ಅಶ್ವಿ‌ನ್‌ಗೆ ವರ್ಷದ ಕ್ರಿಕೆಟಿಗ ಪ್ರಶಸ್ತಿ

Team Udayavani, May 25, 2017, 12:25 PM IST

ಮುಂಬಯಿ: ಟೀಮ್‌ ಇಂಡಿಯಾದ ಆಫ್ ಸ್ಪಿನ್ನರ್‌ ರವಿಚಂದ್ರನ್‌ ಅಶ್ವಿ‌ನ್‌ ಸಿಯೆಟ್‌ ಕ್ರಿಕೆಟ್‌ ರೇಟಿಂಗ್‌ (ಸಿಸಿಆರ್‌) ಅಂತಾರಾಷ್ಟ್ರೀಯ ಪ್ರಶಸ್ತಿ ಕಾರ್ಯಕ್ರಮದಲ್ಲಿ ಪ್ರತಿಷ್ಠಿತ ವರ್ಷದ ಅಂತಾರಾಷ್ಟ್ರೀಯ ಕ್ರಿಕೆಟಿಗ ಪ್ರಶಸ್ತಿಗೆ ಗೆದ್ದುಕೊಂಡಿದ್ದಾರೆ.

ಭಾರತ ತಂಡದ ಮಾಜಿ ನಾಯಕ ಸುನೀಲ್‌ ಗಾವಸ್ಕರ್‌ ಮತ್ತು ಆರ್‌ಪಿಜಿ ಎಂಟರ್‌ಪ್ರೈಸಸ್‌ನ ಚೇರ್ಮನ್‌ ಹರ್ಷ ಗೋಯೆಂಕಾ ಅವರು ಕ್ರಿಕೆಟ್‌ ಕ್ಲಬ್‌ ಆಫ್ ಇಂಡಿಯಾದಲ್ಲಿ ನಡೆದ ಸಮಾರಂಭದಲ್ಲಿ ಅಶ್ವಿ‌ನ್‌ ಅವರಿಗೆ ಪ್ರಶಸ್ತಿ ವಿತರಿಸಿದರು.

ತವರಿನಲ್ಲಿ ನಡೆದ ಟೆಸ್ಟ್‌ ಸರಣಿಗಳಲ್ಲಿ ಅಶ್ವಿ‌ನ್‌ ಗರಿಷ್ಠ ಸಂಖ್ಯೆಯಲ್ಲಿ ವಿಕೆಟ್‌ ಉರುಳಿಸಿದ್ದರು. ನ್ಯೂಜಿಲ್ಯಾಂಡ್‌, ಇಂಗ್ಲೆಂಡ್‌, ಬಾಂಗ್ಲಾ ದೇಶ ಮತ್ತು ಆಸ್ಟ್ರೇಲಿಯ ವಿರುದ್ಧ ನಡೆದ 13 ಟೆಸ್ಟ್‌ಗಳಲ್ಲಿ ಭಾರತ 10ರಲ್ಲಿ ಜಯ ಸಾಧಿಸುವಲ್ಲಿ ಅಶ್ವಿ‌ನ್‌ ಮಹತ್ತರ ಕೊಡುಗೆ ಸಲ್ಲಿಸಿದ್ದರು. ಕಳೆದ 12 ತಿಂಗಳಲ್ಲಿ ಅಶ್ವಿ‌ನ್‌ 99 ವಿಕೆಟ್‌ ಕಿತ್ತ ಸಾಧನೆ ಮಾಡಿದ್ದರು.ಮುಂಬಯಿಯಲ್ಲಿ ನಡೆದ ಭಾರತ- ಇಂಗ್ಲೆಂಡ್‌ ನಡುವಣ ಅಂಡರ್‌-19 ಏಕದಿನ ಸರಣಿಯಲ್ಲಿ ಅಮೋಘ ನಿರ್ವಹಣೆ ನೀಡಿದ ಯುವ ಬ್ಯಾಟ್ಸ್‌ ಮನ್‌ ಶುಭ್‌ಮನ್‌ ಗಿಲ್‌ ಅವರಿಗೆ ವರ್ಷದ ಯುವ ಆಟಗಾರ ಪ್ರಶಸ್ತಿ ನೀಡಲಾಗಿದೆ.

