೆಲ್ಬರ್ನ್ನಲ್ಲಿ ನಡೆದ ವಿಶ್ವಕಪ್‌ ಜಿಮ್ನಾಸ್ಟಿಕ್‌ ವೈಯಕ್ತಿಕ ವಿಭಾಗದ ಕೂಟದಲ್ಲಿ 22 ವರ್ಷದ ಅರುಣಾ ಬುದ್ದ ರೆಡ್ಡಿ ಕಂಚಿನ ಪದಕ ಗೆದ್ದಿದ್ದಾರೆ. ಈ ಸಾಧನೆ ಮಾಡಿದ ಮೊದಲ ಭಾರತೀಯ ಸ್ಪರ್ಧಿ ಎನ್ನುವ ದಾಖಲೆ ಮಾಡಿದ್ದಾರೆ. ಅವರು ಒಟ್ಟಾರೆ 13.649 ಅಂಕ ಪಡೆದು ಕಂಚಿನ ಪದಕ ಗೆದ್ದರು. ಈ ವಿಭಾಗದಲ್ಲಿ ಸ್ಲೊವೇನಿಯಾದ ತಜಾಸ ಕೈಸೆಲ್ಫ್ ಚಿನ್ನದ ಪದಕ ಗೆದ್ದರು. ಆಸ್ಟ್ರೇಲಿಯಾದ ಎಮಿಲಿ ಟೈಟ್‌ಹೆಡ್‌ ಬೆಳ್ಳಿ ಪದಕ ಪಡೆದುಕೊಂಡರು. ಭಾರತವನ್ನು ಪ್ರತಿನಿಧಿಸಿದ್ದ ಮತ್ತೋರ್ವ ಸ್ಪರ್ಧಿ ಪ್ರಣತಿ ನಾಯಕ್‌ 6ನೇ ಸ್ಥಾನ ಪಡೆದುಕೊಂಡರು.

ಕರಾಟೆಯಿಂದ ಜಿಮ್ನಾಸ್ಟಿಕ್‌ಗೆ ಅರುಣಾ: ಅರುಣಾ ರೆಡ್ಡಿ ಮೂಲತಃ ಕರಾಟೆ ಪಟು. ಬ್ಲ್ಯಾಕ್‌ಬೆಲ್ಟ್ ಹೊಂದಿದ್ದಾರೆ. 2005ರಲ್ಲಿ ರೆಡ್ಡಿ ರಾಷ್ಟ್ರೀಯ ಪದಕ ಗೆದ್ದಿದ್ದರು. 2014ರಲ್ಲಿ ನಡೆದ ಕಾಮನ್ವೆಲ್ತ್‌ ಗೇಮ್ಸ್‌ ಅರ್ಹತಾ ಕೂಟದಲ್ಲಿ ಭಾಗವಹಿಸಿದ್ದರು. ಆದರೆ 14ನೇ ಸ್ಥಾನವನ್ನಷ್ಟೇ ಪಡೆಯಲು ಸಾಧ್ಯವಾಗಿತ್ತು. ಅದೇ ವರ್ಷ ಏಷ್ಯನ್‌ ಗೇಮ್ಸ್‌ ಅರ್ಹತಾ ಕೂಟದಲ್ಲಿಯೂ 9ನೇ ಸ್ಥಾನ ಪಡೆದರು. 2017ರಲ್ಲಿ ನಡೆದ ಏಷ್ಯನ್‌ ಗೇಮ್ಸ್‌ ಅರ್ಹತಾ ಕೂಟದಲ್ಲಿ ಅರುಣಾ 6ನೇ ಸ್ಥಾನ ಪಡೆದುಕೊಂಡಿದ್ದನ್ನು ಸ್ಮರಿಸಬಹುದು.

ದೀಪಾ ನಂತರ ಆಶಾದೀಪಾ: 2010ರಲ್ಲಿ ನಡೆದ ಕಾಮನ್ವೆಲ್ತ್‌ ಗೇಮ್ಸ್‌ನಲ್ಲಿ ಆಶೀಶ್‌ ಕುಮಾರ್‌ ಕಂಚಿನ ಪದಕ ಗೆದ್ದಿದ್ದರು. ಇದು ವಿಶ್ವಮಟ್ಟದಲ್ಲಿ ಭಾರತಕ್ಕೆ ಸಿಕ್ಕಿದ ಮೊದಲ ಪದಕ. ಇದಾಗಿ 6 ವರ್ಷದ ಬಳಿಕ ರಿಯೋ ಒಲಿಂಪಿಕ್ಸ್‌ಗೆ ಅಗರ್ತಲಾದ ದೀಪಾ ಕರ್ಮಾಕರ್‌ ತೇರ್ಗಡೆ ಹೊಂದಿದ್ದಲ್ಲದೆ ಅಲ್ಲಿ ಭರ್ಜರಿ ಪ್ರದರ್ಶನ ನೀಡಿ ಸ್ವಲ್ಪದರಲ್ಲೇ ಪದಕ ಮಿಸ್‌ ಮಾಡಿಕೊಂಡಿದ್ದರು. 52 ವರ್ಷದ ಇತಿಹಾಸದಲ್ಲಿ ದೀಪಾ ಜಿಮ್ನಾಸ್ಟಿಕ್‌ ಇತಿಹಾಸ ಬದಲಾಯಿಸಿದ್ದರು ಎನ್ನುವುದು ವಿಶೇಷ. ಇದೀಗ ಮತ್ತೂಂದು ಪ್ರತಿಭೆ ಸಿಕ್ಕಿರುವುದರಿಂದ ಮುಂಬರುವ ಕೂಟದಲ್ಲಿ ಭಾರತಕ್ಕೆ ಜಿಮ್ನಾಸ್ಟಿಕ್‌ನಲ್ಲಿ ಪದಕ ಗೆಲ್ಲುವ ಸಾಧ್ಯತೆ ಹೆಚ್ಚಿಸಿದೆ.