Asian Olympics ಕ್ವಾಲಿಫೈಯರ್ ಶೂಟಿಂಗ್‌:ಯೋಗೇಶ್‌ಗೆ ಮತ್ತೆ ಅವಳಿ ಸ್ವರ್ಣ

Team Udayavani, Jan 15, 2024, 11:13 PM IST

ಜಕಾರ್ತಾ: ಯೋಗೇಶ್‌ ಸಿಂಗ್‌ “ಏಷ್ಯನ್‌ ಒಲಿಂಪಿಕ್ಸ್‌ ಕ್ವಾಲಿ ಫೈಯರ್ ಶೂಟಿಂಗ್‌’ ಸ್ಪರ್ಧೆ ಯಲ್ಲಿ ಸತತ 2ನೇ ದಿನ ಅವಳಿ ಸ್ವರ್ಣ ಸಾಧನೆಗೈದಿದ್ದಾರೆ.

ರವಿವಾರ 25 ಮೀ. ಸ್ಟಾಂಡರ್ಡ್‌ ಪಿಸ್ತೂಲ್‌ ಸ್ಪರ್ಧೆಯಲ್ಲಿ ಮಿಂಚಿದರೆ, ಸೋಮವಾರ 25 ಮೀ. ಸೆಂಟರ್‌ ಫೈರ್‌ ಪಿಸ್ತೂಲ್‌ ಸ್ಪರ್ಧೆಯ ವೈಯಕ್ತಿಕ ಹಾಗೂ ತಂಡ ವಿಭಾಗದಲ್ಲಿ ಬಂಗಾರಕ್ಕೆ ಗುರಿ ಇರಿಸಿದರು.

ವೈಯಕ್ತಿಕ ವಿಭಾಗದ ಫೈನಲ್‌ನಲ್ಲಿ ಯೋಗೇಶ್‌ ಸಿಂಗ್‌ 573 ಅಂಕ ಸಂಪಾದಿಸಿದರು. ಒಮಾನ್‌ನ ಮೌದ್‌ ಅಲ್‌ ಬಲುಶಿ ಬೆಳ್ಳಿ (570) ಹಾಗೂ ಇಂಡೋನೇಷ್ಯಾದ ಅನಂಗ್‌ ಯುಲಿಯಾಂಟೊ ಕಂಚು ಗೆದ್ದರು (567). ಭಾರತದ ಮತ್ತಿಬ್ಬರು ಶೂಟರ್‌ ಗಳಾದ ಪಂಕಜ್‌ ಯಾದವ್‌ (567) ಮತ್ತು ಅಕ್ಷಯ್‌ ಜೈನ್‌ (564) 4ನೇ ಹಾಗೂ 6ನೇ ಸ್ಥಾನಿಯಾದರು.

ತಂಡ ಸ್ಪರ್ಧೆಯಲ್ಲಿ ಯೋಗೇಶ್‌ ಸಿಂಗ್‌, ಪಂಕಜ್‌ ಯಾದವ್‌ ಮತ್ತು ಅಕ್ಷಯ್‌ ಜೈನ್‌ ಸೇರಿಕೊಂಡು ಭಾರತಕ್ಕೆ ಚಿನ್ನದ ಪದಕ ತಂದಿತ್ತರು. ಈ ಮೂವರು ಸೇರಿ 1,704 ಅಂಕ ಸಂಪಾದಿಸಿದರು. ಒಮಾನ್‌ ಬೆಳ್ಳಿ, ಇಂಡೋನೇಷ್ಯಾ ಕಂಚು ಗೆದ್ದಿತು.