ಚೆನ್ನೈಯ ಚಿಪಾಕ್‌ ಕ್ರೀಡಾಂಗಣದಲ್ಲಿ ಗಾವಸ್ಕರ್‌ ಅವರಿಂದ ಮೊದಲ ಬಾರಿ ಅಟೋಗ್ರಾಫ್ ಪಡೆದ ಕ್ಷಣವನ್ನು ನೆನ ಪಿಸಿಕೊಂಡ ಅಶ್ವಿ‌ನ್‌ ಅವರು ಐಪಿಎಲ್‌ನಲ್ಲಿ ರೈಸಿಂಗ್‌ ಪುಣೆ ಸೂಪರ್‌ಜೈಂಟ್‌ ತಂಡದ ಪರ ಆಡಿದ ತಮಿಳುನಾಡಿನ ಆಫ್ ಸ್ಪಿನ್ನರ್‌ ವಾಷಿಂಗ್ಟನ್‌ ಸುಂದರ್‌ ಅವರ ಅಮೋಘ ನಿರ್ವಹಣೆಗೆ ಮೆಚ್ಚುಗೆ ವ್ಯಕ್ತಪಡಿಸಿದರು.

ವಿಜಯ್‌ ಹಜಾರೆ ಟ್ರೋಫಿಯಲ್ಲೂ ವಾಷಿಂಗ್ಟನ್‌ ಉತ್ತಮ ನಿರ್ವಹಣೆ ದಾಖಲಿಸಿದ್ದರು. ಟ್ವೆಂಟಿ 20 ಕ್ರಿಕೆಟ್‌ನಲ್ಲಿ ಹೇಗೆ ಬೌಲಿಂಗ್‌ ಮಾಡಬೇಕೆಂದು ಅವ ರಿಗೆ ಚೆನ್ನಾಗಿ ತಿಳಿದಿದೆ. ಅವರೊಬ್ಬ ಭವಿಷ್ಯದ ತಾರೆಯಾಗಿ ಮಿಂಚುವ ಸಾಧ್ಯತೆಯಿದೆ ಎಂದು ಅಶ್ವಿ‌ನ್‌ ತಿಳಿಸಿದರು.

ಚಾಂಪಿಯನ್ಸ್‌ ಟ್ರೋಫಿಗೆ ಹೊಸ ಅಸ್ತ್ರ
ಮುಂಬಯಿ; ಎರಡು ತಿಂಗಳ ವಿಶ್ರಾಂತಿಯ ಬಳಿಕ ಪೂರ್ಣ ಪ್ರಮಾಣದಲ್ಲಿ ಮುಂಬರುವ ಚಾಂಪಿಯನ್ಸ್‌ ಟ್ರೋಫಿ ಕ್ರಿಕೆಟ್‌ ಕೂಟಕ್ಕೆ ಭಾರತದ ಪ್ರಮುಖ ಆಫ್ ಸ್ಪಿನ್ನರ್‌ ರವಿಚಂದ್ರನ್‌ ಅಶ್ವಿ‌ನ್‌ ಸಜ್ಜಾಗಿದ್ದಾರೆ. ಚೀಲತುಂಬ ಹೊಸ ತಂತ್ರ ಮತ್ತು ಅಸ್ತ್ರಗಳೊಂದಿಗೆ ಸಿದ್ಧವಾಗಿರುವ ಅಶ್ವಿ‌ನ್‌ ಚಾಂಪಿಯನ್ಸ್‌ ಟ್ರೋಫಿ ಕೂಟದ ವೇಳೆ ಎದುರಾಳಿ ತಂಡಗಳ ಮೇಲೆ ಪ್ರಯೋಗಿಸಲಿದ್ದಾರೆ.

