Candidates Chess Tournament: ಪ್ರಜ್ಞಾನಂದ, ವಿದಿತ್‌ಗೆ ಗೆಲುವಿನ ಸಂಭ್ರಮ

Team Udayavani, Apr 12, 2024, 12:40 AM IST

ಟೊರೊಂಟೊ: ಗ್ರ್ಯಾನ್‌ ಮಾಸ್ಟರ್‌ ಆರ್‌. ಪ್ರಜ್ಞಾನಂದ ಮತ್ತು ವಿದಿತ್‌ ಗುಜರಾತಿ ಅವರು ಕ್ಯಾಂಡಿಡೇಟ್ಸ್‌ ಚೆಸ್‌ ಕೂಟದ ಆರನೇ ಸುತ್ತಿನ ಹೋರಾಟದಲ್ಲಿ ಗೆಲುವಿನ ಸಂಭ್ರಮ ಆಚರಿಸಿದರೆ ಡಿ. ಗುಕೇಶ್‌ ಡ್ರಾ ಸಾಧಿಸಿ ಜಂಟಿ ಅಗ್ರಸ್ಥಾನದಲ್ಲಿ ನಿಂತರು.

ಪ್ರಜ್ಞಾನಂದ ಅವರು ಅಜರ್‌ಬೈಜಾನ್‌ನ ನಿಜತ್‌ ಅಬಸೋವ್‌ ಅವರನ್ನು ಉರುಳಿಸಿದರೆ ಗುಜರಾತಿ ಅವರು ಫ್ರಾನ್ಸ್‌ನ ಅಲಿರೆಜ ಅವರನ್ನು ಸೋಲಿಸಲು ಯಶಸ್ವಿಯಾದರು. ಅಮೆರಿಕದ ಹಿಕಾರು ನಕಮುರ ವಿರುದ್ಧ ಗುಕೇಶ್‌ ಡ್ರಾ ಸಾಧಿಸಿದರು.

ಇನ್ನೂ ಎಂಟು ಸುತ್ತುಗಳ ಆಟ ಬಾಕಿ ಉಳಿದಿದ್ದು 17ರ ಹರೆಯದ ಗುಕೇಶ್‌ ಮತ್ತು ರಷ್ಯಾದ ಇಯಾನ್‌ ನೆಪೋಮ್ನಿಯಾಚ್ಚಿ ಅವರು ತಲಾ 4 ಅಂಕಗಳೊಂದಿಗೆ ಪುರುಷರ ವಿಭಾಗದಲ್ಲಿ ಜಂಟಿಯಾಗಿ ಅಗ್ರಸ್ಥಾನದಲ್ಲಿದ್ದಾರೆ. ಫಿಡೆ ಧ್ವಜದಡಿ ಆಡುತ್ತಿರುವ ನೆಪೋಮ್ನಿಯಾಚ್ಚಿ ಅವರು ಅಗ್ರ ಶ್ರೇಯಾಂಕದ ಅಮೆರಿಕದ ಫ್ಯಾಬಿಯಾನೊ ಕರುವಾನ ಅವರೊಂದಿಗೆ ಡ್ರಾ ಸಾಧಿಸಿದರು.

ವನಿತೆಯರ ವಿಭಾಗದಲ್ಲಿ ಭಾರತೀಯರು ನಿರಾಶೆ ಅನುಭವಿಸಿದ್ದಾರೆ. ಪ್ರಜ್ಞಾನಂದ ಅವರ ಹಿರಿಯ ಸಹೋದರಿ ಆರ್‌. ವೈಶಾಲಿ ಅವರು ರಷ್ಯಾದ ಕಟೇರಿನಾ ಲಾಗ್ನೊ ಅವರೆದುರು ಸೋಲನ್ನು ಕಂಡಿದ್ದಾರೆ. ಕೊನೆರು ಹಂಪಿ ಅವರು ಚೀನದ ತಿಂಗಿj ಲೀ ಅವರಿಗೆ ಶರಣಾದರು.