ನಿರೋಷನ್‌ ಡಿಕ್ವೆಲ್ಲಾಗೆ 2 ಪಂದ್ಯಗಳ ನಿಷೇಧ

Team Udayavani, Feb 22, 2017, 12:38 PM IST

ಕೊಲಂಬೊ: ಅಂಪಾಯರ್‌ ತೀರ್ಪಿನ ವಿರುದ್ಧ ಅಂಗಳದಲ್ಲೇ ಅಸಮಾಧಾನ ವ್ಯಕ್ತಪಡಿಸಿ ಅಶಿಸ್ತಿನಿಂದ ವರ್ತಿಸಿದ ಶ್ರೀಲಂಕಾ ಆರಂಭಕಾರ ನಿರೋಷನ್‌ ಡಿಕ್ವೆಲ್ಲ ಅವರಿಗೆ ಐಸಿಸಿ 2 ಸೀಮಿತ ಓವರ್‌ಗಳ ಪಂದ್ಯಗಳ ನಿಷೇಧ ವಿಧಿಸಿದೆ.

ಆಸ್ಟ್ರೇಲಿಯ ವಿರುದ್ಧ ರವಿವಾರ ಗೀಲಾಂಗ್‌ನಲ್ಲಿ ನಡೆದ ದ್ವಿತೀಯ ಟಿ-20 ಪಂದ್ಯದ ವೇಳೆ ಔಟಾಗಿ ಹೋಗುವಾಗ ಡಿಕ್ವೆಲ್ಲ ಅಂಪಾಯರ್‌ ತೀರ್ಪಿಗೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದರು. ಭುಜವನ್ನು ಹಾರಿಸುತ್ತ, ಪಿಚ್‌ ತುಳಿಯುತ್ತ ಪೆವಿಲಿಯನ್‌ ಕಡೆ ಸಾಗಿದ್ದರು. ಇದಕ್ಕಾಗಿ ನಿಷೇಧದ ಜತೆಗೆ ಪಂದ್ಯದ ಸಂಭಾವನೆಯ ಶೇ. 30ರಷ್ಟು ದಂಡವನ್ನೂ ವಿಧಿಸಲಾಗಿದೆ. 

ನಿಷೇಧ ಕ್ರಮದಿಂದಾಗಿ 23ರ ಹರಯದ ನಿರೋಷನ್‌ ಡಿಕ್ವೆಲ್ಲ ಬುಧವಾರ ಅಡಿಲೇಡ್‌ನ‌ಲ್ಲಿ ನಡೆಯುವ 3ನೇ ಟಿ-20 ಪಂದ್ಯದಿಂದ ಹಾಗೂ ಬಾಂಗ್ಲಾದೇಶ ವಿರುದ್ಧ ಮಾ. 25ರಂದು ಆಡಲಾಗುವ ಮೊದಲ ಏಕದಿನ ಪಂದ್ಯದಿಂದ ಹೊರಗುಳಿಯಬೇಕಾಗುತ್ತದೆ.