ತವರಿನಲ್ಲಿ 13 ಟೆಸ್ಟ್‌ಗಳಲ್ಲಿ ಆಡಿ ಸುಸ್ತಾಗಿದ್ದ ಅಶ್ವಿ‌ನ್‌ ಅವರಿಗೆ ಐಪಿಎಲ್‌ ವೇಳೆ ಪೂರ್ಣ ವಿಶ್ರಾಂತಿ ಪಡೆಯುವಂತೆ ಸೂಚಿಸಲಾಗಿತ್ತು. ಅಶ್ವಿ‌ನ್‌ ಅವರ ಮುಂದಿನ ಕೆಲಸ ಚಾಂಪಿಯನ್ಸ್‌ ಟ್ರೋಫಿಯನ್ನು ರಕ್ಷಿಸಿಕೊಳ್ಳುವುದು ಆಗಿದೆ. ಚಾಂಪಿಯನ್ಸ್‌ ಟ್ರೋಫಿಯಲ್ಲಿ ಕೆಲವೊಂದು ಹೊಸ ಅಸ್ತ್ರವನ್ನು ಬಳಸುವ ಸಾಧ್ಯತೆಯಿದೆ. ಅಂತಹ ಅಸ್ತ್ರ ಬಳಸುವಷ್ಟು ಸಾಮರ್ಥ್ಯವನ್ನು ನಾನು ಹೊಂದಿದ್ದೇನೆ. ನ್ಯೂಜಿಲ್ಯಾಂಡ್‌ ಮತ್ತು ಬಾಂಗ್ಲಾದೇಶ ವಿರುದ್ಧ ನಡೆಯಲಿರುವ ಎರಡು ಅಭ್ಯಾಸ ಪಂದ್ಯಗಳು ನಾನು ಎಷ್ಟರಮಟ್ಟಿಗೆ ಕೂಟಕ್ಕೆ ಸಿದ್ಧಗೊಂಡಿದ್ದೇನೆ ಎಂಬುದನ್ನು ತಿಳಿಸಲಿದೆ ಎಂದು ಅಶ್ವಿ‌ನ್‌ ತಿಳಿಸಿದರು.

ಚೆಂಡಿನ ಏರಿಳಿತಗಳು ಯಾವ ರೀತಿ ಸಾಗುತ್ತವೆ ಎಂಬುದರ ಮೇಲೆ ನನ್ನ ದಾಳಿಯ ತೀವ್ರತೆ ನಿರ್ಧ ರಿಸಲಿದೆ. ಹಾಗಾಗಿ ಇಂತಹ ಅಭ್ಯಾಸ ಪಂದ್ಯಗಳು ನನ್ನ ಅಸ್ತ್ರ ಬಳಕೆಗೆ ಒಳ್ಳೆಯ ರೀತಿಯಲ್ಲಿ ಉಪಯೋಗಿಸುವೆ ಮತ್ತು ಈ ಮೂಲಕ ತಂಡಕ್ಕೆ ಹೊಸತನ್ನು ನೀಡುವೆ ಎಂದು ಅಶ್ವಿ‌ನ್‌ ಆತ್ಮವಿಶ್ವಾಸದಿಂದ ನುಡಿದರು.

ಏಕದಿನ ಕ್ರಿಕೆಟ್‌ನ ಹೊಸ ನಿಯಮದಿಂದಾಗಿ ಪ್ರತಿಯೊಬ್ಬ ಬೌಲರ್‌ ಹೊಸ ರೀತಿಯಲ್ಲಿ ದಾಳಿ ನಡೆಸುವುದನ್ನು ಆಲೋಚಿಸಬೇಕಾಗಿದೆ. ಏಕದಿನ ಮಾದರಿಯ ಕ್ರಿಕೆಟ್‌ನಲ್ಲಿ ಐಸಿಸಿ ಮಾಡಿರುವ ನಿಯಮ ಬದಲಾವಣೆ ಒಳ್ಳೆಯದೇ. ಯಾಕೆಂದರೆ ಒಂದೇ ರೀತಿಯಲ್ಲಿ ಬೌಲಿಂಗ್‌ ದಾಳಿ ನಡೆಸುವುದರಿಂದ ಯಾವುದೇ ಅರ್ಥವಿಲ್ಲ. ನಮ್ಮ ಬೌಲಿಂಗ್‌ ಶೈಲಿ ಬದಲಾಯಿಸಿಕೊಳ್ಳಲು ಪಂದ್ಯ ಅವಕಾಶ ಕಲ್ಪಿಸಿ ದರೆ ಒಳ್ಳೆಯದು. ಪಂದ್ಯವನ್ನು ಯಾವ ರೀತಿ ಬದ ಲಾಯಿಸುವ ಕುರಿತು ನನ್ನ ತಲೆ ಓಡುತ್ತಿತ್ತು ಎಂದು ಅಶ್ವಿ‌ನ್‌ ವಿವರಿಸಿದರು.