ಬೆಲ್ಜಿಯಂ ಹಾಕಿ ಸರಣಿ: ಭಾರತ ಅಜೇಯ

Team Udayavani, Oct 4, 2019, 5:33 AM IST

ಆಂಟೆರ್ಪ್‌ (ಬೆಲ್ಜಿಯಂ): ಭಾರತದ ಪುರುಷರ ಹಾಕಿ ತಂಡ ತನ್ನ ಬೆಲ್ಜಿಯಂ ಪ್ರವಾಸವನ್ನು ಅಜೇಯವಾಗಿ ಮುಗಿಸಿದೆ. ಗುರುವಾರ ಇಲ್ಲಿ ನಡೆದ ಮುಖಾಮುಖೀಯಲ್ಲಿ ವಿಶ್ವ ಚಾಂಪಿಯನ್‌ ಹಾಗೂ ಯುರೋಪಿಯನ್‌ ಚಾಂಪಿಯನ್‌ ಖ್ಯಾತಿಯ ಬೆಲ್ಜಿಯಂಗೆ 5-1 ಅಂತರದ ಸೋಲುಣಿಸಿ ಮೆರೆದಾಡಿತು.

ಇದರೊಂದಿಗೆ ಈ ಪ್ರವಾಸದಲ್ಲಿ ಆಡಲಾದ ಐದೂ ಪಂದ್ಯಗಳಲ್ಲಿ ಭಾರತ ಗೆದ್ದಂತಾಯಿತು. ಮೊದಲ ಪಂದ್ಯದಲ್ಲಿ ಬೆಲ್ಜಿಯಂಗೆ 2-0 ಗೋಲುಗಳ ಆಘಾತವಿಕ್ಕಿದ ಭಾರತ, ಮುಂದಿನೆರಡು ಮುಖಾಮುಖೀಗಳಲ್ಲಿ ಸ್ಪೇನ್‌ಗೆ 6-1 ಮತ್ತು 5-1 ಗೋಲುಗಳ ಸೋಲುಣಿಸಿತು. 4ನೇ ಸ್ಪರ್ಧೆಯಲ್ಲಿ ಮತ್ತೆ ಬೆಲ್ಜಿಯಂ ಮೇಲೆ ಸವಾರಿ ಮಾಡಿತು (2-1). ಗುರುವಾರದ ಕೊನೆಯ ಅವಕಾಶದಲ್ಲೂ ಬೆಲ್ಜಿಯಂ ಎಡವಿತು.

ಆಕ್ರಮಣಕಾರಿಯಾಗಿ ಮುನ್ನುಗ್ಗಿದ ಭಾರತ 7ನೇ ನಿಮಿಷದಲ್ಲೇ ಸಿಮ್ರನ್‌ಜಿàತ್‌ ಸಿಂಗ್‌ ಮೂಲಕ ಗೋಲಿನ ಖಾತೆ ತೆರೆಯಿತು. ಬಳಿಕ ಲಲಿತ್‌ ಕುಮಾರ್‌ ಉಪಾಧ್ಯಾಯ (35), ವಿವೇಕ್‌ ಸಾಗರ್‌ ಪ್ರಸಾದ್‌ (36), ಹರ್ಮನ್‌ಪ್ರೀತ್‌ ಸಿಂಗ್‌ (42) ಮತ್ತು ರಮಣ್‌ದೀಪ್‌ ಸಿಂಗ್‌ (43ನೇ ನಿಮಿಷ) ಗೋಲು ಬಾರಿಸುತ್ತ ಹೋದರು.

ಬೆಲ್ಜಿಯಂನ ಏಕೈಕ ಗೋಲು 39ನೇ ನಿಮಿಷದಲ್ಲಿ ಅಲೆಕ್ಸಾಂಡರ್‌ ಹೆಂಡ್ರಿಕ್ಸ್‌ ಅವರಿಂದ ದಾಖಲಾಯಿತು.