ಏಶ್ಯಕಪ್‌ ಟಿ20 ಆಯೋಜನೆ ನಿರ್ಧಾರ ತಡೆಹಿಡಿದ ಎಸಿಸಿ

Team Udayavani, Jun 10, 2020, 10:07 AM IST

ಹೊಸದಿಲ್ಲಿ: ಏಶ್ಯನ್‌ ಕ್ರಿಕೆಟ್‌ ಕೌನ್ಸಿಲ್‌ (ಎಸಿಸಿ) ಮಂಗಳವಾರ ನಡೆಸಿದ ತನ್ನ ಕಾರ್ಯಕಾರಿ ಮಂಡಳಿಯ ಸಭೆಯಲ್ಲಿ ಈ ವರ್ಷದ ಏಶ್ಯಕಪ್‌ ಟಿ20 ಕ್ರಿಕೆಟ್‌ ಕೂಟದ ಆಯೋಜನೆ ಕುರಿತ ನಿರ್ಧಾರವನ್ನು ತಡೆಹಿಡಿದಿದೆ. ಇದೇ ವೇಳೆ ಈ ಕೂಟದ ಆತಿಥ್ಯ ವಹಿಸಲು ಶ್ರೀಲಂಕಾ ಸಿದ್ಧವಿದೆ ಎಂದು ತಿಳಿಸಿದೆ.

ಏಶ್ಯಕಪ್‌ ಟಿ0 ಕೂಟ ಪಾಕಿಸ್ಥಾನದಲ್ಲಿ ನಡೆಯಬೇಕಿತ್ತು. ಆದರೆ ಇದೀಗ ಕೂಟ ಆಯೋಜನೆಯ ಪ್ರಸ್ತಾವಕ್ಕೆ ಪಾಕಿಸ್ತಾನ ಕ್ರಿಕೆಟ್‌ ಮಂಡಳಿ ಮತ್ತು ಎಸಿಸಿ ಒಪ್ಪಿಗೆ ಸೂಚಿಸಿವೆ ಎಂದು ಶ್ರೀಲಂಕಾ ಕ್ರಿಕೆಟ್‌ನ ಮುಖ್ಯಸ್ಥ ಶಮ್ಮಿ ಸಿಲ್ವ ಹೇಳಿದ್ದಾರೆ.  ಈ ಕೂಟವು ಸಪ್ಟೆಂಬರ್‌ನಲ್ಲಿ ನಡೆಯಬೇಕಾಗಿದೆ ಮತ್ತು ಪಾಕಿಸ್ಥಾನ ಆತಿಥ್ಯ ವಹಿಸಬೇಕಾಗಿದೆ. ಆದರೆ ಸದ್ಯದ ಪರಿಸ್ಥಿತಿಯಲ್ಲಿ ಭಾರತವು ಪಾಕಿಸ್ಥಾನಕ್ಕೆ ಪ್ರಯಾಣಿಸಲು ನಿರಾಕರಿಸುತ್ತಿರುವ ಕಾರಣ ಕೂಟವನ್ನು ಬೇರೆ ದೇಶಕ್ಕೆ ಬದಲಾಯಿಸಬೇಕಾದ ಅನಿವಾರ್ಯತೆಯಿದೆ.

ಪಿಸಿಬಿ ಜತೆ ನಾವು ಈಗಾಗಲೇ ಮಾತನಾಡಿದ್ದೇವೆ ಮತ್ತು ಸದ್ಯದ ಸ್ಥಿತಿಯಲ್ಲಿ ಕೂಟ ಆಯೋಜಿಸುವ ನಮ್ಮ ಪ್ರಸ್ತಾವಕ್ಕೆ ಒಪ್ಪಿಗೆ ಸೂಚಿಸಿದ್ದಾರೆ. ಇಷ್ಟು ಮಾತ್ರವಲ್ಲದೇ ಎಸಿಸಿ ಜತೆ ಆನ್‌ಲೈನ್‌ನಲ್ಲಿ ಮಾತನಾಡಿದ್ದು ಅವರು ಕೂಡ ಒಪ್ಪಿಗೆ ನೀಡಿದ್ದಾರೆ ಎಂದು ಶಮ್ಮಿ ಸಿಲ್ವ ಹೇಳಿರುವ ಮಾತನ್ನು ಶ್ರೀಲಂಕಾ ಪತ್ರಿಕೆ ಸಿಲೋನ್‌ ಟುಡೇ ವರದಿ ಮಾಡಿದೆ. ಆಸ್ಟ್ರೇಲಿಯಲ್ಲಿ ಅಕ್ಟೋಬರ್‌-ನವೆಂಬರ್‌ನಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್‌ ಬಗ್ಗೆ ಐಸಿಸಿಯ ನಿರ್ಧಾರವನ್ನು ಗಮನಿಸಿ ಎಸಿಸಿ ಏಶ್ಯಕಪ್‌ ಕುರಿತು ತನ್ನ ನಿರ್ಧಾರ ಪ್ರಕಟಿಸುವ ಸಾಧ್ಯತೆಯಿದೆ.