Bangladesh: ಅಂತಾರಾಷ್ಟ್ರೀಯ ಕ್ರಿಕೆಟ್‌ ಗೆ ವಿದಾಯ ಹೇಳಿದ ತಮೀಮ್‌ ಇಕ್ಬಾಲ್

Team Udayavani, Jan 11, 2025, 11:05 AM IST

ಢಾಕಾ: ಬಾಂಗ್ಲಾದೇಶದ ಹಿರಿಯ ಆಟಗಾರ, ಮಾಜಿ ನಾಯಕ ತಮೀಮ್‌ ಇಕ್ಬಾಲ್‌ (Tamim Iqbal) ಅವರು ಅಂತಾರಾಷ್ಟ್ರೀಯ ಕ್ರಿಕೆಟ್‌ ಗೆ ವಿದಾಯ ಘೋಷಿಸಿದ್ದಾರೆ. ಶುಕ್ರವಾರ (ಜ.10) ತಮೀಮ್‌ ಇಕ್ಬಾಲ್‌ ಅವರು ಈ ಘೋಷಣೆ ಮಾಡಿದ್ದಾರೆ.

ಮುಂಬರುವ ಐಸಿಸಿ ಚಾಂಪಿಯನ್ಸ್ ಟ್ರೋಫಿಗೆ ಬಾಂಗ್ಲಾದೇಶ ತಂಡವನ್ನು ಸಿದ್ಧಪಡಿಸುತ್ತಿರುವ ರಾಷ್ಟ್ರೀಯ ಆಯ್ಕೆ ಸಮಿತಿಯನ್ನು ಎಡಗೈ ಬ್ಯಾಟ್ಸ್‌ಮನ್ ಇಕ್ಬಾಲ್ ಇತ್ತೀಚೆಗೆ ಭೇಟಿಯಾದರು. ಬಳಿಕ ತನ್ನ ನಿರ್ಧಾರ ಕೈಗೊಂಡಿದ್ದಾರೆ.

“ನಾನು ಅಂತಾರಾಷ್ಟ್ರೀಯ ಕ್ರಿಕೆಟ್‌ ನಿಂದ ಬಹಳ ಸಮಯದಿಂದ ದೂರವಿದ್ದೇನೆ. ಆ ಅಂತರವು ಇನ್ನು ಕಡಿಮೆಯಾಗುವುದಿಲ್ಲ. ಅಂತಾರಾಷ್ಟ್ರೀಯ ಕ್ರಿಕೆಟ್‌ ನಲ್ಲಿ ನನ್ನ ಅಧ್ಯಾಯ ಮುಗಿದಿದೆ” ಎಂದು ತಮೀಮ್ ಶುಕ್ರವಾರ ಫೇಸ್‌ಬುಕ್ ಪೋಸ್ಟ್‌ನಲ್ಲಿ ಬರೆದಿದ್ದಾರೆ.

“ನಾನು ಸ್ವಲ್ಪ ಸಮಯದಿಂದ ಇದರ ಬಗ್ಗೆ ಯೋಚಿಸುತ್ತಿದ್ದೇನೆ. ಚಾಂಪಿಯನ್ಸ್ ಟ್ರೋಫಿ ಮುಂಬರುವ ಕಾರಣ, ನನ್ನ ಬಗ್ಗೆ ಚರ್ಚೆಗಳು ತಂಡದ ಗಮನವನ್ನು ಅಡ್ಡಿಪಡಿಸಬಾರದು ಎಂದು ನಾನು ಬಯಸುತ್ತೇನೆ. ಈ ಕಾರಣಕ್ಕಾಗಿ ನಾನು ಬಹಳ ಹಿಂದೆಯೇ ರಾಷ್ಟ್ರೀಯ ಒಪ್ಪಂದದಿಂದ ದೂರ ಸರಿದಿದ್ದೇನೆ. ಆದರೆ ಮಾಧ್ಯಮಗಳು ಕೆಲವೊಮ್ಮೆ ಬೇರೆ ರೀತಿಯಲ್ಲಿ ಸೂಚಿಸುತ್ತಿದ್ದವು” ಎಂದು ಅವರು ಹೇಳಿದರು.

“ನಾಯಕ ನಜ್ಮುಲ್ ಹೊಸೇನ್ ಅವರು ನಾನು ಹಿಂತಿರುಗಲು ಪ್ರಾಮಾಣಿಕವಾಗಿ ವಿನಂತಿಸಿಕೊಂಡರು. ಆದರೆ ನಾನು ಆಯ್ಕೆ ಸಮಿತಿಯೊಂದಿಗೆ ಮಾತನಾಡಿದೆ. ನಾನು ಇನ್ನೂ ಸಮರ್ಥನೆಂದು ಅವರು ನಂಬಿದ್ದಕ್ಕಾಗಿ ನಾನು ಕೃತಜ್ಞನಾಗಿದ್ದೇನೆ, ಆದರೆ ನಾನು ನನ್ನ ಹೃದಯದ ಮಾತನ್ನು ಕೇಳಿ ಮುಂದುವರಿಸಿದ್ದೇನೆ” ಎಂದು ತಮೀಮ್ ಹೇಳಿದರು.‌

ತಮೀಮ್‌ ಇಕ್ಬಾಲ್‌ ಕಳೆದ ವರ್ಷ ವಿದಾಯ ಹೇಳಿದ್ದರು. ಆದರೆ ಬಳಿಕ ಆಗಿನ ಪ್ರಧಾನಿ ಶೇಖ್‌ ಹಸೀನಾ ಮನವೊಲಿಕೆ ಬಳಿಕ ನಿವೃತ್ತಿಯನ್ನು ಹಿಂಪಡೆದಿದ್ದರು.

ತಮೀಮ್‌ ಇಕ್ಬಾಲ್‌ ಅವರು 70 ಟೆಸ್ಟ್‌ ಪಂದ್ಯವಾಡಿದ್ದು, 38.89ರ ಸರಾಸರಿಯಲ್ಲಿ 5,134 ರನ್‌ ಗಳಿಸಿದ್ದಾರೆ. ಟೆಸ್ಟ್‌ ಕ್ರಿಕೆಟ್‌ ನಲ್ಲಿ 10 ಶತಕ ಬಾರಿಸಿದ್ದು, 31 ಅರ್ಧಶತಕ ಗಳಿಸಿದ್ದಾರೆ.

243 ಏಕದಿನ ಪಂದ್ಯವಾಡಿರುವ ಇಕ್ಬಾಲ್‌ 8,357 ರನ್‌ ಗಳಿಸಿದ್ದಾರೆ. 78 ಟಿ20 ಪಂದ್ಯವಾಡಿರುವ ಅವರು 1758 ರನ್‌ ಗಳಿಸಿದ್ದಾರೆ. ಏಕದಿನ ಕ್ರಿಕೆಟ್‌ ನಲ್ಲಿ 14 ಶತಕ ಮತ್ತು ಟಿ20ಯಲ್ಲಿ ಒಂದು ಶತಕ ಬಾರಿಸಿದ್ದಾರೆ.