Asian Games ವೈಯಕ್ತಿಕ ಡ್ರೆಸ್ಸೇಜ್‌: ಅನುಷ್‌ಗೆ ಕಂಚು

Team Udayavani, Sep 28, 2023, 11:25 PM IST

ಹ್ಯಾಂಗ್‌ಝೂ: ಭಾರತದ ಅನುಷ್‌ ಅಗರ್ವಾಲಾ ಅವರು ಈಕ್ವೆಸ್ಟ್ರಿಯನ್‌ ಸ್ಪರ್ಧೆಯ ವೈಯಕ್ತಿಕ ಡ್ರೆಸ್ಸೇಜ್‌ ವಿಭಾಗದಲ್ಲಿ ಕಂಚಿನ ಪದಕ ಗೆದ್ದ ಸಾಧನೆ ಮಾಡಿದ್ದಾರೆ. ಒಟ್ಟಾರೆ 73.030 ಅಂಕ ಗಳಿಸಿದ ಅವರು ಮೂರನೇ ಸ್ಥಾನ ಪಡೆದರು. ಇದು ಈ ಗೇಮ್ಸ್‌ನಲ್ಲಿ ಅವರು ಪಡೆದ ಎರಡನೇ ಪದಕವಾಗಿದೆ.

ಈ ಮೊದಲು ಅವರು ಡ್ರೆಸ್ಸೇಜ್‌ ವಿಭಾಗದ ತಂಡ ಸ್ಪರ್ಧೆಯಲ್ಲಿ ಹೃದಯ್‌ ವಿವುಲ್‌ ಚೆಡ್ಡಾ, ದಿವ್ಯಾಕೃತಿ ಸಿಂಗ್‌ ಮತ್ತು ಸುದೀಪ್ತಿ ಹಜೇಲ ಅವರ ಜತೆಗೂಡಿ ಚಿನ್ನದ ಪದಕ ಜಯಿಸಿದ್ದರು. ಭಾರತ ಈ ವಿಭಾಗದಲ್ಲಿ 41 ವರ್ಷಗಳ ಸುದೀರ್ಘ‌ ಸಮಯದ ಬಳಿಕ ಚಿನ್ನ ಗೆದ್ದ ಸಾಧನೆ ಮಾಡಿತ್ತು.
ವೈಯಕ್ತಿಕ ವಿಭಾಗದಲ್ಲಿ ಭಾರತದ ಇನ್ನೋರ್ವ ಸ್ಪರ್ಧಿ ಹೃದಯ್‌ ವಿಪುಲ್‌ ಚೆಡ್ಡಾ ಬುಧವಾರ ನಡೆದ ಅರ್ಹತಾ ಸುತ್ತಿನಲ್ಲಿ ಅಗ್ರಸ್ಥಾನ ಪಡೆದಿದ್ದರು. ಆದರೆ ಈ ವೇಳೆ ಅನರ್ಹಗೊಂಡ ಅವರು ಪದಕ ಸ್ಪರ್ಧೆಯಲ್ಲಿ ಕಾಣಿಸಿಕೊಳ್ಳಲಿಲ್ಲ. ಮಲೇಷ್ಯಾದ ಬಿನ್‌ ಮಹಮದ್‌ ಫಾತಿಲ್‌ ಚಿನ್ನದ ಪದಕ ಪಡೆದರೆ ಹಾಂಕಾಂಗ್‌ನ ಜಾಕ್ವೆಲಿನ್‌ ವಿಂಗ್‌ ಯಿಂಗ್‌ ಸಿಯು ಬೆಳ್ಳಿ ಗೆದ್ದರು.