ಆಸೀಸ್‌ ಟಿ20 ಸರಣಿ ವಿಕ್ರಮ

Team Udayavani, Oct 31, 2019, 4:46 AM IST

ಬ್ರಿಸ್ಬೇನ್‌: ಮತ್ತೂಮ್ಮೆ ಪ್ರಚಂಡ ಪ್ರದರ್ಶನ ನೀಡಿದ ಆಸ್ಟ್ರೇಲಿಯ, ಪ್ರವಾಸಿ ಶ್ರೀಲಂಕಾ ಎದುರಿನ ಟಿ20 ಸರಣಿಯನ್ನು ವಶಪಡಿಸಿಕೊಂಡಿದೆ.

ಬುಧವಾರ “ಗಾಬಾ’ದಲ್ಲಿ ನಡೆದ ದ್ವಿತೀಯ ಮುಖಾಮುಖೀಯನ್ನು ಕಾಂಗರೂ ಪಡೆ 9 ವಿಕೆಟ್‌ಗಳಿಂದ ಭರ್ಜರಿ ಯಾಗಿ ಜಯಿಸಿತು.

ಮೊದಲು ಬ್ಯಾಟಿಂಗ್‌ ನಡೆಸಿದ ಶ್ರೀಲಂಕಾ ಶೋಚನೀಯ ಕುಸಿತ ಅನುಭವಿಸಿ 19 ಓವರ್‌ಗಳಲ್ಲಿ 117ಕ್ಕೆ ಆಲೌಟ್‌ ಆಯಿತು. ಜವಾಬಿತ್ತ ಆಸ್ಟ್ರೇಲಿಯ 13 ಓವರ್‌ಗಳಲ್ಲಿ ಒಂದೇ ವಿಕೆಟಿಗೆ 118 ರನ್‌ ಬಾರಿಸಿತು. ಮೊದಲ ಮುಖಾ ಮುಖೀಯನ್ನು ಆಸೀಸ್‌ 134 ರನ್ನುಗಳ ದಾಖಲೆ ಅಂತರದಿಂದ ಜಯಿಸಿತ್ತು. 3ನೇ ಹಾಗೂ ಅಂತಿಮ ಪಂದ್ಯ ಶುಕ್ರವಾರ ಮೆಲ್ಬರ್ನ್ನಲ್ಲಿ ನಡೆಯಲಿದೆ.

ವಾರ್ನರ್‌-ಸ್ಮಿತ್‌ ಶತಕದ ಜತೆಯಾಟ
ಕಳೆದ ಪಂದ್ಯದಲ್ಲಿ ಮೊದಲ ಟಿ20 ಶತಕ ಬಾರಿಸಿ ಮಿಂಚಿದ್ದ ವಾರ್ನರ್‌ ಇದೇ ಫಾರ್ಮ್ ಮುಂದುವರಿಸಿ ಅಜೇಯ 60 ಹೊಡೆದರು (41 ಎಸೆತ, 9 ಬೌಂಡರಿ). ಇವರೊಂದಿಗೆ ಸ್ಟೀವನ್‌ ಸ್ಮಿತ್‌ 53 ರನ್‌ ಗಳಿಸಿ ಅಜೇಯರಾಗಿ ಉಳಿದರು (36 ಎಸೆತ, 6 ಬೌಂಡರಿ). ಇವರಿಬ್ಬರ ದ್ವಿತೀಯ ವಿಕೆಟ್‌ ಜತೆಯಾಟದಲ್ಲಿ 117 ರನ್‌ ಹರಿದು ಬಂತು. ನಾಯಕ ಆರನ್‌ ಫಿಂಚ್‌ ಖಾತೆ ತೆರೆಯದೆ ಮೊದಲ ಓವರಿನಲ್ಲೇ ಪೆವಿಲಿಯನ್‌ ಸೇರಿದ್ದರು.

ಆಸ್ಟ್ರೇಲಿಯ ಸಾಂ ಕ ದಾಳಿ ಮೂಲಕ ಲಂಕಾ ಮೇಲೆರಗಿತು. ಸ್ಟಾನ್‌ಲೇಕ್‌, ಕಮಿನ್ಸ್‌, ಅಗರ್‌ ಮತ್ತು ಝಂಪ ತಲಾ 2 ವಿಕೆಟ್‌ ಉರುಳಿಸಿದರು. ಉಳಿದಿಬ್ಬರು ರನೌಟಾದರು. 27 ರನ್‌ ಮಾಡಿದ ಕುಸಲ್‌ ಪೆರೆರ ಅವರದು ಲಂಕಾ ಸರದಿಯ ಹೆಚ್ಚಿನ ಗಳಿಕೆ.

ಸಂಕ್ಷಿಪ್ತ ಸ್ಕೋರ್‌
ಶ್ರೀಲಂಕಾ-19 ಓವರ್‌ಗಳಲ್ಲಿ ಆಲೌಟ್‌ 117 (ಪೆರೆರ 27, ಗುಣತಿಲಕ 21, ಝಂಪ 20ಕ್ಕೆ 2, ಸ್ಟಾನ್‌ಲೇಕ್‌ 23ಕ್ಕೆ 2, ಅಗರ್‌ 27ಕ್ಕೆ 2, ಕಮಿನ್ಸ್‌ 29ಕ್ಕೆ 2). ಆಸ್ಟ್ರೇಲಿಯ-13 ಓವರ್‌ಗಳಲ್ಲಿ ಒಂದು ವಿಕೆಟಿಗೆ 118 (ವಾರ್ನರ್‌ ಔಟಾಗದೆ 60, ಸ್ಮಿತ್‌ ಔಟಾಗದೆ 53, ಮಾಲಿಂಗ 23ಕ್ಕೆ 1).

ಪಂದ್ಯಶ್ರೇಷ್ಠ: ಡೇವಿಡ್‌ ವಾರ್ನರ್‌.