ಬುಮ್ರಾಗೆ ಅಪಾಯವಿಲ್ಲ: ನಿರಾಳಗೊಂಡ ಕೊಹ್ಲಿ

Team Udayavani, Mar 26, 2019, 6:10 AM IST

ಮುಂಬೈ: ಭಾನುವಾರ ರಾತ್ರಿ ಡೆಲ್ಲಿ ಕ್ಯಾಪಿಟಲ್ಸ್‌ ವಿರುದ್ಧ ನಡೆದ ಐಪಿಎಲ್‌ ಪಂದ್ಯದಲ್ಲಿ, ಮುಂಬೈ ಇಂಡಿಯನ್ಸ್‌ ವೇಗಿ ಜಸ್ಪ್ರೀತ್ ಬುಮ್ರಾ ಭುಜಕ್ಕೆ ಏಟು ಮಾಡಿಕೊಂಡಿದ್ದರು. ಇದು ಭಾರತ ಕ್ರಿಕೆಟ್‌ ತಂಡದ ನಾಯಕ ವಿರಾಟ್‌ ಕೊಹ್ಲಿ ಸೇರಿ ತಂಡದ ವ್ಯವಸ್ಥಾಪಕರಿಗೆ ರಾತ್ರಿ ನಿದ್ರೆಯಿಲ್ಲದ ಪರಿಸ್ಥಿತಿಯುಂಟು ಮಾಡಿತ್ತು.

ಆದರೆ ಭಾನುವಾರ ರಾತ್ರಿ ಅವರು ಹೋಟೆಲ್‌ಗೆ ಮರಳುವಷ್ಟರಲ್ಲಿ ಅವರಿಗೆ ಯಾವುದೇ ಸಮಸ್ಯೆಯಿಲ್ಲ, ಅವರಿಗೆ ಆಗಿದ್ದು ಕೇವಲ ಸ್ನಾಯು ಸೆಳೆತ ಮಾತ್ರ ಎಂದು ಗೊತ್ತಾಗಿದೆ. ಆದ್ದರಿಂದ ಎಲ್ಲರೂ ನಿಟ್ಟುಸಿರು ಬಿಟ್ಟಿದ್ದಾರೆ. ಬುಮ್ರಾ ಈ ಬಾರಿ ವಿಶ್ವಕಪ್‌ನಲ್ಲಿ ಭಾರತ ಕ್ರಿಕೆಟ್‌ ತಂಡದ ಪ್ರಧಾನ ವೇಗಿ, ಇದೇ ಕಾರಣಕ್ಕೆ ಎಲ್ಲರೂ ಚಿಂತೆಗೊಳಗಾಗಿದ್ದರು. ಕ್ಷೇತ್ರರಕ್ಷಣೆ ಮಾಡುವಾಗ ಬುಮ್ರಾಗೆ ಭುಜದ ನೋವು ಕಾಣಿಸಿಕೊಂಡ ತಕ್ಷಣ, ಮುಂಬೈ ತಂಡ ಅವರನ್ನು ಬ್ಯಾಟಿಂಗ್‌ಗಿಳಿಸದಿರಲು ನಿರ್ಧರಿಸಿತು. ಇದು ಅವರ ಪರಿಸ್ಥಿತಿ ಬಗ್ಗೆ ಇನ್ನಷ್ಟು ಗೊಂದಲ ಹುಟ್ಟು ಹಾಕಿತ್ತು. ಸದ್ಯ ಎಲ್ಲವೂ ಬಗೆಹರಿದಿರುವುದರಿಂದ ವಾತಾವರಣದಲ್ಲಿ ನಿರಾಳತೆ ಕಂಡುಬಂದಿದೆ.