ಭಾರತ-ಪಾಕ್‌ ಕ್ರಿಕೆಟ್‌ ಸರಣಿ: ಕೇಂದ್ರದಿಂದ ಸ್ಪಷ್ಟನೆ ಕೇಳಿದ ಬಿಸಿಸಿಐ

Team Udayavani, May 29, 2018, 6:00 AM IST

ಹೊಸದಿಲ್ಲಿ: ಭಾರತ ಜತೆ ದ್ವಿಪಕ್ಷೀಯ ಕ್ರಿಕೆಟ್‌ ಸರಣಿ ಆಡಲು ಪಾಕಿಸ್ಥಾನ ಕ್ರಿಕೆಟ್‌ ಮಂಡಳಿ ಹಲವು ಸಲ ಬೇಡಿಕೆ ಇಟ್ಟ ಬೆನ್ನಲ್ಲೇ ಪಾಕ್‌ ಜತೆ ಕ್ರಿಕೆಟ್‌ ಸರಣಿ ಆಡುವ ಕುರಿತಂತೆ ಕೇಂದ್ರ ಸರಕಾರಕ್ಕೆ ಸ್ಪಷ್ಟನೆ ನೀಡುವಂತೆ ಕೋರಿ ಬಿಸಿಸಿಐ ಪತ್ರ ಬರೆದಿದೆ.

ಇದೇ ವೇಳೆ ಕೇಂದ್ರ ಸರಕಾರದ ಮಾರ್ಗಸೂಚಿ ಇಲ್ಲದೆ ಭಾರತ-ಪಾಕ್‌ ಸರಣಿ ಆಯೋಜಿಸಲು ಸಾಧ್ಯವೇ ಇಲ್ಲ ಎನ್ನುವುದನ್ನು ಬಿಸಿಸಿಐ ಸ್ಪಷ್ಟಪಡಿಸಿದೆ. ಕಳೆದ ವಾರ ಭಾರತ ಕ್ರೀಡಾ ಸಚಿವಾಲಯಕ್ಕೆ ಬಿಸಿಸಿಐ ಪತ್ರ ಬರೆದಿತ್ತು. ಸದ್ಯ ಪಾಕ್‌ ಜತೆ ಕ್ರಿಕೆಟ್‌ ಸಂಬಂಧಕ್ಕಾಗಿ ಸರಕಾರದ ಸ್ಪಷ್ಟನೆ ಬೇಕಿದ್ದು, ನೀವು ನೀಡಿರುವ ಆದೇಶದಂತೆ ಪಾಕ್‌ನಲ್ಲಿ ನಾವು ಸರಣಿ ಆಡುವುದು ಅಥವಾ ಪಾಕಿಸ್ಥಾನ ನಮ್ಮಲ್ಲಿಗೆ ಬಂದು ಸರಣಿ ಆಡುವ ಬಗ್ಗೆ ನಿರ್ಧರಿಸುತ್ತೇವೆ ಎಂದು ಬಿಸಿಸಿಐ ತಿಳಿಸಿತ್ತು. ಎರಡೂ ರಾಷ್ಟ್ರಗಳ ರಾಜಕೀಯ ಬಿಕ್ಕಟ್ಟಿನಿಂದಾಗಿ ಕಳೆದ ಕೆಲವು ವರ್ಷಗಳಿಂದ ಉಭಯ ರಾಷ್ಟ್ರಗಳ ನಡುವಿನ ಕ್ರಿಕೆಟ್‌ ಸರಣಿಗೆ ಹಿನ್ನಡೆಯಾಗಿದೆ.