ವನಿತಾ ಹಾಕಿ: ಭಾರತಕ್ಕೆ ಬೃಹತ್‌ ಗೆಲುವು

Team Udayavani, Aug 22, 2018, 6:00 AM IST

ಜಕಾರ್ತಾ: ನಾಲ್ವರು ಭಾರತೀಯರು ದಾಖಲಿಸಿದ ಹ್ಯಾಟ್ರಿಕ್‌ ಗೋಲಿನ ನೆರವಿನಿಂದ ಭಾರತೀಯ ವನಿತಾ ಹಾಕಿ ತಂಡವು ಗೇಮ್ಸ್‌ನ ವನಿತಾ ಹಾಕಿ ಸ್ಪರ್ಧೆಯಲ್ಲಿ ಕಝಾಕ್‌ಸ್ಥಾನ ತಂಡವನ್ನು 21-0 ಗೋಲುಗಳಿಂದ ಬೃಹತ್‌ ಗೆಲುವು ದಾಖಲಿಸಿದೆ. ಇದು ಭಾರತದ ಎರಡನೇ ಜಯವಾಗಿದೆ. ಮೊದಲ ಪಂದ್ಯದಲ್ಲಿ ಭಾರತ ಇಂಡೋನೇಶ್ಯವನ್ನು 8-0 ಗೋಲುಗಳಿಂದ ಕೆಡಹಿತ್ತು.

“ಬಿ’ ಬಣದ ಈ ಪಂದ್ಯದಲ್ಲಿ ಭಾರತೀಯರು ಗೋಲುಗಳ ಮಳೆ ಸುರಿಸಿದರು. 10 ಮಂದಿ ಈ ಪಂದ್ಯದಲ್ಲಿ ಆಡಿದ್ದು ಎಲ್ಲರೂ ಗೋಲು ಹೊಡೆದ ಸಂಭ್ರಮ ಅನುಭವಿಸಿದ್ದಾರೆ. ಯಾವುದೇ ಪ್ರತಿರೋಧ ನೀಡದ ಕಝಾಕ್‌ಸ್ಥಾನವನ್ನು ಬಗ್ಗುಬಡಿದ ಭಾರತೀಯರು ಒಂದು ಗೋಲಿನಿಂದ ದಾಖಲೆಯ ಗೆಲುವು ದಾಖಲಿಸಲು ವಿಫ‌ಲರಾದರು. 22-0 ಗೋಲುಗಳಿಂದ ಜಯ ಸಾಧಿಸಿರುವುದು ಏಶ್ಯನ್‌ ಗೇಮ್ಸ್‌ನ ಸಾರ್ವಕಾಲಿಕ ದಾಖಲೆಯಾಗಿದೆ. 1982ರ ಏಶ್ಯಾಡ್‌ನ‌ಲ್ಲಿ ಭಾರತೀಯ ವನಿತೆಯರು ಹಾಂಕಾಂಗ್‌ ತಂಡವನ್ನು 22-0 ಗೋಲುಗಳಿಂದ ಸೋಲಿಸಿದ್ದರು.

ನವನೀತ್‌ ಕೌರ್‌ ಐದು ಗೋಲು ಹೊಡೆದು ಸಂಭ್ರಮಿಸಿದ್ದಾರೆ. ಡ್ರ್ಯಾಕ್‌ ಫ್ಲಿಕರ್‌ ಗುರ್ಜಿತ್‌ ಕೌರ್‌ ನಾಲ್ಕು ಗೋಲು ಗಳಿಸಿದ್ದಾರೆ. ಅವರು ಇಂಡೋನೇಶ್ಯ ವಿರುದ್ಧದ ಪಂದ್ಯದಲ್ಲೂ ಹ್ಯಾಟ್ರಿಕ್‌ ಗೋಲು ಹೊಡೆದಿದ್ದರು.