ಬ್ಯಾಡ್ಮಿಂಟನ್‌: ಕಶ್ಯಪ್‌ಗೆ ಆಘಾತ ಪ್ರಣಯ್‌,ಸೌರಭ್‌ ಕ್ವಾ.ಫೈನಲಲಿಗೆ

Team Udayavani, Aug 4, 2017, 7:10 AM IST

ಹೊಸದಿಲ್ಲಿ: ಭಾರತದ ಎಚ್‌ಎಸ್‌ ಪ್ರಣಯ್‌ ಹಾಂಕಾಂಗ್‌ನ ವೆಯಿ ನಾನ್‌ ಅವರನ್ನು ನೇರ ಗೇಮ್‌ಗಳಿಂದ ಕೆಡಹಿ ನ್ಯೂಜಿಲ್ಯಾಂಡ್‌ ಓಪನ್‌ ಗ್ರ್ಯಾನ್‌ ಪ್ರಿ ಗೋಲ್ಡ್‌ ಬ್ಯಾಡ್ಮಿಂಟನ್‌ ಕೂಟದ ಕ್ವಾರ್ಟರ್‌ಫೈನಲಿಗೇರಿದ್ದಾರೆ. 

ಕಳೆದ ತಿಂಗಳು ಯುಎಸ್‌ ಓಪನ್‌ ಪ್ರಶಸ್ತಿ ಗೆದ್ದಿರುವ ನಾಲ್ಕನೇ ಶ್ರೇಯಾಂಕದ ಪ್ರಣಯ್‌ 10ನೇ ಶ್ರೇಯಾಂಕದ ವೆಯಿ ನಾನ್‌ ಅವರನ್ನು 46 ನಿಮಿಷಗಳ ಹೋರಾಟದಲ್ಲಿ 21-18, 21-19 ಗೇಮ್‌ಗಳಿಂದ ಉರುಳಿಸಿದರು. ಮುಂದಿನ ಸುತ್ತಿನಲ್ಲಿ ಅವರು 11ನೇ ಶ್ರೇಯಾಂಕದ ಚೈನೀಸ್‌ ತೈಪೆಯ ಲಿನ್‌ ಯು ಸಿಯೆನ್‌ ಅವರನ್ನು ಎದುರಿಸಲಿದ್ದಾರೆ.

ಇದೇ ವೇಳೆ ಭಾರತದ ಇನ್ನೋರ್ವ ಯಶಸ್ವಿ ಶಟ್ಲರ್‌ ಪಾರುಪಳ್ಳಿ ಕಶ್ಯಪ್‌ ತನ್ನ ದೇಶದವರೇ ಆದ ಸೌರಭ್‌ ವರ್ಮ ಅವರಿಗೆ ಮೂರು ಗೇಮ್‌ಗಳ ಕಠಿನ ಸೆಣಸಾಟದಲ್ಲಿ ಶರಣಾದರು. ಒಂದು ತಾಸು ಮತ್ತು ನಾಲ್ಕು ನಿಮಿಷಗಳ ಈ ಕಾದಾಟದಲ್ಲಿ ಏಳನೇ ಶ್ರೇಯಾಂಕದ ಸೌರಭ್‌ 21-18, 13-21, 21-16 ಗೇಮ್‌ಗಳಿಂದ ಜಯಭೇರಿ ಬಾರಿಸಿದರು.

ಆದರೆ ಯುವ ಆಟಗಾರ ಸಿರಿಲ್‌ ವರ್ಮ ಚೈನೀಸ್‌ ತೈಪೆಯ ಚಿಯ ಹಂಗ್‌ ಲು ಅವರಿಗೆ 13-21, 14-21 ಗೇಮ್‌ಗಳಿಂದ ಶರಣಾಗಿ ಹೊರಬಿದ್ದರು.