Pro Kabaddi; ಬೆಂಗಳೂರು ಬುಲ್ಸ್‌ ಗೆ ಆಘಾತ

Team Udayavani, Dec 3, 2023, 11:22 PM IST

ಅಹ್ಮದಾಬಾದ್‌: ಬೆಂಗಳೂರು ಬುಲ್ಸ್‌ 10ನೇ ಪ್ರೊ ಕಬಡ್ಡಿ ಋತುವನ್ನು ಸೋಲಿನೊಂದಿಗೆ ಆರಂಭಿಸಿದೆ. ಹಾವು ಏಣಿಯಾಟದಂತೆ ಸಾಗಿದ ರವಿವಾರದ ದ್ವಿತೀಯ ಪಂದ್ಯದಲ್ಲಿ ಗುಜರಾತ್‌ ಜೈಂಟ್ಸ್‌ 34-31 ಅಂತರದಿಂದ ಬುಲ್ಸ್‌ಗೆ ತಿವಿಯಿತು. ಇದು ಗುಜರಾತ್‌ಗೆ ಒಲಿದ ಸತತ 2ನೇ ಜಯ.

ವಿರಾಮದ ವೇಳೆ ಬುಲ್ಸ್‌ 20-14ರ ಮುನ್ನಡೆಯಲ್ಲಿತ್ತು. ಅನಂತರವೂ ಪೈಪೋಟಿ ತೀವ್ರಗೊಂಡಿತು. ಗುಜ ರಾತ್‌ ಪರ ರೈಡರ್‌ ರಾಕೇಶ್‌, ಡಿಫೆಂಡರ್‌ ಸೋಮ್‌ಬೀರ್‌ ತಲಾ 5 ಅಂಕ ಸಂಪಾದಿಸಿದರು. ಬುಲ್ಸ್‌ ಪರ ಮಿಂಚಿದವರೆಂದರೆ ರೈಡರ್‌ಗಳಾದ ಭರತ್‌ (7 ಅಂಕ) ಮತ್ತು ವಿಕಾಸ್‌ ಖಂಡೋಲ (6 ಅಂಕ).

ತಲೈವಾಸ್‌ ಜಯ: ದಿನದ ಮೊದಲ ಪಂದ್ಯದಲ್ಲಿ ತಮಿಳ್‌ ತಲೈವಾಸ್‌ 42-31 ಅಂಕಗಳ ಅಂತರದಿಂದ ದಬಾಂಗ್‌ ಡೆಲ್ಲಿಯನ್ನು ಕೆಡವಿತು. ವಿರಾಮದ ವೇಳೆ 18-14ರ ಮುನ್ನಡೆಯಲ್ಲಿದ್ದ ತಲೈವಾಸ್‌ ದ್ವಿತೀಯಾರ್ಧದಲ್ಲೂ ಈ ಮುನ್ನಡೆ ಕಾಯ್ದುಕೊಳ್ಳುವಲ್ಲಿ ಯಶಸ್ವಿಯಾಯಿತು.

21 ಅಂಕ ಬಾಚಿದ ರೈಡರ್‌ ಅಜಿಂಕ್ಯ ತಮಿಳ್‌ ತಲೈವಾಸ್‌ ಗೆಲುವಿನ ರೂವಾರಿ ಎನಿಸಿದರು. 14 ಟಚ್‌ ಪಾಯಿಂಟ್‌, 4 ಬೋನಸ್‌ ಪಾಯಿಂಟ್‌ ಮತ್ತು 3 ಟ್ಯಾಕಲ್‌ ಪಾಯಿಂಟ್‌ಗಳು ಒಳ ಗೊಂಡಿದ್ದವು. ಮತ್ತೋರ್ವ ರೈಡರ್‌ ನರೇಂದರ್‌ 8 ಅಂಕ ಗಳಿಸಿ ಕೊಟ್ಟರು. ಡೆಲ್ಲಿ ಪರ ನಾಯಕ ನವೀನ್‌ ಕುಮಾರ್‌ 14 ಅಂಕ ಗಳಿಸಿ ಮಿಂಚಿದರು.