Asian Games ಪುರುಷರ ಹಾಕಿ: 10-2ರಿಂದ ಪಾಕಿಸ್ಥಾನವನ್ನು ಮಣಿಸಿದ ಭಾರತ

Team Udayavani, Sep 30, 2023, 10:26 PM IST

ಹ್ಯಾಂಗ್ ಝೂ: 19 ನೇ ಏಷ್ಯನ್ ಗೇಮ್ಸ್ ಟೀಮ್ ಈವೆಂಟ್‌ನಲ್ಲಿ ಶನಿವಾರ ಭಾರತ ಅತ್ಯಮೋಘ ಸಾಧನೆ ತೋರಿದ್ದು ಪುರುಷರ ಹಾಕಿಯಲ್ಲಿ ಪಾಕಿಸ್ಥಾನದ ವಿರುದ್ಧ 10-2 ಗೋಲುಗಳ ಗೆಲುವಿನ ಕೇಕೆ ಹಾಕಿದೆ. “ಎ’ ಬಣದ ಪಂದ್ಯದಲ್ಲಿ ಒಂದಾದರ ಮೇಲೆ ಒಂದರಂತೆ ಗೋಲುಗಳನ್ನು ಬಾರಿಸಿ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ಥಾನಕ್ಕೆ ಭಾರಿ ಶಾಕ್ ನೀಡಿದೆ. ಪಾಕಿಸ್ಥಾನದ ವಿರುದ್ಧದ ಭಾರತ ದಾಖಲಿಸಿದ ಅತಿ ದೊಡ್ಡ ಗೆಲುವು ಇದಾಗಿದೆ.

ಹರ್ಮನ್‌ಪ್ರೀತ್ ಸಿಂಗ್ ಅವರು ನಾಲ್ಕು ಗೋಲು ಬಾರಿಸಿ ದೊಡ್ಡ ಸಾಧನೆ ತೋರಿದರು. 11, 17, 33 ಮತ್ತು 34 ನೇ ನಿಮಿಷದಲ್ಲಿ ಆಕರ್ಷಕ ಗೋಲುಗಳನ್ನು ಬಾರಿಸಿದರು. , ವರುಣ್ ಕುಮಾರ್ ಅವರು 41 ಮತ್ತು 54 ನೇ ನಿಮಿಷದಲ್ಲಿ ಎರಡು ಗೋಲು ಗಳಿಸಿದರು. ಮಂದೀಪ್ ಸಿಂಗ್ 8 ನೇ ನಿಮಿಷದಲ್ಲಿ ಗೋಲು ಬಾರಿಸುವಲ್ಲಿ ಯಶಸ್ವಿಯಾದರು. ಸುಮಿತ್ 30 ನೇ ನಿಮಿಷದಲ್ಲಿ, ಶಂಶೇರ್ ಸಿಂಗ್ 46 ನೇ ನಿಮಿಷದಲ್ಲಿ ಮತ್ತು ಲಲಿತ್ ಕುಮಾರ್ ಉಪಾಧ್ಯಾಯ 49 ನೇ ನಿಮಿಷದಲ್ಲಿ ಕೂಡ ತಲಾ ಒಂದು ಗೋಲು ಗಳಿಸಿ ಭಾರತಕ್ಕೆ ಭಾರೀ ಜಯ ತಂದುಕೊಟ್ಟರು.

ಪಾಕ್ ಪರ ಮುಹಮ್ಮದ್ ಖಾನ್ 38ನೇ ನಿಮಿಷದಲ್ಲಿ, ಅಬ್ದುಲ್ ರಾಣಾ 45 ನೇ ನಿಮಿಷದಲ್ಲಿ ಗೋಲು ಗಳಿಸಿದರು.

ಈ ಪಂದ್ಯದಲ್ಲಿ ಭಾರತದ ಫಾರ್ವರ್ಡ್ ಆಟಗಾರ ಲಲಿತ್ ಕುಮಾರ್ ಉಪಾಧ್ಯಾಯ ತಮ್ಮ 150ನೇ ಅಂತಾರಾಷ್ಟ್ರೀಯ ಕ್ಯಾಪ್ ಗಳಿಸಿದರು.