ಭಾರತ ಆತಿಥ್ಯದ ಏಶ್ಯನ್‌ ಬಾಕ್ಸಿಂಗ್‌ ಚಾಂಪಿಯನ್‌ಶಿಪ್‌ ಮುಂದೂಡಿಕೆ

Team Udayavani, Aug 18, 2020, 10:08 PM IST

ಹೊಸದಿಲ್ಲಿ: ವರ್ಷಾಂತ್ಯ ಭಾರತದ ಆತಿಥ್ಯದಲ್ಲಿ ನಡೆಯಬೇಕಿದ್ದ ಏಶ್ಯನ್‌ ಬಾಕ್ಸಿಂಗ್‌ ಚಾಂಪಿಯನ್‌ಶಿಪ್‌ ಪಂದ್ಯಾವಳಿಯನ್ನು ಕೊರೊನಾ ಕಾರಣದಿಂದ ಮುಂದಿನ ವರ್ಷಕ್ಕೆ ಮುಂದೂಡಲು ನಿರ್ಧರಿಸಲಾಗಿದೆ. ಭಾರತೀಯ ಬಾಕ್ಸಿಂಗ್‌ ಅಸೋಸಿಯೇಶನ್‌ ಕಾರ್ಯದರ್ಶಿ ಜಯ್‌ ಕೋವ್ಲಿ ಈ ವಿಷಯವನ್ನು ಪ್ರಕಟಿಸಿದರು.

“ಕೊರೊನಾ ನಿಯಂತ್ರಣಕ್ಕೆ ಬಾರದ ಕಾರಣ ಬಾಕ್ಸಿಂಗ್‌ ಕೂಟವನ್ನು ಮುಂದೂಡುವುದು ಅನಿವಾರ್ಯವಾಗಿದೆ. 2021ರಲ್ಲಿ ಇದು ಭಾರತದಲ್ಲೇ ನಡೆಯಲಿದ್ದು, ನವೆಂಬರ್‌ ಸಭೆಯಲ್ಲಿ ದಿನಾಂಕವನ್ನು ನಿರ್ಧರಿಸಲಾಗುವುದು’ ಎಂದು ಕೋವ್ಲಿ ಹೇಳಿದರು.

ಭಾರತ 1980ರಷ್ಟು ಹಿಂದೆ ಪುರುಷರ ಏಶ್ಯನ್‌ ಬಾಕ್ಸಿಂಗ್‌ ಪಂದ್ಯಾವಳಿಯನ್ನು ನಡೆಸಿತ್ತು. ಬಳಿಕ 2003ರಲ್ಲಿ ಹಿಸಾರ್‌ನಲ್ಲಿ ಏಶ್ಯನ್‌ ವನಿತಾ ಬಾಕ್ಸಿಂಗ್‌ ಕೂಟವನ್ನು ಸಂಘಟಿಸಿತ್ತು. ಕಳೆದ ವರ್ಷದಿಂದ ಪುರುಷರ ಹಾಗೂ ವನಿತೆಯರ ಸ್ಪರ್ಧೆಯನ್ನು ಒಟ್ಟಿಗೇ ನಡೆಸಲು ನಿರ್ಧರಿಸಲಾಗಿತ್ತು.

ಟೋಕಿಯೊ ಒಲಿಂಪಿಕ್ಸ್‌ ಅರ್ಹತೆ ಸಂಪಾದಿಸಲು ಇದೊಂದು ಮಹತ್ವದ ಕೂಟವಾಗಿದೆ. ಈವರೆಗೆ ಭಾರತದ 5 ಪುರುಷರು ಮತ್ತು 4 ವನಿತೆಯರು ಒಲಿಂಪಿಕ್ಸ್‌ ಅರ್ಹತೆ ಪಡೆದಿದ್ದಾರೆ.