ಕೆನಡಾ ಟೆನಿಸಿಗ ಶಪೊವ್ಯಾಲೋವ್‌ಗೆ ಕೊರೊನಾ

Team Udayavani, Dec 27, 2021, 6:34 AM IST

ಸಿಡ್ನಿ: ಎಟಿಪಿ ಕಪ್‌ ಪಂದ್ಯಾವಳಿಗಾಗಿ ಸಿಡ್ನಿಗೆ ಆಗಮಿಸಿದ ಕೆನಡಾ ಟೆನಿಸಿಗ ಡೆನಿಸ್‌ ಶಪೊವ್ಯಾಲೋವ್‌ ಅವರಿಗೆ ಕೋವಿಡ್‌ ಅಂಟಿಕೊಂಡಿದೆ. ಇದನ್ನು ಸ್ವತಃ ಅವರೇ ಹೇಳಿಕೊಂಡಿದ್ದಾರೆ.

22 ವರ್ಷದ, ವಿಶ್ವದ 10ನೇ ಶ್ರೇಯಾಂಕಿತ ಆಟಗಾರನಾಗಿರುವ ಶಪೊವ್ಯಾಲೋವ್‌ ಆಸ್ಟ್ರೇಲಿಯಕ್ಕೆ ಮುಂಚಿತವಾಗಿ ಆಗಮಿಸಿದ ಟೆನಿಸಿಗರಲ್ಲಿ ಒಬ್ಬರಾಗಿದ್ದು, ಕೆನಡಾ ತಂಡದೊಂದಿಗೆ ಸಿಡ್ನಿಗೆ ಬಂದಿಳಿದಿದ್ದರು. ಆಸ್ಟ್ರೇಲಿಯನ್‌ ಓಪನ್‌ ಗ್ರ್ಯಾನ್‌ಸ್ಲ್ಯಾಮ್‌ಗೂ ಮುಂಚಿತವಾಗಿ ಜ.1ರಿಂದ 9ರ ತನಕ “ಎಟಿಪಿ ಕಪ್‌’ ನಡೆಯಲಿದೆ. ಬಳಿಕ ಜ.17ರಂದು ವರ್ಷದ ಮೊದಲ ಗ್ರ್ಯಾನ್‌ಸ್ಲ್ಯಾಮ್‌ ಮೆಲ್ಬರ್ನ್ ನಲ್ಲಿ ಆರಂಭವಾಗಲಿದೆ.

ಶಪೊವ್ಯಾಲೋವ್‌ ಪ್ರಕರಣದೊಂದಿಗೆ ಕಳೆದ ಒಂದು ವಾರದಿಂದೀಚೆ ನಾಲ್ವರು ಟೆನಿಸಿಗರಲ್ಲಿ ಕೋವಿಡ್‌ ಪಾಸಿಟಿವ್‌ ದೃಢಪಟ್ಟಂತಾಯಿತು. ಇದಕ್ಕೂ ಮೊದಲು ಅಬುಧಾಬಿ ಟೆನಿಸ್‌ ಟೂರ್ನಿಯಲ್ಲಿ ಆಡಿದ್ದ ರಫಾಯೆಲ್‌ ನಡಾಲ್‌, ಬೆಲಿಂಡಾ ಬೆನ್ಸಿಕ್‌ ಮತ್ತು ಓನ್ಸ್‌ ಜೇಬರ್‌ ಅವರಲ್ಲೂ ಕೊರೊನಾ ಕಂಡುಬಂದಿತ್ತು.