IPL ನಿಂದ ಹಿಂದೆ ಸರಿದಿ ಬ್ರೂಕ್‌: ಡೆಲ್ಲಿ ತಂಡಕ್ಕೆ ದಕ್ಷಿಣ ಆಫ್ರಿಕಾ ವೇಗಿ

Team Udayavani, Apr 9, 2024, 7:30 AM IST

ಹೊಸದಿಲ್ಲಿ: ದಕ್ಷಿಣ ಆಫ್ರಿಕಾದ ವೇಗಿ ಲಿಝಾಡ್‌ ವಿಲಿಯಮ್ಸ್‌ ಡೆಲ್ಲಿ ಕ್ಯಾಪಿಟಲ್ಸ್‌ ತಂಡಕ್ಕೆ ಸೇರ್ಪಡೆಗೊಂಡಿದ್ದಾರೆ. ಇಂಗ್ಲೆಂಡ್‌ ಬ್ಯಾಟರ್‌ ಹ್ಯಾರಿ ಬ್ರೂಕ್‌ ಸ್ಥಾನವನ್ನು ಲಿಝಾಡ್‌ ತುಂಬಲಿದ್ದಾರೆ. ಅಜ್ಜಿಯ ನಿಧನದಿಂದಾಗಿ ಬ್ರೂಕ್‌ ಐಪಿಎಲ್‌ನಿಂದ ಹಿಂದೆ ಸರಿದಿದ್ದಾರೆ.

ಹ್ಯಾರಿ ಬ್ರೂಕ್‌ ಅವರನ್ನು ಡೆಲ್ಲಿ 4 ಕೋಟಿ ರೂ.ಗೆ ಖರೀದಿಸಿತ್ತು. ಕಳೆದ ವರ್ಷ ಸನ್‌ರೈಸರ್ ಹೈದರಾಬಾದ್‌ ಫ್ರಾಂಚೈಸಿ ಹ್ಯಾರಿ ಬ್ರೂಕ್‌ ಅವರಿಗೆ 13.25 ಕೋಟಿ ರೂ. ನೀಡಿತ್ತು. ಕೆಕೆಆರ್‌ ವಿರುದ್ಧ 55 ಎಸೆತಗಳಲ್ಲಿ ಶತಕ ಬಾರಿಸಿ ಮಿಂಚಿದ್ದನ್ನು ಹೊರತುಪಡಿಸಿದರೆ 11 ಪಂದ್ಯಗಳಿಂದ ಗಳಿಸಿದ್ದು 190 ರನ್‌ ಮಾತ್ರ. ಆದರೆ ಈ ಬಾರಿ ಡೆಲ್ಲಿ ಪರ ಆಡುವ ಅವಕಾಶ ಲಭಿಸಲಿಲ್ಲ.

2021ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟಿಗೆ ಪದಾರ್ಪಣೆ ಮಾಡಿದ ಲಿಝಾಡ್‌ ವಿಲಿಯಮ್ಸ್‌ 2 ಟೆಸ್ಟ್‌, 4 ಏಕದಿನ ಮತ್ತು 11 ಟಿ20 ಪಂದ್ಯಗಳನ್ನು ಆಡಿದ್ದಾರೆ. ಡೆಲ್ಲಿ ಬೌಲಿಂಗ್‌ ತೀರಾ ದುರ್ಬಲವಾಗಿರುವ ಕಾರಣ ಬ್ಯಾಟರ್‌ ಬದಲು ವೇಗಿಯನ್ನು ಆಯ್ದುಕೊಂಡಿದೆ. ಮುಂಬೈ ವಿರುದ್ಧ ಆ್ಯನ್ರಿಚ್‌ ನೋರ್ಜೆ ಅವರ ಒಂದೇ ಓವರ್‌ನಲ್ಲಿ 32 ರನ್‌ ಸೋರಿಹೋದದ್ದು ಡೆಲ್ಲಿ ಬೌಲಿಂಗ್‌ ವೈಫ‌ಲ್ಯಕ್ಕೊಂದು ಉತ್ತಮ ನಿದರ್ಶನ.