ಬಿಸಿಸಿಐಯಲ್ಲಿ ಮತ್ತೆ ಬಿಕ್ಕಟ್ಟು

Team Udayavani, Jan 18, 2018, 11:20 AM IST

ಕೋಲ್ಕತಾ: ಭಾರತೀಯ ಕ್ರಿಕೆಟ್‌ ನಿಯಂತ್ರಣ ಮಂಡಳಿಯಲ್ಲಿನ ಒಳಜಗಳ ಮತ್ತೆ ಬಹಿರಂಗಗೊಡಿದೆ. ಅಫ್ಘಾನಿಸ್ಥಾನದ ಪ್ರಪ್ರಥಮ ಟೆಸ್ಟ್‌ ಪಂದ್ಯ ಭಾರತದ ವಿರುದ್ಧ ಬೆಂಗಳೂರಿನಲ್ಲಿ ಜೂ. 14ರಿಂದ ನಡೆಯಲಿದೆ ಎಂದು ನಿಗದಿಯಾಗಿದೆ. ಈ ನಿರ್ಧಾರ ತೆಗೆದು ಕೊಳ್ಳುವಾಗ ಹಂಗಾಮಿ ಅಧ್ಯಕ್ಷ ಸಿ.ಕೆ. ಖನ್ನಾ, ಖಜಾಂಚಿ ಅನಿರುದ್ಧ ಚೌಧರಿ, ಐಪಿಎಲ್‌ ಮುಖ್ಯಸ್ಥ ರಾಜೀವ್‌ ಶುಕ್ಲಾ ಅವರನ್ನು ವಿಶ್ವಾಸಕ್ಕೆ ತೆಗೆದುಕೊಂಡಿಲ್ಲ, ಅವರನ್ನು ಸಂಪರ್ಕಿಸಿಯೂ ಇಲ್ಲ ಎಂದು ವರದಿಯಾಗಿದೆ.

ಈ ನಿರ್ಧಾರಕ್ಕೂ ಮುನ್ನ ಬಿಸಿಸಿಐಯ ಪ್ರವಾಸ ಮತ್ತು ವೇಳಾಪಟ್ಟಿ ಉಪಸಮಿತಿಯನ್ನು ಮೊದಲು ವಿಶ್ವಾಸಕ್ಕೆ ತೆಗೆದುಕೊಳ್ಳಬೇಕು. ಈ ಸಮಿತಿಯಲ್ಲಿ ರಾಜೀವ್‌ ಶುಕ್ಲಾ, ಖನ್ನಾ, ಚೌಧರಿ ಕೂಡ ಇದ್ದಾರೆ. ಎಲ್ಲ ನಿರ್ಧಾರವನ್ನು ಕಾರ್ಯದರ್ಶಿ ಅಮಿತಾಭ್‌ ಚೌಧರಿ ಮತ್ತು ಸಿಇಒ ರಾಹುಲ್‌ ಜೊಹ್ರಿ ತೆಗೆದುಕೊಂಡಿದ್ದಾರೆಂದು ಹೇಳಲಾಗಿದೆ. ಕಾರ್ಯದರ್ಶಿಗೆ ಈ ಅಧಿಕಾರವಿದ್ದರೂ ಇಂಥ ಏಕಪಕ್ಷೀಯ ನಿರ್ಧಾರವನ್ನು ಬಿಸಿಸಿಐ ಮೂಲಗಳು ವಿರೋಧಿಸಿವೆ.