Superbet Chess: ಪ್ರಶಸ್ತಿ ಉಳಿಸಿಕೊಂಡ ಕರುವಾನ

Team Udayavani, Jul 6, 2024, 9:31 PM IST

ಬುಕಾರೆಸ್ಟ್‌ (ರೊಮೇನಿಯಾ): ಸೂಪರ್‌ಬೆಟ್‌ ಕ್ಲಾಸಿಕ್‌ ಚೆಸ್‌ ಪಂದ್ಯವಳಿಯಲ್ಲಿ ಭಾರತದ ಆರ್‌. ಪ್ರಜ್ಞಾನಂದ ಮತ್ತು ಡಿ. ಗುಕೇಶ್‌ ಟೈ ಬ್ರೇಕರ್‌ನಲ್ಲಿ ಸೋತು ಪ್ರಶಸ್ತಿ ಕೈಚೆಲ್ಲಿದ್ದಾರೆ. ಪ್ರಜ್ಞಾನಂದ, ಗುಕೇಶ್‌ ಮತ್ತು ಫ್ರಾನ್ಸ್‌ನ ಫಿರೋಜ ಅಲಿರೆಜ ವಿರುದ್ಧ ಟೈ ಬ್ರೇಕರ್‌ನಲ್ಲಿ ಗೆದ್ದ ಅಮೆರಿಕದ ಫ್ಯಾಬಿಯಾನೊ ಕರುವಾನ, ಸತತ 2ನೇ ಬಾರಿಗೆ ಚಾಂಪಿಯನ್‌ ಪಟ್ಟ ಅಲಂಕರಿಸಿದ್ದಾರೆ.

ಚೆಸ್‌ ವಿಶ್ವ ಪ್ರವಾಸದ ಭಾಗವಾಗಿ ನಡೆದ ಈ ಪಂದ್ಯಾವಳಿಯ 9ನೇ ಮತ್ತು ಕೊನೆಯ ಸುತ್ತಿನ ಪಂದ್ಯದ ಬಳಿಕ ಕರುವಾನ, ಪ್ರಜ್ಞಾನಂದ, ಗುಕೇಶ್‌ ಮತ್ತು ಅಲಿರೆಜ ತಲಾ 5 ಅಂಕ ಗಳಿಸಿದ್ದರು. ಹೀಗಾಗಿ ವಿಜೇತರನ್ನು ರ್ನಿಧರಿಸಲು ಟೈ ಬ್ರೇಕರ್‌ ನಡೆಸಲಾಯಿತು.

8ನೇ ಸುತ್ತಿನ ವರೆಗೆ 5 ಅಂಕ ಗಳಿಸಿ ಅಗ್ರಸ್ಥಾನದಲ್ಲಿದ್ದ ಕರುವಾನ, 9ನೇ ಸುತ್ತಿನಲ್ಲಿ ನೆದರ್ಲೆಂಡ್ಸ್‌ನ ಅನೀಶ್‌ ಗಿರಿ ವಿರುದ್ಧ ಸೋತರು. ಇತ್ತ 4.5 ಅಂಕ ಗಳಿಸಿದ್ದ ಪ್ರಜ್ಞಾನಂದ-ಅಲಿರೆಜ ಪಂದ್ಯ ಡ್ರಾ ಮಾಡಿಕೊಂಡರೆ, ಗುಕೇಶ್‌ ಕೂಡ ಅಮೆರಿಕದ ವೆಸ್ಲಿ ಸೊ ವಿರುದ್ಧ ಡ್ರಾ ಸಾಧಿಸಿ ಅಂಕವನ್ನು 5ಕ್ಕೆ ಏರಿಸಿದ್ದರು.